ਕਾਨਪੁਰ, 14 ਜੂਨ (ਪੋਸਟ ਬਿਊਰੋ)- ਉਤਰ ਪ੍ਰਦੇਸ਼ ਦੇ ਕਾਨਪੁਰ ਜ਼ਿਲ੍ਹੇ ਤੋਂ ਸਿਹਤ ਵਿਭਾਗ ਵਿੱਚ ਫਰਾਡ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਮੁਰਦਿਆਂ ਦੇ ਨਾਂ ਉੱਤੇ ਕਈ ਦਿਨਾਂ ਤਕ ਰੇਮਡੇਸਿਵਿਰ ਇੰਜੈਕਸ਼ਨ ਸਟੋਰ ਕੀਤੇ ਹੋਏ ਕੱਢੇ ਗਏ। ਸੱ਼ਕ ਹੈ ਕਿ ਫਰਜ਼ੀ ਤਰੀਕੇ ਨਾਲ ਰੇਮਡੇਸਿਵਿਰ ਇੰਜੈਕਸ਼ਨ ਹਸਪਤਾਲ ਤੋਂ ਕੱਢ ਕੇ ਬਾਹਰ ਉਚੇਰੇ ਰੇਟਾਂ ਵਿੱਚ ਵੇਚੇ ਗਏ ਹਨ। ਜਦੋਂ ਮਾਮਲਾ ਸੁਰਖੀਆਂ ਵਿੱਚ ਆਇਆ ਤਾਂ ਮੁੱਖ ਮੰਤਰੀ ਨੇ ਜਾਂਚ ਦੇ ਹੁਕਮ ਦੇ ਦਿੱਤੇ ਹਨ।
ਮਿਲੀ ਜਾਣਕਾਰੀ ਮੁਤਾਬਕ ਕਾਨਪੁਰ ਦੇ ਹੈਲਟ ਹਸਪਤਾਲ ਦੇ ਨਿਊਰੋ ਸਾਇੰਸਿਜ਼ ਵਿਭਾਗ ਵਿੱਚ ਰਿਕਾਰਡ ਵਿੱਚੋਂ ਪਤਾ ਲੱਗਾ ਹੈ ਕਿ ਇੱਥੇ ਮੁਰਦਿਆਂ ਦੇ ਨਾਂ ਉੱਤੇ ਰੇਮਡੇਸਿਵਿਰ ਇੰਜੈਕਸ਼ਨ ਲਾਏ ਗਏ ਹਨ। ਇਸ ਦਾ ਖ਼ੁਲਾਸਾ ਹੋਇਆ ਤਾਂ ਹਸਪਤਾਲ ਪ੍ਰਸ਼ਾਸਨ ਵਿੱਚ ਹੁੜਦੰਗ ਮੱਚ ਗਿਆ ਹੈ। ਰੇਮਡੇਸਿਵਿਰ ਇੰਜੈਕਸ਼ਨ ਨੂੰ ਮ੍ਰਿਤਕਾਂ ਦੇ ਨਾਂ ਉੱਤੇ ਜਾਰੀ ਕਰਵਾ ਕੇ ਉਨ੍ਹਾਂ ਨੂੰ ਬਾਜ਼ਾਰ ਵਿੱਚ ਮਹਿੰਗੇ ਰੇਟ ਉੱਤੇ ਵੇਚੇ ਜਾਣ ਦਾ ਸ਼ੱਕ ਪ੍ਰਗਟ ਕੀਤਾ ਜਾ ਰਿਹਾ ਹੈ। ਇਹ ਇੰਜੈਕਸ਼ਨ ਉਦੋਂ ਕਢਵਾਏ ਗਏ, ਜਦੋਂ ਮਰੀਜ਼ਾਂ ਦੀ ਮੌਤ ਹੋ ਚੁੱਕੀ ਸੀ। ਇਸ ਲਈ ਡਾਕਟਰ ਦੀ ਪਰਚੇ ਉੱਤੇ ਵੀ ਸਵਾਲ ਹੈ ਕਿ ਮਰੀਜ਼ ਮਰ ਚੁੱਕੇ ਸਨ ਤਾਂ ਇੰਜੈਕਸ਼ਨ ਕਿਸ ਨੂੰ ਲਾਏ ਗਏ। ਇਹ ਘਟਨਾ ਰੇਮਡੇਸਿਵਿਰ ਇੰਜੈਕਸ਼ਨ ਦੀ ਕਾਲਾਬਾਜ਼ਾਰੀ ਵੱਲ ਇਸ਼ਾਰਾ ਕਰਦੀ ਹੈ। ਮੁੱਖ ਮੰਤਰੀ ਨੇ ਇਸ ਬਾਰੇ ਹੈਲਟ ਹਾਸਪੀਟਲ ਦੇ ਪ੍ਰਿੰਸੀਪਲ ਤੋਂ ਰਿਪੋਰਟ ਮੰਗੀ ਹੈ।