ਰਾਜਕੋਟ, 14 ਜੂਨ (ਪੋਸਟ ਬਿਊਰੋ)- ਗੁਜਰਾਤ ਵਿੱਚ ਕੋਵਿਡ-19 ਮਹਾਮਾਰੀ ਬਾਰੇ ਆਰ ਟੀ ਪੀ ਸੀ ਆਰ ਜਾਂਚ ਕਰਨ ਦੇ ਨਾਂਅ ਉੱਤੇ ਇੱਕ ਵੱਡਾ ਘੋਟਾਲਾ ਸਾਹਮਣੇ ਹੋਇਆ ਪਤਾ ਲੱਗਾ ਹੈ। ਸੈਂਪਲ ਦੇ ਨਾਲ ਸਿਹਤ ਮੁਲਾਜ਼ਮਾਂ ਦੇ ਹੀ ਮੋਬਾਈਲ ਨੰਬਰ ਨੂੰ ਰਿਕਾਰਡ ਵਿੱਚ ਦਰਜ ਕਰ ਕੇ ਇਹ ਘੋਟਾਲਾਕੀਤਾ ਗਿਆ ਹੈ ਅਤੇ ਇਸ ਦੀ ਗਿਣਤੀ ਇੱਕ-ਦੋ ਨਹੀਂ, ਬਲਕਿ ਹਜ਼ਾਰਾਂ ਵਿੱਚ ਹੈ। ਹੈਰਾਨੀ ਵਾਲਾ ਤੱਥ ਇਹ ਹੈ ਕਿ ਧੋਰਾਜੀ ਦੇ ਇੱਕ ਪਿੰਡ ਦੀ ਔਰਤ ਦੇ ਮੋਬਾਈਲ ਨੰਬਰ ਤੋਂ ਹਰ ਸੂਬੇ ਵਿੱਚ 270 ਸੈਂਪਲ ਦਰਜ ਕੀਤੇ ਗਏ ਮਿਲੇ ਹਨ, ਜਸ ਕਿ ਮੀਡੀਆ ਨੂੰ ਉਸ ਨੇ ਦੱਸਿਆ ਕਿ ਉਸ ਨੇ ਅੱਜ ਤਕ ਕੋਈ ਸੈਂਪਲ ਹੀ ਨਹੀਂ ਦਿੱਤਾ, ਇੱਕ ਵਾਰ ਵੈਕਸੀਨ ਜ਼ਰੂਰ ਲਗਵਾਉਣ ਗਈ ਸੀ। ਇਸੇ ਤਰ੍ਹਾਂ ਰਾਜਕੋਟ ਵਿੱਚ ਸਿਹਤ ਵਿਭਾਗ ਦੇ 26 ਮੁਲਾਜ਼ਮਾਂ ਦੇ ਮੋਬਾਈਲ ਨੰਬਰਾਂ ਦੀ ਵਰਤੋਂ 1073 ਸੈਂਪਲਾਂ ਵਿੱਚ ਕੀਤੀ ਗਈ ਅਤੇ ਅਹਿਮਦਾਬਾਦ ਦੀ ਇੱਕ ਤਹਿਸੀਲ ਵਿੱਚ ਤੀਹ ਆਸ਼ਾ ਵਰਕਰਾਂ ਦੇ ਨੰਬਰਾਂ ਉੱਤੇ 1857 ਸੈਂਪਲ ਲਏ ਗਏ, ਜਦ ਕਿ ਮਹੇਸਾਣਾ ਵਿੱਚ 140 ਸੈਂਪਲ ਸਿਹਤ ਮੁਲਾਜ਼ਮਾਂ ਦੇ ਮੋਬਾਈਲ ਨੰਬਰਾਂ ਤੋਂ ਹੀ ਭੇਜੇ ਗਏ।
ਮਿਲੀ ਜਾਣਕਾਰੀ ਅਨੁਸਾਰ ਇਸ ਜਾਂਚ ਟੀਮ ਨੂੰ ਰਾਜਕੋਟ ਦੇ ਇਲਾਵਾ ਦੂਸਰੇ ਜ਼ਿਲ੍ਹਿਆਂ ਦੀ ਸੂਚੀ ਵਿੱਚ ਵੀ 60 ਹਜ਼ਾਰ ਸੈਂਪਲਾਂ ਵਿੱਚ ਗੜਬੜ ਨਜ਼ਰ ਆਈ ਹੈ। ਇੱਕ ਮੋਬਾਈਲ ਨੰਬਰ ਅਜਿਹਾ ਮਿਲਿਆ ਹੈ, ਜਿਸ ਉੱਤੇ 270 ਸੈਂਪਲ ਜਾਂਚ ਲਈ ਭੇਜੇ ਗਏ, ਇਨ੍ਹਾਂ 270 ਸੈਂਪਲਾਂ ਵਿੱਚ ਨਾਂਅ ਅਤੇ ਪਤੇ ਵੱਖ-ਵੱਖ ਸਨ, ਪਰ ਮੋਬਾਈਲ ਨੰਬਰ ਇੱਕ ਹੀ ਸੀ। ਇਹ ਨੰਬਰ ਧੋਰਾਜੀ ਦੇ ਇੱਕ ਪਿੰਡ ਦੀ ਔਰਤ ਦਾ ਨਿਕਲਿਆ। ਮਿਲੇ ਡਾਟਾ ਵਿੱਚ 1073 ਸੈਂਪਲ ਅਜਿਹੇ ਮਿਲੇ ਜੋ 26 ਮੋਬਾਈਲ ਨੰਬਰਾਂ ਉੱਤੇ ਦਰਜ ਹਨ। ਇਹ ਸਾਰੇ 26 ਮੋਬਾਈਲ ਨੰਬਰ ਰਾਜਕੋਟ ਦੇ ਸਿਹਤ ਮੁਲਾਜ਼ਮਾਂ ਦੇ ਨਿਕਲੇ। ਆਰ ਟੀ ਪੀ ਸੀ ਆਰ ਸੈਂਪਲ ਦੇ ਨਾਲ ਦਰਜ ਨੱਬੇ ਮੋਬਾਈਲ ਨੰਬਰ ਗਲਤ ਮਿਲੇ, ਪਰ ਇਨ੍ਹਾਂ ਦੀ ਜਾਂਚ ਰਿਪੋਰਟ ਦਾ ਨਤੀਜਾ ਨੈਗੇਟਿਵ ਮਿਲਿਆ। ਅਹਿਮਦਾਬਾਦ ਦੀ ਇੱਕ ਤਹਿਸੀਲ ਵਿੱਚ 1857 ਸੈਂਪਲ ਤੀਹ ਆਸ਼ਾ ਵਰਕਰਾਂ ਦੇ ਮੋਬਾਈਲ ਨੰਬਰਾਂਉੱਤੇ ਦਰਜ ਮਿਲੇ। ਮੀਡੀਆ ਟੀਮ ਨੇ ਪੜਤਾਲ ਦੇ ਲਈ ਫੋਨ ਕਰਦੇ ਹੀ ਸਿਹਤ ਮੁਲਾਜ਼ਮ ਘਬਰਾ ਗਏ ਅਤੇ ਫੋਨ ਕੱਟ ਦਿੱਤੇ, ਪਰ ਮੀਡੀਆ ਦੇ ਕੋਲ ਸਿਹਤ ਮੁਲਾਜ਼ਮਾਂ ਦੇ ਨਾਂਅ ਹਨ।