ਅਮੇਜਨ ਪ੍ਰਾਈਮ ਵੀਡੀਓ ਉੱਤੇ ਰਿਲੀਜ਼ ਹੋਈ ਮਨੋਜ ਵਾਜਪਾਈ ਦੀ ਵੈੱਬ ਸੀਰੀਜ਼ ‘ਦ ਫੈਮਿਲੀ ਮੈਨ’ ਦੇ ਦੂਸਰੇ ਸੀਜ਼ਨ ਵਿੱਚ ਭਾਰਤ ਦੇ ਨਾਲ ਸ੍ਰੀਲੰਕਾ, ਲੰਡਨ ਅਤੇ ਫਰਾਂਸ ਦੇ ਵੀ ਕੁਝ ਸੀਨ ਫਿਲਮਾਏ ਹਨ। ਇਸ ਦੇ ਡਾਇਰੈਕਟਰ ਰਾਜ ਨਿਦੀਮੋਰੂ ਅਤੇ ਕ੍ਰਿਸ਼ਨਾ ਡੀ ਕੇ ਨੇ ਦੱਸਿਆ ਕਿ ਸ਼ੋਅ ਵਿੱਚ ਦਿਖਾਏ ਗਏ ਸ੍ਰੀਲੰਕਾ ਵਾਲੇ ਸੀਨ ਭਾਰਤ ਵਿੱਚ ਹੀ ਸੈਟ ਲਾ ਕੇ ਫਿਲਮਾਏ ਗਏ ਸਨ। ਡੀ ਕੇ ਨੇ ਕਿਹਾ, ਪਹਿਲੇ ਸੀਜ਼ਨ ਵਿੱਚ ਕਹਾਣੀ ਦੀ ਮੰਗ ਅਨੁਸਾਰ ਅਸੀਂ ਕਸ਼ਮੀਰ ਵਿੱਚ ਜਾ ਕੇ ਸ਼ੂਟ ਕੀਤਾ ਸੀ। ਦੂਸਰੇ ਸੀਜ਼ਨ ਦੀ ਕਹਾਣੀ ਚੇਨੱਈ, ਦੱਖਣੀ ਤਾਮਿਲ ਨਾਡੂ, ਬ੍ਰਿਟੇਨ, ਫਰਾਂਸ ਅਤੇ ਸ੍ਰੀਲੰਕਾ ਵਿੱਚ ਸੈੱਟ ਹੈ। ਇਸ ਲਈ ਕਹਾਣੀ ਦੀ ਮੰਗ ਅਨੁਸਾਰ ਅਸੀਂ ਵੱਖ-ਵੱਖ ਥਾਈਂ ਕੀਤਾ। ਬ੍ਰਿਟੇਨ ਦਾ ਪੂਰਾ ਹਿੱਸਾ ਉਥੇ ਜਾ ਕੇ ਕੀਤਾ ਸੀ। ਚੇਨਈ ਵਿੱਚ ਵੀ ਅਸੀਂ ਇਸੇ ਤਰ੍ਹਾਂ ਕੀਤਾ। ਸ੍ਰੀਲੰਕਾ ਦੇ ਸੀਨ ਫਿਲਮਾਉਣ ਲਈ ਅਸੀਂ ਉਥੇ ਜਾਣਾ ਚਾਹੁੰਦੇ ਸੀ, ਪਰ ਕੁਝ ਕਾਰਨਾਂ ਕਰ ਕੇ ਨਹੀਂ ਜਾ ਸਕੇ। ਇਸ ਲਈ ਉਥੋਂ ਦੇ ਸੀਨ ਇੰਡੀਆ ਵਿੱਚ ਸ਼੍ਰੀਲੰਕਾ ਦਾ ਸੈੱਟ ਲਾ ਕੇ ਸ਼ੂਟ ਕੀਤੇ।
ਅੱਗੇ ਰਾਜ ਕਹਿੰਦੇ ਹਨ ਕਿ ਅਸੀਂ ਤਾਮਿਲ ਨਾਡੂ ਤੋਂ ਹਾਂ, ਸਾਨੂੰ ਕਾਫੀ ਸਾਲਾਂ ਤੋਂ ਉਤਸੁਕਤਾ ਸੀ ਕਿ ਉਥੋਂ ਦੀਆਂ ਦੀਆਂ ਕੁਝ ਕਹਾਣੀਆਂ ਉੱਤੇ ਫਿਲਮਾਂ ਬਣਾਈਏ। ‘ਦ ਫੈਮਿਲੀ ਮੈਨ’ ਦੇ ਦੂਸਰੇ ਸੀਜਨ ਵਿੱਚ ਸਾਨੂੰ ਉਹ ਮੌਕਾ ਮਿਲਿਆ। ਅਸੀਂ ਆਪਣੇ ਸਕੂਲ ਅਤੇ ਕਾਲਜ ਦੇ ਦਿਨਾਂ ਵਿੱਚ ਇਹ ਸਭ ਦੇਖਿਆ ਹੋਇਆ, ਸਾਡੀ ਸੋਚ ਸੀ ਕਿ ਅਸੀਂ ਹਰ ਮੁੱਦੇ ਨੂੰ ਸਹੀ ਸਹੀ ਦਿਖਾਈਏ। ਇਸ ਸ਼ੋਅ ਵਿੱਚ ਹਰ ਚੀਜ਼ ਨੂੰ ਸੰਤੁਲਿਤ ਅਤੇ ਸੰਵੇਦਨਸ਼ੀਲਤਾ ਨਾਲ ਦਿਖਾਉਣ ਦੇ ਲਈ ਅਸੀਂ ਕਾਫੀ ਰਿਸਰਚ ਵੀ ਕੀਤੀ ਸੀ।