ਮਾਂਟਰੀਅਲ, 30 ਮਈ (ਪੋਸਟ ਬਿਊਰੋ) : ਜੈਸੇਪੇਰੀ ਕੋਟਕਾਨੇਮੀ ਵੱਲੋਂ ਜੇਤੂ ਗੋਲ ਦਾਗੇ ਜਾਣ ਤੋਂ ਬਾਅਦ ਸ਼ਨਿੱਚਰਵਾਰ ਰਾਤ ਨੂੰ ਲੀਫਜ਼ ਉੱਤੇ ਜਿੱਤ ਦੇ ਂਜਸ਼ਨ ਮਨਾਉਣ ਲਈ ਹੈਬਜ਼ ਪ੍ਰਸ਼ੰਸਕ ਸੜਕਾਂ ਉੱਤੇ ਉਤਰ ਆਏ।ਪਰ ਇਨ੍ਹਾਂ ਖੁਸ਼ੀਆਂ ਨੇ ਉਸ ਸਮੇਂ ਹਿੰਸਕ ਰੂਪ ਧਾਰ ਲਿਆ ਜਦੋਂ ਦੋ ਧਿਰਾਂ ਵਿਚਾਲੇ ਹੋਈ ਬਹਿਸ ਤੋਂ ਬਾਅਦ 19 ਸਾਲਾ ਲੜਕੇ ਉੱਤੇ ਚਾਕੂ ਨਾਲ ਵਾਰ ਕਰ ਦਿੱਤੇ ਗਏ ਤੇ ਇੱਕ 18 ਸਾਲਾ ਲੜਕੀ ਦੇ ਪੈਰ ਉੱਤੇ ਗੋਲੀ ਮਾਰ ਦਿੱਤੀ ਗਈ। ਇਹ ਜਾਣਕਾਰੀ ਮਾਂਟਰੀਅਲ ਪੁਲਿਸ (ਐਸ ਪੀ ਵੀ ਐਮ) ਵੱਲੋਂ ਦਿੱਤੀ ਗਈ।
ਐਸ ਪੀ ਵੀ ਐਮ ਦੇ ਬੁਲਾਰੇ ਜੀਨ ਪਿਏਰੇ ਬ੍ਰਾਬੈਂਟ ਨੇ ਆਖਿਆ ਕਿ ਦੋਵਾਂ ਤੋਂ ਜਾਂਚਕਾਰਾਂ ਵੱਲੋਂ ਪੁੱਛਗਿੱਛ ਕੀਤੀ ਗਈ। ਬ੍ਰਾਬੈਂਟ ਨੇ ਆਖਿਆ ਕਿ ਦੋਵੇਂ ਜ਼ਖ਼ਮੀ ਹੁਣ ਖਤਰੇ ਤੋਂ ਬਾਹਰ ਹਨ ਤੇ ਹਸਪਤਾਲ ਵਿੱਚ ਜੇਰੇ ਇਲਾਜ ਹਨ।ਪੁਲਿਸ ਨੇ ਇਹ ਵੀ ਦੱਸਿਆ ਕਿ ਅਜੇ ਤੱਕ ਕਿਸੇ ਨੂੰ ਗ੍ਰਿਫਤਾਰ ਨਹੀਂ ਕੀਤਾ ਗਿਆ ਹੈ। ਇਸ ਦੌਰਾਨ ਜਾਂਚ ਜਾਰੀ ਹੈ ਤੇ ਸਰਵੇਲੈਂਸ ਕੈਮਰਿਆਂ ਦੀ ਫੁਟੇਜ ਦਾ ਮੁਲਾਂਕਣ ਕਰਨ ਦੇ ਨਾਲ ਨਾਲ ਜਾਂਚਕਾਰ ਚਸ਼ਮਦੀਦਾਂ ਨਾਲ ਵੀ ਗੱਲਬਾਤ ਕਰ ਰਹੇ ਹਨ।
ਜਿ਼ਕਰਯੋਗ ਹੈ ਕਿ ਸ਼ੁੱਕਰਵਾਰ ਰਾਤ ਨੂੰ ਕਰਫਿਊ ਹਟਾ ਲਿਆ ਗਿਆ ਸੀ ਤੇ ਰਾਤ ਦੇ 9:30 ਵਜੇ ਤੱਕ ਲੋਕਾਂ ਦੇ ਘਰਾਂ ਵਿੱਚ ਰਹਿਣ ਦੀ ਸ਼ਰਤ ਵੀ ਹਟਾ ਲਈ ਗਈ ਸੀ। ਪਰ ਇਸ ਤੋਂ ਬਾਅਦ ਇਸ ਵੀਕੈਂਡ ਪਾਰਕਾਂ, ਓਲਡ ਪੋਰਟ ਤੇ ਹੋਰਨਾਂ ਇਲਾਕਿਆਂ ਵਿੱਚ ਵਾਧੂ ਪੁਲਿਸ ਫੋਰਸ ਗਸ਼ਤ ਕਰ ਰਹੀ ਸੀ। ਐਤਵਾਰ ਸਵੇਰੇ ਐਸ ਪੀ ਵੀ ਐਮ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਹੋਰ ਨੁਕਸਾਨ ਹੋਣ ਦੀ ਕੋਈ ਖਬਰ ਨਹੀਂ ਹੈ।