ਬਰੈਂਪਟਨ, 11 ਦਸੰਬਰ (ਪੋਸਟ ਬਿਊਰੋ) : ਫਲੂ ਦੇ ਸੀਜ਼ਨ ਨੂੰ ਧਿਆਨ ਵਿੱਚ ਰੱਖਦਿਆਂ ਹੋਇਆਂ ਲੋਕਾਂ ਨੂੰ ਇਸ ਤੋਂ ਬਚਾਉਣ ਲਈ ਬਰੈਂਪਟਨ ਦੇ ਮੇਅਰ ਪੈਟ੍ਰਿਕ ਬ੍ਰਾਊਨ, ਵਿਲੀਅਮ ਓਸਲਰ ਹੈਲਥ ਸਿਸਟਮ ਦੇ ਪ੍ਰੈਜ਼ੀਡੈਂਟ ਤੇ ਸੀਈਓ ਡਾ. ਬ੍ਰੈਂਡਨ ਕਾਰ, ਸੈਂਟਰਲ ਵੈਸਟ ਲੋਕਲ ਹੈਲਥ ਇੰਟੇਗ੍ਰੇਸ਼ਨ ਨੈੱਟਵਰਕ (ਐਲਐਚਆਈਐਨ) ਦੇ ਸੀਈਓ ਸਕੌਟ ਮੈਕਲਿਓਡ ਨੇ ਕਮਰ ਕੱਸ ਲਈ ਹੈ।
ਬਰੈਂਪਟਨ ਦੇ ਮੇਅਰ ਪੈਟ੍ਰਿਕ ਬ੍ਰਾਊਨ ਨੇ ਆਖਿਆ ਕਿ ਉਨ੍ਹਾਂ ਨੂੰ ਫਲੂ ਦੀ ਰੋਕਥਾਮ ਲਈ ਚਲਾਏ ਜਾਣ ਵਾਲੇ ਪ੍ਰੋਗਰਾਮ ਦਾ ਹਿੱਸਾ ਬਣਕੇ ਖੁਸ਼ੀ ਹੋ ਰਹੀ ਹੈ। ਫਲੂ ਸਬੰਧੀ ਟੀਕਾ ਲਵਾ ਕੇ ਅਸੀਂ ਇਨਫਲੂਐਂਜ਼ਾ ਨੂੰ ਸਕੂਲਾਂ, ਕੰਮ ਵਾਲੀਆਂ ਥਾਂਵਾਂ ਤੇ ਕਮਿਊਨਿਟੀ ਵਿੱਚ ਫੈਲਣ ਤੋਂ ਰੋਕਣ ਵਿੱਚ ਮਦਦ ਕਰ ਰਹੇ ਹਾਂ। ਉਨ੍ਹਾਂ ਆਖਿਆ ਕਿ ਫਲੂ ਕਾਰਨ ਡੀਹਾਈਡ੍ਰੇਸ਼ਨ, ਕੰਨ ਦਾ ਸੰਕ੍ਰਮਣ ਤੇ ਸਾਈਨਸ ਇਨਫੈਕਸ਼ਨ ਹੋ ਸਕਦੀ ਹੈ। ਇਸ ਤੋਂ ਇਲਾਵਾ ਫਲੂ ਕਾਰਨ ਦਿਲ ਦਾ ਦੌਰਾ ਪੈ ਸਕਦਾ ਹੈ, ਦਮੇ ਦੀ ਸਿ਼ਕਾਇਤ ਵਿੱਚ ਇਜ਼ਾਫਾ ਜਾਂ ਡਾਇਬਟੀਜ਼ ਵਿੱਚ ਵਾਧਾ ਹੋ ਸਕਦਾ ਹੈ। ਇਸ ਫਲੂ ਦੇ ਖਤਰਨਾਕ ਸਿੱਟੇ ਵੀ ਨਿਕਲ ਸਕਦੇ ਹਨ।
ਹਰ ਸਾਲ ਕੈਨੇਡਾ ਵਿੱਚ ਫਲੂ ਕਾਰਨ 12000 ਲੋਕਾਂ ਨੂੰ ਹਸਪਤਾਲ ਭਰਤੀ ਕਰਵਾਇਆ ਜਾਂਦਾ ਹੈ ਤੇ 3500 ਦੇ ਨੇੜੇ ਤੇੜੇ ਲੋਕ ਇਸ ਕਾਰਨ ਮਾਰੇ ਜਾਂਦੇ ਹਨ। ਇਸ ਕਾਰਨ ਸੱਭ ਤੋਂ ਵੱਧ ਖਤਰਾ ਪੰਜ ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ, 65 ਸਾਲ ਤੋਂ ਵੱਧ ਉਮਰ ਦੇ ਬਜ਼ੁਰਗਾਂ ਤੇ ਸਿਹਤ ਸਬੰਧੀ ਨਾਜੁ਼ਕ ਹਾਲਾਤ ਨਾਲ ਜੂਝ ਰਹੇ ਲੋਕਾਂ ਨੂੰ ਹੈ। ਡਾ.ਬਰੈਂਡਨ ਕਾਰ ਨੇ ਇਸ ਮੌਕੇ ਆਖਿਆ ਕਿ ਇਸ ਸਬੰਧੀ ਟੀਕਾਕਰਣ ਫਲੂ ਸੌ਼ਟ ਤੋਂ ਕਿਤੇ ਜਿ਼ਆਦਾ ਹੈ। ਇਸ ਨਾਲ ਸਾਡੇ ਆਲੇ ਦੁਆਲੇ ਵਿਚਰਨ ਵਾਲੇ ਸਾਰੇ ਮਨੁੱਖਾਂ ਦੀ ਸਿਹਤ ਸੁਰੱਖਿਅਤ ਰਹਿ ਸਕਦੀ ਹੈ।
ਐਲਐਚਆਈਐਨ ਦੇ ਸੀਈਓ ਸਕੌਟ ਮੈਕਲਿਓਡ ਦਾ ਕਹਿਣਾ ਹੈ ਕਿ ਸੈਂਟਰਲ ਵੈਸਟ ਐਲਐਚਆਈਐਨ ਲਈ ਬੜੀ ਖੁਸ਼ੀ ਦੀ ਗੱਲ ਹੈ ਕਿ ਸਾਨੂੰ ਸਿਟੀ ਆਫ ਬਰੈਂਪਟਨ ਤੇ ਵਿਲੀਅਮ ਓਸਲਰ ਹੈਲਥ ਸਿਸਟਮ ਨਾਲ ਰਲ ਕੇ ਕੰਮ ਕਰਨ ਦਾ ਮੌਕਾ ਮਿਲਿਆ। ਫਲੂ ਵਰਗੀ ਬਿਮਾਰੀ ਦੀ ਰੋਕਥਾਮ ਲਈ ਸਾਡੇ ਕੋਲ ਟੀਕਾਕਰਣ ਵਰਗਾ ਸਾਧਨ ਹੈ।