ਲਾਹੌਰ, 8 ਮਈ (ਪੋਸਟ ਬਿਊਰੋ)- ਪਾਕਿਸਤਾਨ ਦੀ ਰਾਜਧਾਨੀ ਇਸਲਾਮਾਬਾਦ ਵਿੱਚ ਪਾਕਿਸਤਾਨ ਸਰਕਾਰ ਦੀ ਮਦਦ ਨਾਲ ਬਣਨ ਵਾਲੇ ਸ਼੍ਰੀ ਕ੍ਰਿਸ਼ਨ ਮੰਦਰ ਬਾਰੇ ਜਿੱਥੇ ਪਾਕਿਸਤਾਨ ਹਿੰਦੂ ਪੰਚਾਇਤ ਨੇ ਨਾਅਰਾ ਦਿੱਤਾ ਹੈ ਕਿ ‘ਮੰਦਰ ਇੱਥੇ ਹੀ ਬਣਾਇਆ ਜਾਵੇ', ਉਥੇ ਮੁਸਲਿਮ ਕੱਟਣਪੰਥੀਆਂ ਨੇ ਇਹ ਨਾਅਰਾ ਦੇ ਦਿੱਤਾ ਹੈ ਕਿ ‘ਪਾਕਿਸਤਾਨ ਵਿੱਚ ਕੋਈ ਨਵਾਂ ਮੰਦਰ ਨਹੀਂ ਬਣੇਗਾ।' ਇਸ ਵਿਵਾਦ ਦੇ ਕਾਰਨ ਇਸਲਾਮਾਬਾਦ ਵਿੱਚ ਇਸ ਇਤਿਹਾਸਕ ਮੰਦਰ ਦੇ ਬਣਨ ਦਾ ਕੰਮ ਸ਼ੁਰੂ ਹੁੰਦਾ ਦਿਖਾਈ ਨਹੀਂ ਦਿੰਦਾ, ਜਦਕਿ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਨੇ ਇਹ ਮੰਦਰ ਬਣਾਉਣ ਲਈ 10 ਕਰੋੜ ਰੁਪਏ ਦੇਣ ਦਾ ਬੀਤੇ ਸਾਲ ਐਲਾਨ ਕੀਤਾ ਅਤੇ ਸੰਸਾਰ ਭਰ ਵਿੱਚ ਸ਼ਲਾਘਾ ਹਾਸਲ ਕੀਤੀ ਸੀ।
ਪਤਾ ਲੱਗਾ ਹੈ ਕਿ ਇਸਲਾਮਾਬਾਦ ਵਿੱਚਜਾਮੀਆ ਅਸਰਾਫੀਆਂ ਮਦਰੱਸੇ ਦੇ ਮੌਲਵੀ ਨੇ ਬੀਤੇ ਦਿਨੀਂ ਫਤਵਾ ਜਾਰੀ ਕਰ ਕੇ ਐਲਾਨ ਕੀਤਾ ਹੈ ਕਿ ਪਾਕਿਸਤਾਨ ਵਿੱਚ ਸ਼ਰੀਅਤ ਕਾਨੂੰਨ ਅਨੁਸਾਰ ਕੋਈ ਨਵਾਂ ਮੰਦਰ ਨਹੀਂ ਬਣ ਸਕਦਾ। ਜਿੱਥੇ ਜ਼ਰੂਰੀ ਹੋਵੇ, ਉਥੇ ਮੰਦਰ ਦੀ ਮੁਰੰਮਤ ਹੋ ਸਕਦੀ ਹੈ। ਇਸ ਵਿਵਾਦ ਨਾਲ ਇਸਲਾਮਾਬਾਦ ਵਿੱਚ ਸ਼੍ਰੀ ਕ੍ਰਿਸ਼ਨ ਮੰਦਰ ਦੇ ਬਣਨ ਦੀ ਗੱਲ ਤਾਂ ਦੂਰ, ਉਸਾਰੀ ਸ਼ੁਰੂ ਕਰਨ ਉੱਤੇ ਵੀ ਪ੍ਰਸ਼ਨ ਚਿੰਨ੍ਹ ਲੱਗ ਗਿਆ ਹੈ। ਜਾਣਕਾਰ ਸੂਤਰਾਂ ਅਨੁਸਾਰ ਮੁਸਲਿਮ ਕੱਟੜਪੰਥੀਆਂ ਨੇ ਐਲਾਨ ਕੀਤਾ ਹੈ ਕਿ ਅੱਗੇ ਤੋਂ ਪਾਕਿਸਤਾਨ ਵਿੱਚ ਨਵਾਂ ਕੋਈ ਮੰਦਰ, ਗੁਰਦੁਆਰਾ ਤੇ ਚਰਚ ਨਹੀਂ ਬਣਨ ਦਿਆਂਗੇ। ਉਨ੍ਹਾਂ ਨੇਇਹ ਵੀ ਕਿਹਾ ਕਿ ਸਰਕਾਰ ਦੀ ਰਕਮ ਵੀ ਕਿਸੇ ਗੈਰ-ਮੁਸਲਿਮ ਧਾਰਮਿਕ ਸਥਾਨ ਨੂੰ ਨਹੀਂ ਦੇਣ ਦਿਆਂਗੇ, ਕਿਉਂਕਿ ਸਰਕਾਰ ਕੋਲ ਜੋ ਫੰਡ ਹੈ, ਉਹ ਮੁਸਲਿਮ ਲੋਕਾਂ ਤੋਂ ਲਏ ਟੈਕਸ ਦਾ ਹਿੱਸਾ ਹੈ ਅਤੇ ਇਸ ਉੱਤੇ ਕੇਵਲ ਮੁਸਲਿਮਾਂ ਦਾ ਅਧਿਕਾਰ ਹੈ। ਦੂਜੇ ਪਾਸੇ ਪਾਕਿਸਤਾਨ ਹਿੰਦੂ ਪੰਚਾਇਤ ਦੇ ਨੇਤਾ ਡਾ. ਰਮੇਸ਼ ਬਿਕਵਾਨੀ, ਜੋ ਇਸ ਸਮੇਂ ਸੱਤਾਧਾਰੀ ਪਾਰਟੀ ਦੇ ਨੇਤਾ ਹਨ, ਨੇ ਐਲਾਨ ਕੀਤਾ ਹੈ ਕਿ ਇਸਲਾਮਾਬਾਦ ਵਿੱਚ ਮੰਦਰ ਬਣ ਕੇ ਰਹੇਗਾ। ਜੇ ਸਰਕਾਰ ਪੈਸਾ ਨਾ ਦੇਵੇਗੀ ਤਾਂ ਹਿੰਦੂ ਇਹ ਮੰਦਰ ਬਣਾ ਲੈਣਗੇ। ਇਸਲਾਮਾਬਾਦ ਵਿੱਚ ਅਸੀਂ ਲਗੱਭਗ 3000 ਪਰਵਾਰ ਹਾਂ ਅਤੇ ਸਾਨੂੰ ਪੂਜਾ-ਪਾਠ ਕਰਨ ਲਈ ਧਾਰਮਿਕ ਸਥਾਨ ਦੀ ਲੋੜ ਹੈ, ਇਸ ਲਈ ਮੰਦਰ ਬਣ ਕੇ ਰਹੇਗਾ।ਬਿਕਵਾਨੀ ਨੇ ਕਿਹਾ ਕਿ ਪਾਕਿਸਤਾਨ ਵਿੱਚ ਕੇਵਲ ਮੁਸਲਿਮ ਹੀ ਟੈਕਸ ਨਹੀਂ ਦਿੰਦੇ, ਗੈਰ-ਮੁਸਲਿਮ ਵੀ ਦਿੰਦੇ ਹਨ।