ਵੈਨਕੂਵਰ, 11 ਦਸੰਬਰ (ਪੋਸਟ ਬਿਊਰੋ) : ਚੀਨ ਦੀ ਤਕਨਾਲੋਜੀ ਕੰਪਨੀ ਹੁਵੇਈ ਦੀ ਟੌਪ ਐਗਜ਼ੈਕਟਿਵ, ਜਿਸ ਨੂੰ ਵੈਨਕੂਵਰ ਵਿੱਚ ਗ੍ਰਿਫਤਾਰ ਕਰ ਲਿਆ ਗਿਆ ਸੀ, ਨੂੰ 10 ਮਿਲੀਅਨ ਡਾਲਰ ਦੇ ਮੁਚਲਕੇ ਉੱਤੇ ਜ਼ਮਾਨਤ ਦੇ ਦਿੱਤੀ ਗਈ ਹੈ। ਪਰ ਉਸ ਨੂੰ ਹਮੇਸ਼ਾਂ ਇਲੈਕਟ੍ਰੌਨਿਕ ਟਰੈਕਿੰਗ ਡਿਵਾਈਸ ਪਾ ਕੇ ਰੱਖਣੀ ਹੋਵੇਗੀ।
46 ਸਾਲਾ ਮੈਂਗ ਵਾਨਜ਼ੋਊ ਅਮਰੀਕਾ ਵਿੱਚ ਵਾਂਟਿਡ ਹੈ। ਉਸ ਉੱਤੇ ਦੋਸ਼ ਹਨ ਕਿ ਇਰਾਨ ਖਿਲਾਫ ਲਾਈਆਂ ਗਈਆਂ ਕੌਮਾਂਤਰੀ ਪਾਬੰਦੀਆਂ ਦੇ ਬਾਵਜੂਦ ਕੰਪਨੀ ਨੇ ਧੋਖੇ ਨਾਲ ਉੱਥੇ ਕਾਰੋਬਾਰ ਕੀਤਾ। ਬ੍ਰਿਟਿਸ਼ ਕੋਲੰਬੀਆ ਦੇ ਸੁਪਰੀਮ ਕੋਰਟ ਦੇ ਜੱਜ ਵਿਲੀਅਮ ਅਹਿਰਕੇ ਨੇ ਮੰਗਲਵਾਰ ਨੂੰ ਆਖਿਆ ਕਿ ਉਨ੍ਹਾਂ ਨੂੰ ਇਸ ਗੱਲ ਦੀ ਪੂਰੀ ਤਸੱਲੀ ਹੈ ਕਿ ਮੈਂਗ, ਜੋ ਕਿ ਪੜ੍ਹੀ ਲਿਖੀ ਕਾਰੋਬਾਰੀ ਮਹਿਲਾ ਹੈ, ਧੋਖੇ ਨਾਲ ਦੇਸ਼ ਛੱਡ ਕੇ ਨਹੀਂ ਜਾਵੇਗੀ।
ਜ਼ਮਾਨਤ ਦੇਣ ਲਈ ਉਨ੍ਹਾਂ 16 ਸ਼ਰਤਾਂ ਰੱਖੀਆਂ। ਜਿਨ੍ਹਾਂ ਵਿੱਚ ਆਖਿਆ ਗਿਆ ਕਿ ਮੈਂਗ ਰਾਤ ਦੇ 11:00 ਵਜੇ ਤੋਂ ਸਵੇਰ ਦੇ 6:00 ਵਜੇ ਤੱਕ ਆਪਣੇ ਵੈਨਕੂਵਰ ਸਥਿਤ ਘਰ ਵਿੱਚ ਹੀ ਰਹੇਗੀ ਬਸ਼ਰਤੇ ਉਸ ਨੇ ਆਪਣੇ ਬੇਲ ਸੁਪਰਵਾਈਜ਼ਰ, ਅਦਾਲਤ ਤੋਂ ਜਾਂ ਮੈਡੀਕਲ ਕਾਰਨਾਂ ਕਰਕੇ ਅਗਾਊਂ ਲਿਖਤੀ ਇਜਾਜ਼ਤ ਨਾ ਲਈ ਹੋਵੇ। ਇਸ ਤੋਂ ਇਲਾਵਾ ਮੈਂਗ ਨੂੰ ਆਪਣੇ ਦੋਵੇਂ ਪਾਸਪੋਰਟ ਤੇ ਟਰੈਵਲ ਸਬੰਧੀ ਦਸਤਾਵੇਜ਼ ਜਮ੍ਹਾਂ ਕਰਵਾਉਣ ਲਈ ਆਖਿਆ ਗਿਆ।
ਅਹਿਰਕੇ ਨੇ ਜ਼ਮਾਨਤ ਬਦਲੇ ਮੈਂਗ ਨੂੰ 10 ਮਿਲੀਅਨ ਡਾਲਰ, ਜਿਸ ਵਿੱਚੋਂ 7.5 ਮਿਲੀਅਨ ਡਾਲਰ ਨਕਦ ਹੋਣ ਦੀ ਸ਼ਰਤ ਰੱਖੀ ਗਈ, ਜਮ੍ਹਾਂ ਕਰਵਾਉਣ ਲਈ ਆਖਿਆ। ਹੁਵੇਈ ਦੀ ਚੀਫ ਫਾਇਨਾਂਸ਼ੀਅਲ ਅਧਿਕਾਰੀ ਨੂੰ ਜੱਜ ਵੱਲੋਂ ਜ਼ਮਾਨਤ ਦੇਣ ਲਈ ਸਹਿਮਤੀ ਦੇਣ ਮਗਰੋਂ ਮੈਂਗ ਦੇ ਸਮਰਥਕ ਖੁਸ਼ੀ ਵਿੱਚ ਖੀਵੇ ਹੋ ਗਏ।
ਜਿ਼ਕਰਯੋਗ ਹੈ ਕਿ ਮੈਂਗ ਨੂੰ ਵਾਰੰਟ ਉੱਤੇ ਇਸ ਲਈ ਗ੍ਰਿਫਤਾਰ ਕੀਤਾ ਗਿਆ ਕਿਉਂਕਿ ਉਸ ਉੱਤੇ ਦੋਸ਼ ਸੀ ਕਿ ਉਸ ਨੇ ਫਰਾਡ ਕੀਤਾ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਹੁਵੇਈ ਨੇ 2009 ਤੇ 2014 ਦਰਮਿਆਨ ਕੌਮਾਂਤਰੀ ਪਾਬੰਦੀਆਂ ਦੀ ਉਲੰਘਣਾ ਕਰਦਿਆਂ ਆਪਣੀ ਗੈਰਸਰਕਾਰੀ ਸਬਸਿਡਰੀ ਸਕਾਇਕੌਮ ਦੀ ਵਰਤੋਂ ਕਰਕੇ ਇਰਾਨ ਦੀਆਂ ਟੈਲੀਕਮਿਊਨਿਕੇਸ਼ਨਜ਼ ਕੰਪਨੀਆਂ ਨਾਲ ਕਾਰੋਬਾਰ ਕੀਤਾ। ਆਪਣੇ ਵਕੀਲ ਰਾਹੀਂ ਮੈਂਗ ਨੇ ਅਦਾਲਤ ਵਿੱਚ ਇਨ੍ਹਾਂ ਦੋਸ਼ਾਂ ਤੋਂ ਇਨਕਾਰ ਕੀਤਾ। ਮੈਂਗ ਦੀ ਰਿਹਾਈ ਤੋਂ ਬਾਅਦ ਹੁਵੇਈ ਵੱਲੋਂ ਜਾਰੀ ਬਿਆਨ ਵਿੱਚ ਆਖਿਆ ਗਿਆ ਕਿ ਉਨ੍ਹਾਂ ਨੂੰ ਕੈਨੇਡਾ ਤੇ ਅਮਰੀਕਾ ਦੇ ਨਿਆਂ ਸਿਸਟਮ ਵਿੱਚ ਪੂਰਾ ਭਰੋਸਾ ਹੈ।