ਕਿਸ਼ਨਗੜ੍ਹ (ਜਲੰਧਰ), 12 ਦਸੰਬਰ (ਪੋਸਟ ਬਿਊਰੋ)- ਨੇੜਲੇ ਪਿੰਡ ਬਿਆਸ ਵਿੱਚ ਕੱਲ੍ਹ ਸਵੇਰੇ ਪਿੰਡ ਦੇ ਇੱਕ ਖਾਲੀ ਪਲਾਟ ਵਿੱਚ ਇੱਕ ਕਲਯੁਗੀ ਮਾਂ ਵੱਲੋਂ ਆਪਣੀ ਨਵ ਜੰਮੀ ਬੱਚੀ ਬਿਨਾਂ ਕੱਪੜਿਆਂ ਦੇ ਸੁੱਟੀ ਹੋਈ ਮਿਲੀ। ਬੱਚੀ ਦੇ ਰੋਣ ਦੀ ਆਵਾਜ਼ ਸੁਣ ਕੇ ਪਿੰਡ ਵਾਸੀ ਉਸ ਨੂੰ ਚੁੱਕ ਕੇ ਲੈ ਆਏ ਅਤੇ ਪੁਲਸ ਨੂੰ ਸੂਚਨਾ ਦਿੱਤੀ।
ਪੁਲਸ ਚੌਕੀ ਕਿਸ਼ਨਗੜ੍ਹ ਦੇ ਇੰਚਾਰਜ ਏ ਐੱਸ ਆਈ ਦਲਜੀਤ ਕੁਮਾਰ ਨੇ ਦੱਸਿਆ ਕਿ ਕੱਲ੍ਹ ਸਵੇਰੇ ਉਨ੍ਹਾਂ ਨੂੰ ਸੂਚਨਾ ਮਿਲੀ ਕਿ ਪਿੰਡ ਵਿੱਚ ਇੱਕ ਐੱਨ ਆਰ ਆਈ ਦੇ ਖਾਲੀ ਪਲਾਟ ਵਿੱਚ ਇੱਕ ਨਵ ਜਨਮੀ ਬੱਚੀ ਬਿਨਾ ਕੱਪੜਿਆਂ ਦੇ ਪਈ ਅਤੇ ਜਿਊਂਦੀ ਹੈ। ਉਨ੍ਹਾਂ ਨੇ ਬੱਚੀ ਨੂੰ ਨਿੱਜੀ ਹਸਪਤਾਲ ਦਾਖਲ ਕਰਾਇਆ ਅਤੇ ਅਣਪਛਾਤੇ ਲੋਕਾਂ ਉੱਤੇ ਕੇਸ ਦਰਜ ਕਰ ਕੇ ਦੋਸ਼ੀਆਂ ਦੀ ਤਲਾਸ਼ ਸ਼ੁਰੂ ਕਰ ਦਿੱਤੀ ਹੈ।ਇਸ ਗੱਲ ਦੀ ਪਿੰਡ ਵਿੱਚ ਚਰਚਾ ਸੀ ਕਿ ਇਹ ਕਰਤੂਤ ਸ਼ਾਇਦ ਪਿੰਡ ਦੀ ਇੱਕ ਕੁਆਰੀ ਲੜਕੀ ਅਤੇ ਨੇੜਲੇ ਕਸਬੇ ਦੇ ਇੱਕ ਲੜਕੇ ਦੀ ਹੈ ਜਿਨ੍ਹਾਂ ਨੇ ਗੁਨਾਹ ਛੁਪਾਉਣ ਦੇ ਲਈ ਜਨਮ ਦੇ ਬਾਅਦ ਬੱਚੀ ਨੂੰ ਮਰਨ ਲਈ ਪਲਾਟ ਵਿੱਚ ਸੁੱਟ ਦਿੱਤਾ ਹੈ।