ਓਟਵਾ, 10 ਜੂਨ (ਪੋਸਟ ਬਿਊਰੋ) : ਨਿਊ ਬਰੰਜ਼ਵਿੱਕ ਤੋਂ ਗ੍ਰੀਨ ਪਾਰਟੀ ਦੀ ਐਮਪੀ ਜੈਨਿਕਾ ਐਟਵਿਨ ਦੇ ਲਿਬਰਲ ਕਾਕਸ ਵਿੱਚ ਸ਼ਾਮਲ ਹੋਣ ਦੀਆਂ ਕਨਸੋਆਂ ਹਨ। ਜੇ ਅਜਿਹਾ ਹੁੰਦਾ ਹੈ ਤਾਂ ਹਾਊਸ ਆਫ ਕਾਮਨਜ਼ ਵਿੱਚ ਗ੍ਰੀਨ ਪਾਰਟੀ ਦੇ ਸਿਰਫ ਦੋ ਐਮਪੀ ਹੀ ਰਹਿ ਜਾਣਗੇ।
ਗ੍ਰੀਨ ਪਾਰਟੀ ਵਿਚਲਾ ਇਹ ਅੰਦਰੂਨੀ ਪਾੜਾ ਪਿਛਲੇ ਮਹੀਨੇ ਉਸ ਸਮੇਂ ਜੱਗ ਜਾਹਿਰ ਹੋਇਆ ਜਦੋਂ ਇਜ਼ਰਾਈਲ-ਫਲਸਤੀਨ ਸੰਘਰਸ਼ ਦੇ ਸਬੰਧ ਵਿੱਚ ਐਟਵਿਨ ਨੇ ਖੁੱਲ੍ਹੇਆਮ ਪਾਰਟੀ ਦੀ ਆਗੂ ਅਨੈਮੀ ਪਾਲ ਨੂੰ ਸਥਿਤੀ ਸਪਸ਼ਟ ਕਰਨ ਲਈ ਚੁਣੌਤੀ ਦੇ ਦਿੱਤੀ।ਐਟਵਿਨ ਵੱਲੋਂ ਪਾਲਾ ਬਦਲੇ ਜਾਣ ਨਾਲ ਜਿੱਥੇ ਲਿਬਰਲ ਪਾਰਟੀ ਦਾ ਪੱਲੜਾ ਭਾਰੀ ਹੋ ਜਾਵੇਗਾ ਉੱਥੇ ਹੀ ਪਹਿਲਾਂ ਤੋਂ ਹੀ ਆਪਣੀ ਹੋਂਦ ਨੂੰ ਬਚਾਉਣ ਲਈ ਸੰਘਰਸ਼ ਕਰ ਰਹੀ ਗ੍ਰੀਨ ਪਾਰਟੀ ਨੂੰ ਬਹੁਤ ਵੱਡਾ ਝਟਕਾ ਲੱਗੇਗਾ।
ਜਿ਼ਕਰਯੋਗ ਹੈ ਕਿ ਇਹ ਨਵੀਂਆਂ ਤਰੇੜਾ ਪਾਰਟੀ ਵਿੱਚ ਉਸ ਸਮੇਂ ਆਈਆਂ ਜਦੋਂ ਐਟਵਿਨ ਨੇ ਆਪਣੀ ਇੱਕ ਟਵਿੱਟਰ ਪੋਸਟ ਉੱਤੇ ਇਜ਼ਰਾਈਲ ਦੇ ਕਬਜੇ ਵਾਲੇ ਫਲਸਤੀਨ ਵਿੱਚ ਚੱਲ ਰਹੀ ਤਾਜ਼ਾ ਹਿੰਸਾ ਬਾਰੇ ਪਾਲ ਦੇ ਰਵਾਇਤੀ ਪੱਖ ਨੂੰ ਬਿਲਕੁਲ ਅਢੁੱਕਵਾਂ ਕਰਾਰ ਦਿੱਤਾ। ਪਾਲ ਨੇ ਆਖਿਆ ਸੀ ਕਿ ਉਨ੍ਹਾਂ ਦੀ ਟੀਮ ਅੰਦਰੂਨੀ ਸੁਲ੍ਹਾ ਚਾਹੁੰਦੀ ਹੈ ਪਰ ਗ੍ਰੀਨ ਪਾਰਟੀ ਦੇ ਦੋ ਸਰੋਤਾਂ ਨੇ ਆਖਿਆ ਕਿ ਇਸ ਸੁਲ੍ਹਾਂ ਦੇ ਕੋਈ ਬਹੁਤੇ ਆਸਾਰ ਨਜ਼ਰ ਨਹੀਂ ਆਉਂਦੇ।