ਓਨਟਾਰੀਓ, 12 ਦਸੰਬਰ (ਪੋਸਟ ਬਿਊਰੋ) : ਅੱਠ ਮਹੀਨੇ ਦੀ ਜਾਂਚ ਤੋਂ ਬਾਅਦ ਪਿਛਲੇ ਹਫਤੇ ਮਾਰੇ ਗਏ ਛਾਪਿਆਂ ਵਿੱਚ ਕਾਨੂੰਨੀ ਹਿੱਸਿਆਂ ਦੀ ਵਰਤੋਂ ਕਰਕੇ ਗੈਰਕਾਨੂੰਨੀ ਹੈਂਡਗੰਨਜ਼ ਤਿਆਰ ਕਰਨ ਤੇ ਉਨ੍ਹਾਂ ਨੂੰ ਵੇਚਣ ਵਾਲੇ ਗਿਰੋਹ ਦਾ ਪਰਦਾਫਾਸ਼ ਹੋਇਆ ਹੈ। ਇਹ ਜਾਣਕਾਰੀ ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਵੱਲੋਂ ਦਿੱਤੀ ਗਈ।
ਪੁਲਿਸ ਦਾ ਮੰਨਣਾ ਹੈ ਕਿ ਇਸ ਗਰੁੱਪ ਵੱਲੋਂ 120 ਹੈਂਡਗੰਨਜ਼ ਤਿਆਰ ਕਰਕੇ ਇਲਾਕੇ ਵਿੱਚ ਮੁਜਰਮਾਂ ਨੂੰ ਵੇਚੀਆਂ ਗਈਆਂ। ਇਹ ਘਰ ਵਿੱਚ ਤਿਆਰ ਕੀਤੀਆਂ ਗੰਨਜ਼ ਸਨ ਜਿਨ੍ਹਾਂ ਨੂੰ ਸੀਰੀਅਲ ਨੰਬਰਜ਼ ਰਾਹੀਂ ਟਰੇਸ ਨਹੀਂ ਸੀ ਕੀਤਾ ਜਾ ਸਕਦਾ। ਇਸ ਰੁਝਾਨ ਦਾ ਇੱਥੇ ਕਾਫੀ ਚਲਣ ਹੋ ਗਿਆ ਸੀ। ਓਪੀਪੀ ਡਿਪਟੀ ਕਮਿਸ਼ਨਰ ਰਿੱਕ ਬਾਰਨਮ ਨੇ ਆਖਿਆ ਕਿ ਇਸ ਮਾਮਲੇ ਨਾਲ ਜੁੜੀਆਂ ਸਾਰੀਆਂ ਗਤੀਵਿਧੀਆਂ ਸੰਗਠਿਤ ਜੁਰਮ ਵੱਲ ਹੀ ਇਸ਼ਾਰਾ ਕਰਦੀਆਂ ਸਨ।
ਫੋਰਸ ਵੱਲੋਂ 23 ਵਿਅਕਤੀਆਂ ਖਿਲਾਫ 150 ਚਾਰਜ ਲਾਏ ਗਏ, ਇਨ੍ਹਾਂ ਕੋਲੋਂ ਹਾਸਲ ਸਮਾਨ ਵਿੱਚ 14 ਹੈਂਡਗੰਨਜ਼, 6 ਲਾਂਗ ਗੰਨਜ਼, ਜਿਨ੍ਹਾਂ ਵਿੱਚ ਇੱਕ ਮਸ਼ੀਨਗੰਨ ਤੇ ਇੱਕ ਅਸਾਲਟ ਰਾਈਫਲ, ਗ੍ਰਨੇਡ, ਸਾਇਲੈਂਸਰਜ਼ ਤੇ ਸਟੰਨ ਗੰਨ ਤੋਂ ਇਲਾਵਾ ਬੁਲਟ ਪਰੂਫ ਜੈਕੇਟ ਵੀ ਸ਼ਾਮਲ ਸੀ। ਸੁਪਰਡੈਂਟ ਬ੍ਰਾਇਨ ਮੈਕਿਲੌਪ ਦਾ ਕਹਿਣਾ ਹੈ ਕਿ ਇਹ ਹੈਂਡਗੰਨਜ਼ ਨਿਰੋਲ ਰੂਪ ਵਿੱਚ ਕੈਨੇਡਾ ਵਿੱਚ ਤਿਆਰ ਕੀਤੀਆਂ ਗਈਆਂ ਤੇ ਇਨ੍ਹਾਂ ਦੇ ਹਿੱਸੇ ਕਾਨੂੰਨੀ ਤੌਰ ਉੱਤੇ ਦੇਸ਼ ਤੇ ਵਿਦੇਸ਼ ਤੋਂ ਖਰੀਦੇ ਗਏ। ਉਨ੍ਹਾਂ ਦੱਸਿਆ ਕਿ ਵੇਚੇ ਗਏ ਇੱਕ ਹਥਿਆਰ ਦੀ ਕੀਮਤ 2500 ਡਾਲਰ ਤੱਕ ਸੀ।
ਮੈਕਿਲੌਪ ਨੇ ਆਖਿਆ ਕਿ ਇਨ੍ਹਾਂ ਅਨਿਯੰਤਰਿਤ ਹਿੱਸਿਆਂ ਨੂੰ ਜੋੜ ਕੇ ਪਾਬੰਦੀਸੁ਼ਦਾ ਹਥਿਆਰ ਵੀ ਬਣਾਏ ਜਾ ਸਕਦੇ ਹਨ। ਇਹ ਸਾਡੇ ਲਈ ਚਿੰਤਾ ਦਾ ਵੱਡਾ ਵਿਸ਼ਾ ਹੈ ਤੇ ਇਸ ਦਾ ਹੱਲ ਲੱਭਣ ਲਈ ਅਸੀਂ ਨੀਤੀਘਾੜਿਆਂ ਨਾਲ ਰਲ ਕੇ ਕੋਸਿ਼ਸ਼ ਕਰ ਰਹੇ ਹਾਂ। ਉਨ੍ਹਾਂ ਦੱਸਿਆ ਕਿ ਅਜਿਹੀਆਂ ਗੈਰਕਾਨੂੰਨੀ ਗੰਨਜ਼ ਨੂੰ ਟਰੇਸ ਕਰਨ ਲਈ ਪੰਜ ਹੋਰਨਾਂ ਇਲਾਕਿਆਂ ਦੀਆਂ ਫੋਰਸਿਜ਼ ਨਾਲ ਰਲ ਕੇ ਓਪੀਪੀ ਵੱਲੋਂ ਅਪਰੈਲ ਦੇ ਮਹੀਨੇ ਪ੍ਰੋਜੈੈੈਕਟ ਰੈਨਰ ਸੁ਼ਰੂ ਕੀਤਾ ਗਿਆ।
ਉਨ੍ਹਾਂ ਦੱਸਿਆ ਕਿ ਜਾਂਚ ਤੋਂ ਬਾਅਦ ਦੋ ਕਥਿਤ ਰਿੰਗਲੀਡਰਜ਼, ਰੌਕਵੁੱਡ, ਓਨਟਾਰੀਓ ਦੇ 47 ਸਾਲਾ ਬਰੂਸ ਮੈਕਿਨੌਨ ਤੇ ਸਮਿੱਥਵਿੱਲੇ, ਓਨਟਾਰੀਓ ਦੇ 29 ਸਾਲਾ ਜੌਨ ਰੈਸਮੂਸੈਨ ਦੇ ਨਾਂ ਸਾਹਮਣੇ ਆਏ। ਇਨ੍ਹਾਂ ਦੋਵਾਂ ਵਿੱਚੋਂ ਹਰੇਕ ਉੱਤੇ ਦੋ ਦਰਜਨ ਤੋਂ ਵੱਧ ਚਾਰਜਿਜ਼ ਹਨ। ਪਿਛਲੇ ਹਫਤੇ ਪੁਲਿਸ ਨੇ ਕਈ ਪੁਲਿਸ ਸੈਨਾਵਾਂ ਦੇ 400 ਤੋਂ ਵੱਧ ਅਧਿਕਾਰੀਆਂ ਦੀ ਮਦਦ ਨਾਲ 39 ਥਾਂਵਾਂ ਉੱਤੇ ਛਾਪੇ ਮਾਰੇ। ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ 1.2 ਕਿੱਲੋ ਕੋਕੀਨ, 30 ਗ੍ਰਾਮ ਮੈਥਾਮਫੈਟਾਮਾਈਨ, 13 ਗ੍ਰਾਮ ਹੈਰੋਇਨ, 66 ਫੈਂਟਾਨਿਲ ਟੇਬਲੇਟਸ ਤੇ 85,000 ਡਾਲਰ ਨਕਦ ਹਾਸਲ ਹੋਇਆ ਹੈ। ਇਸ ਤੋਂ ਇਲਾਵਾ ਹੋਰ ਸੰਪਤੀ ਤੇ ਚਾਰ ਗੱਡੀਆਂ ਵੀ ਮਿਲੀਆਂ ਹਨ।