ਲੰਡਨ, 12 ਦਸੰਬਰ (ਪੋਸਟ ਬਿਊਰੋ) : ਬ੍ਰਿਟੇਨ ਦੀ ਪ੍ਰਧਾਨ ਮੰਤਰੀ ਥੈਰੇਸਾ ਮੇਅ ਦੇ ਸਿਰ ਉੱਤੇ ਆਇਆ ਸਿਆਸੀ ਸੰਕਟ ਟਲ ਗਿਆ ਹੈ ਤੇ ਉਸ ਨੇ ਬੇ-ਭਰੋਸਗੀ ਮਤਾ ਜਿੱਤ ਲਿਆ ਹੈ। ਕੰਜ਼ਰਵੇਟਿਵ ਨੀਤੀਘਾੜਿਆਂ ਵੱਲੋਂ ਲਿਆਂਦੇ ਬੇ-ਭਰੋਸਗੀ ਮਤੇ ਨਾਲ ਮੇਅ ਹੱਥੋਂ ਪਾਰਟੀ ਤੇ ਦੇਸ਼ ਦੀ ਲੀਡਰਸਿ਼ਪ ਖੁੱਸ ਵੀ ਸਕਦੀ ਸੀ।
ਪਰ ਮੇਅ ਨੂੰ ਇਹ ਜਿੱਤ 117 ਦੇ ਬਦਲੇ 200 ਵੋਟਾਂ ਨਾਲ ਹਾਸਲ ਹੋਈ। ਇਸ ਨਾਲ ਮੇਅ ਇੱਕ ਕਮਜ਼ੋਰ ਆਗੂ ਬਣ ਗਈ ਹੈ ਕਿਉਂਕਿ ਯੂਰਪੀਅਨ ਯੂਨੀਅਨ ਨਾਲੋਂ ਬ੍ਰਿਟੇਨ ਦੇ ਵੱਖ ਹੋਣ ਦੇ ਮੁੱਦੇ ਨੂੰ ਸਾਂਭਣ ਦੇ ਮੁੱਦੇ ਉੱਤੇ ਉਨ੍ਹਾਂ ਦੀ ਪਾਰਟੀ ਦੇ ਹੀ ਵੱਡੇ ਹਿੱਸੇ ਦਾ ਸਮਰਥਨ ਉਨ੍ਹਾਂ ਕੋਲੋਂ ਖੁੱਸ ਗਿਆ। ਮੇਅ ਨੇ 2022 ਵਿੱਚ ਹੋਣ ਵਾਲੀਆਂ ਚੋਣਾਂ ਵਿੱਚ ਹਿੱਸਾ ਨਾ ਲੈਣ ਦਾ ਵਾਅਦਾ ਵੀ ਕੀਤਾ ਹੈ। ਇਸ ਦੌਰਾਨ ਬ੍ਰਿਟੇਨ ਦੀ ਬ੍ਰੈਗਜਿ਼ਟ ਸਮੱਸਿਆ ਵੀ ਅਣਸੁਲਝੀ ਪਈ ਹੈ। ਮੇਅ ਬ੍ਰੈਗਜਿ਼ਟ ਬਾਰੇ ਪਾਰਲੀਆਮੈਂਟ ਵਿੱਚ ਹੋਣ ਵਾਲੀ ਵੋਟ ਨੂੰ ਵਧੇਰੇ ਪ੍ਰਭਾਵਸ਼ਾਲੀ ਬਣਾਉਣ ਲਈ ਹੋਰ ਯਤਨ ਕਰਨਾ ਚਾਹੁੰਦੀ ਹੈ।
ਮੇਅ ਨੇ ਬੁੱਧਵਾਰ ਨੂੰ ਆਖਿਆ ਕਿ ਉਨ੍ਹਾਂ ਨੂੰ ਖੁਸੀ ਹੈ ਕਿ ਉਨ੍ਹਾਂ ਦੇ ਸਹਿਯੋਗੀਆਂ ਨੇ ਉਨ੍ਹਾਂ ਦਾ ਸਮਰਥਨ ਕੀਤਾ ਪਰ ਉਨ੍ਹਾਂ ਇਹ ਵੀ ਸਵੀਕਾਰਿਆ ਕਿ ਉਨ੍ਹਾਂ ਦੇ ਕਈ ਸਾਥੀ ਉਨ੍ਹਾਂ ਦੇ ਖਿਲਾਫ ਵੀ ਭੁਗਤੇ। ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਦਾ ਇਹ ਦਿਨ ਚੁਣੌਤੀ ਭਰਿਆ ਰਿਹਾ।