ਚੰਡੀਗੜ੍ਹ, 13 ਜੂਨ (ਪੋਸਟ ਬਿਊਰੋ)- ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ ਲੁਧਿਆਣੇ ਦੀ ਸਾਈਕਲ ਮਾਰਕੀਟ ਨੇੜੇ ਰਹਿੰਦੇ ਮੁਹੰਮਦ ਸੁਜਾਕ ਨੂੰ ਕਤਲ ਕੇਸ ਵਿੱਚ ਬਰੀ ਕਰ ਕੇ ਬਾਕੀ ਸਜ਼ਾ ਸਸਪੈਂਡ ਕਰਨ ਦੇ ਹੁਕਮ ਕੀਤੇ ਹਨ।
ਵਰਨਣ ਯੋਗ ਹੈ ਕਿ ਲੁਧਿਆਣੇਵਿੱਚ ਨੌਂ ਮਾਰਚ 2014 ਦੀ ਰਾਤ ਮੁਹੰਮਦ ਫੈਜ਼ ਨਾਮਕ ਨੌਜਵਾਨ ਦੀ ਲਾਸ਼ ਮਿਲੀ ਸੀ, ਜਿਸ ਦੇ ਸਰੀਰ ਉੱਤੇ ਸੱਟਾਂ ਦੇ ਨਿਸ਼ਾਨ ਸਨ। ਮ੍ਰਿਤਕ ਦੇ ਭਰਾ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਕਿ ਮੁਹੰਮਦ ਫੈਜ਼ ਤੇ ਮੁਹੰਮਦ ਸੁਜਾਕ ਇੱਕਪ ਫੈਕਟਰੀ ਵਿੱਚ ਕੰਮ ਕਰਦੇ ਸਨ ਅਤੇ ਨੌਂ ਮਾਰਚ ਰਾਤ ਦੋਵਾਂ ਨੇ ਇਕੱਠੇ ਸ਼ਰਾਬ ਪੀਤੀ ਤੇ ਸੁਜਾਕ ਨੇ ਮੁਹੰਮਦ ਫੈਜ਼ ਤੋਂ ਕੁਝ ਪੈਸੇ ਮੰਗੇ ਸਨ, ਜਿਹੜੇ ਉਸ ਨੇ ਨਹੀਂ ਦਿੱਤੇ। ਇਸ ਕਾਰਨ ਮੁਹੰਮਦ ਸੁਜਾਕ ਨੇ ਉਸ ਦਾ ਕਤਲਕਰ ਦਿੱਤਾ ਹੈ। ਪੁਲਸ ਨੇ ਮੁਹੰਮਦ ਸੁਜਾਕ ਨੂੰ ਗ੍ਰਿਫਤਾਰ ਕੀਤਾ ਤੇ ਸੈਸ਼ਨ ਕੋਰਟ ਵਿੱਚ ਉਸ ਨੇ ਖੁਦ ਨੂੰ ਬੇਗੁਨਾਹ ਦੱਸ ਕੇ ਕਿਹਾ ਸੀ ਕਿ ਉਹ ਮ੍ਰਿਤਕ ਦਾ ਦੋਸਤ ਸੀ ਅਤੇ ਦੋਵੇਂ ਬਿਹਾਰ ਵਿੱਚ ਇੱਕੋ ਪਿੰਡ ਤੋਂ ਸਨ। ਉਸ ਨੇ ਕੋਰਟ ਨੂੰ ਦੱਸਿਆ ਕਿ ਮ੍ਰਿਤਕ ਫੈਜ਼ ਸ਼ਰਾਬ ਅਤੇ ਨਸ਼ੇ ਦਾ ਆਦੀ ਸੀ ਤੇ ਨੌਂ ਮਾਰਚ ਨੂੰ ਉਸ ਨੇ ਜ਼ਿਆਦਾ ਨਸ਼ਾ ਕਰ ਲਿਆ ਸੀ, ਜੋ ਉਸ ਦੀ ਮੌਤ ਦਾ ਕਾਰਨ ਹੋ ਸਕਦਾ ਹੈ। ਪੁਲਸ ਵੱਲੋਂ ਪੇਸ਼ ਕੀਤੇ ਗਵਾਹਾਂ ਦੀ ਗਵਾਹੀ ਪਿੱਛੋਂ ਲੁਧਿਆਣੇ ਦੀ ਸੈਸ਼ਨ ਜੱਜ ਲਖਵਿੰਦਰ ਕੌਰ ਦੁੱਗਲ ਨੇ ਮੁਹੰਮਦ ਸੁਜਾਕ ਨੂੰ ਦੋਸ਼ੀ ਮੰਨ ਕੇ 18 ਜਨਵਰੀ 2020 ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾ ਦਿੱਤੀ ਸੀ।ਮੁਹੰਮਦ ਸੁਜਾਕ ਨੇ ਸਜ਼ਾ ਨੂੰ ਹਾਈ ਕੋਰਟ ਵਿੱਚ ਚੁਣੌਤੀ ਦਿੱਤੀ ਤਾਂ ਸੁਣਵਾਈ ਪਿੱਛੋਂ ਹਾਈ ਕੋਰਟ ਨੇ ਮੁਹੰਮਦ ਸੁਜਾਕ ਦੇ ਵਕੀਲ ਵੱਲੋਂ ਪੇਸ਼ ਕੀਤੇ ਦਸਤਾਵੇਜ਼ਾਂ ਅਤੇ ਗਵਾਹਾਂ ਦੇ ਬਿਆਨਾਂ ਦੇ ਆਧਾਰ ਉੱਤੇ ਸੈਸ਼ਨ ਕੋਰਟ ਵੱਲੋਂ ਦਿੱਤੀ ਗਈ ਉਮਰ ਕੈਦ ਦੀ ਸਜ਼ਾ ਨੂੰ ਰੱਦ ਕਰ ਕੇ ਉਸ ਨੂੰ ਬਰੀ ਕਰ ਦਿੱਤਾ ਹੈ।