ਓਟਵਾ, 27 ਮਈ (ਪੋਸਟ ਬਿਊਰੋ) : ਪੀਪੀਈ ਤੇ ਮੈਡੀਕਲ ਡਿਵਾਇਸਿਜ਼ ਦੇ ਕਈ ਸਾਲਾਂ ਤੋਂ ਕੀਤੇ ਜਾ ਰਹੇ ਮਾੜੇ ਪ੍ਰਬੰਧਾਂ ਕਾਰਨ ਕੈਨੇਡਾ ਦੇ ਆਡੀਟਰ ਜਨਰਲ ਵੱਲੋਂ ਫੈਡਰਲ ਪਬਲਿਕ ਹੈਲਥ ਏਜੰਸੀ ਦੀ ਨੁਕਤਾਚੀਨੀ ਕੀਤੀ ਜਾ ਰਹੀ ਹੈ।
ਇੱਕ ਨਵੀਂ ਰਿਪੋਰਟ ਵਿੱਚ ਇਹ ਦਾਅਵਾ ਕੀਤਾ ਗਿਆ ਕਿ ਇਹ ਮੁੱਦੇ ਸੱਭ ਤੋਂ ਪਹਿਲਾਂ 2010 ਦੇ ਅੰਤਰਿਮ ਆਡਿਟ ਦੌਰਾਨ ਸਾਹਮਣੇ ਆਏ, ਫਿਰ 2013 ਵਿੱਚ ਇੱਕ ਵਾਰੀ ਮੁੜ ਇਸ ਦਾ ਖੁਲਾਸਾ ਹੋਇਆ।ਆਡੀਟਰ ਜਨਰਲ ਕੈਰਨ ਹੋਗਨ ਦਾ ਕਹਿਣਾ ਹੈ ਕਿ ਏਜੰਸੀ ਕੋਲ ਅਜਿਹੀ ਕੋਈ ਪ੍ਰਕਿਰਿਆ ਨਹੀਂ ਹੈ ਜਿਸ ਤੋਂ ਇਹ ਪਤਾ ਲਾਇਆ ਜਾ ਸਕੇ ਕਿ ਸਿਹਤ ਸੰਕਟ, ਜਿਵੇਂ ਕਿ ਕੋਵਿਡ-19 ਮਹਾਂਮਾਰੀ,ਖੜ੍ਹਾ ਹੋਣ ਉੱਤੇ ਕਿੰਨਾ ਮੈਡੀਕਲ ਇਕਿਉਪਮੈਂਟ ਪਿਆ ਹੈ।
ਹੋਗਨ ਨੇ ਆਖਿਆ ਕਿ ਨਾ ਹੀ ਇਸ ਮੁੱਦੇ ਵੱਲ ਗੌਰ ਕੀਤਾ ਗਿਆ ਕਿ ਆਈਟੀ ਸਿਸਟਮ ਨੂੰ ਬਿਹਤਰ ਢੰਗ ਨਾਲ ਕਿਸ ਤਰ੍ਹਾਂ ਮੈਨੇਜ ਕੀਤਾ ਜਾਵੇ। ਲੋੜ ਪੈਣ ਉੱਤੇ ਅਜਿਹੀਆਂ ਚੀਜ਼ਾਂ ਦੀ ਐਕਸਪਾਇਰੀ ਡੇਟ ਦਾ ਟਰੈਕ ਨਹੀਂ ਰੱਖਿਆ ਜਾ ਸਕਦਾ ਤੇ ਇਸ ਤਰ੍ਹਾਂ ਕੋਈ ਕਾਰਵਾਈ ਨਹੀਂ ਕੀਤੀ ਜਾ ਸਕਦੀ।ਪਰ ਨਿਉਜ਼ ਕਾਨਫਰੰਸ ਦੌਰਾਨ ਹੋਗਨ ਨੇ ਓਟਵਾ ਤੇ ਹੈਲਥ ਏਜੰਸੀਜ਼ ਦੀ ਸ਼ਲਾਘਾ ਕੀਤੀ।