ਓਟਵਾ, 27 ਮਈ (ਪੋਸਟ ਬਿਊਰੋ) : ਸਰਕਾਰ ਨੂੰ ਕੈਨੇਡਾ ਵਿੱਚ ਦਾਖਲ ਹੋਣ ਵਾਲੇ ਕੌਮਾਂਤਰੀ ਟਰੈਵਲਰਜ਼ ਨੂੰ ਲਾਜ਼ਮੀ ਤੌਰ ਉੱਤੇ ਹੋਟਲ ਵਿੱਚ ਕੁਆਰਨਟੀਨ ਕਰਨ ਦੀ ਸਲਾਹ ਦੇਣ ਵਾਲੇ ਫੈਡਰਲ ਐਡਵਾਈਜ਼ਰੀ ਪੈਨਲ ਵੱਲੋਂ ਹੁਣ ਕੈਨੇਡਾ ਵਿੱਚ ਹੋਟਲ ਕੁਆਰਨਟੀਨ ਖਤਮ ਕਰਨ ਦੀ ਸਿਫਾਰਿਸ਼ ਕੀਤੀ ਜਾ ਰਹੀ ਹੈ।
ਪੈਨਲ ਦਾ ਕਹਿਣਾ ਹੈ ਕਿ ਇਸ ਦੀ ਥਾਂ ਉੱਤੇ ਹੁਣ ਟਰੈਵਲਰਜ਼ ਨੂੰ ਢੁਕਵੀਂ ਕੁਆਰਨਟੀਨ ਯੋਜਨਾ ਪੇਸ਼ ਕਰਨ ਲਈ ਆਖਿਆ ਜਾ ਰਿਹਾ ਹੈ। ਪੈਨਲ ਵੱਲੋਂ ਇਹ ਵੀ ਆਖਿਆ ਜਾ ਰਿਹਾ ਹੈ ਕਿ ਅਜਿਹੀ ਯੋਜਨਾ ਦੇ ਅਸਫਲ ਰਹਿਣ ਉੱਤੇ ਉਨ੍ਹਾਂ ਨੂੰ ਸਰਕਾਰ ਵੱਲੋਂ ਦੱਸੀ ਗਈ ਫੈਸਿਲਿਟੀ ਉੱਤੇ ਰਹਿਣਾ ਹੋਵੇਗਾ।ਪੈਨਲ ਨੇ ਆਖਿਆ ਕਿ ਮੌਜੂਦਾ ਮਾਡਲ ਵਿੱਚ ਇਹ ਦਿੱਕਤ ਹੈ ਕਿ ਕੁੱਝ ਟਰੈਵਲਰਜ਼ ਵੱਲੋਂ ਬਦਲਵਾਂ ਕੁਆਰਨਟੀਨ ਪਲੈਨ ਦੇਣ ਦੀ ਥਾਂ 3000 ਡਾਲਰ ਤੱਕ ਦਾ ਜੁਰਮਾਨਾ ਦੇਣ ਨੂੰ ਤਰਜੀਹ ਦਿੱਤੀ ਜਾ ਰਹੀ ਹੈ।ਇਸ ਦੇ ਨਾਲ ਹੀ ਹੋਟਲ ਕੁਆਰਨਟੀਨ ਪ੍ਰੋਗਰਾਮ ਨੂੰ ਮੈਨੇਜ ਕਰਨ ਦਾ ਪ੍ਰਸ਼ਾਸਕੀ ਬੋਝ ਬਹੁਤ ਜਿ਼ਆਦਾ ਹੈ।
ਇਸ ਤੋਂ ਇਲਾਵਾ ਪੈਨਲ ਵੱਲੋਂ ਜ਼ਮੀਨੀ ਤੇ ਹਵਾਈ ਮਾਪਦੰਡਾਂ ਵਿੱਚ ਫਰਕ ਦੀ ਗੱਲ ਵੀ ਕੀਤੀ ਗਈ। ਜਿਸ ਕਾਰਨ ਕੁੱਝ ਟਰੈਵਲਰਜ਼ ਹੋਟਲ ਕੁਆਰਨਟੀਨ ਤੋਂ ਬਚਣ ਲਈ ਅਮਰੀਕੀ ਏਅਰਪੋਰਟ ਉੱਤੇ ਉਤਰਦੇ ਹਨ ਤੇ ਕਾਰ ਰਾਹੀਂ ਕੈਨੇਡਾ ਆ ਜਾਂਦੇ ਹਨ। ਇਸ ਤੋਂ ਇਲਾਵਾ ਪੈਨਲ ਵੱਲੋਂ ਕਿਸੇ ਟਰੈਵਲਰ ਦੇ ਕੈਨੇਡਾ ਉਤਰਨ ਸਮੇਂ ਕੋਵਿਡ-19 ਤੇ ਇਸ ਦੇ ਹੋਰਨਾਂ ਵੇਰੀਐਂਟਸ ਦੀ ਸਕਰੀਨਿੰਗ ਜਾਰੀ ਰਹਿਣੀ ਚਾਹੀਦੀ ਹੈ ਤੇ ਪਾਜ਼ੀਟਿਵ ਆਉਣ ਵਾਲੇ ਲੋਕਾਂ ਬਾਰੇ ਲੋਕਲ ਪਬਲਿਕ ਹੈਲਥ ਅਧਿਕਾਰੀਆਂ ਨੂੰ ਜਾਣਕਾਰੀ ਦੇਣੀ ਚਾਹੀਦੀ ਹੈ।
ਇਹ ਵੀ ਆਖਿਆ ਗਿਆ ਹੈ ਕਿ ਇਸ ਸਮੇਂ ਸਰਕਾਰ ਕਿਸੇ ਦੇਸ਼ ਨਾਲ ਸਬੰਧਤ ਟਰੈਵਲਰਜ਼ ਦੀ ਟੈਸਟਿੰਗ ਜਾਂ ਕੁਆਰਨਟੀਨ ਮਾਪਦੰਡਾਂ ਨੂੰ ਲਾਗੂ ਨਹੀਂ ਕਰ ਰਹੀ। ਪਰ ਵਿਲੱਖਣ ਹਾਲਾਤ ਵਿੱਚ ਅਜਿਹਾ ਕੀਤਾ ਜਾ ਸਕਦਾ ਹੈ।ਵੈਕਸੀਨ ਸਰਟੀਫਿਕੇਟ ਜਾਂ ਪਾਸਪੋਰਟ ਬਾਰੇ ਵੀ ਜਲਦ ਫੈਸਲਾ ਕਰਨ ਦੀ ਗੱਲ ਆਖੀ ਗਈ ਹੈ। ਇਸ ਦੌਰਾਨ ਫੈਡਰਲ ਹੈਲਥ ਤੇ ਟਰਾਂਸਪੋਰਟ ਮੰਤਰੀ ਨੇ ਆਖਿਆ ਕਿ ਉਹ ਵੈਕਸੀਨ ਦੇ ਸਬੰਧ ਵਿੱਚ ਦਸਤਾਵੇਜ਼ਾਂ ਬਾਰੇ ਆਪਣੇ ਕੌਮਾਂਤਰੀ ਹਮਰੁਤਬਾ ਅਧਿਕਾਰੀਆਂ ਨਾਲ ਰਲ ਕੇ ਸਾਂਝੇ ਸਿਧਾਂਤ ਕਾਇਮ ਕਰਨ ਬਾਰੇ ਵੀ ਵਿਚਾਰ ਵਟਾਂਦਰਾ ਕਰ ਰਹੇ ਹਨ ਤੇ ਜਲਦ ਹੀ ਇਸ ਸਬੰਧੀ ਯੋਜਨਾ ਦਾ ਖੁਲਾਸਾ ਕੀਤਾ ਜਾਵੇਗਾ।
ਪੈਨਲ ਵੱਲੋਂ ਬਿਲਕੁਲ ਵੈਕਸੀਨੇਸ਼ਨ ਨਾ ਕਰਵਾਉਣ ਵਾਲਿਆਂ, ਵੈਕਸੀਨ ਦੀਆਂ ਦੋ ਡੋਜ਼ਾਂ ਵਿੱਚੋਂ ਇੱਕ ਲਵਾਉਣ ਵਾਲਿਆਂ ਤੇ ਮੁਕੰਮਲ ਟੀਕਾਕਰਣ ਕਰਵਾਉਣ ਵਾਲਿਆਂ ਲਈ ਦਿਸ਼ਾ ਨਿਰਦੇਸ਼ ਤਿਆਰ ਕੀਤੇ ਜਾ ਰਹੇ ਹਨ।