ਅੰਮ੍ਰਿਤਸਰ, 8 ਮਈ (ਪੋਸਟ ਬਿਊਰੋ)- ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਹੇਠਲੇ ਗੁਰਦੁਆਰਾ ਸ੍ਰੀ ਰਾਮਸਰ ਸਾਹਿਬ ਵਿਖੇ ਅੱਗ ਲੱਗਣ ਪਿੱਛੋਂ 328 ਸਰੂਪ ਗਾਇਬ ਹੋਣ ਦੀ ਜਾਂਚ ਲਈ ਅਕਾਲੀ ਦਲ ਅੰਮ੍ਰਿਤਸਰ ਨੇ ਸਿੱਖ ਗੁਰਦੁਆਰਾ ਜੁਡੀਸ਼ਲ ਕਮਿਸ਼ਨ ਵਿਖੇ ਜੱਜ ਸਤਨਾਮ ਸਿੰਘ ਕਲੇਰ ਦੀ ਅਦਾਲਤ ਵਿੱਚ ਪਹੁੰਚ ਕੀਤੀ ਹੈ।
ਕੋਰਟ ਤੋਂ ਬਾਹਰ ਆ ਕੇ ਈਮਾਨ ਸਿੰਘ ਮਾਨ, ਜਸਕਰਨ ਸਿੰਘ ਕਾਹਨ ਸਿੰਘ ਵਾਲਾ ਅਤੇ ਹੋਰਨਾਂ ਨੇ ਕਿਹਾ ਕਿ ਜੋ ਕੰਮ ਸਿੱਖਾਂ ਦੀ ਸਰਬ ਉਚ ਸੰਸਥਾ ਸ਼੍ਰੋਮਣੀ ਕਮੇਟੀ ਨੂੰ ਕਰਨਾ ਚਾਹੀਦਾ ਸੀ, ਜਦ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਦਾ ਇਨਸਾਫ ਨਹੀਂ ਮਿਲਿਆ ਤਾਂ ਅਕਾਲੀ ਦਲ ਅੰਮ੍ਰਿਤਸਰ ਨੂੰ ਜੁਡੀਸ਼ਲ ਕਮਿਸ਼ਨਵਿੱਚ ਜਾਣਾ ਪਿਆ ਹੈ।ਉਨ੍ਹਾਂ ਕਿਹਾ ਕਿ ਇਹ ਸਿਲਸਿਲਾ 1984 ਸਮੇਂ ਤੋਸ਼ੇਖਾਨੇ ਵਿੱਚੋਂ ਸਿੱਖ ਜਗਤ ਦੀਆਂ ਇਤਿਹਾਸਕ ਵਸਤਾਂ ਚੁੱਕੇ ਜਾਣ ਅਤੇ ਵਾਪਸ ਨਾ ਮਿਲਣ ਤੋਂ ਸ਼ੁਰੂ ਹੋਇਆ ਸੀ। ਸਿੱਖ ਕੌਮ ਹਮਲਿਆਂ ਦਾ ਪੂਰਾ ਟਾਕਰਾ ਨਾ ਕਰ ਸਕੀ, ਜਿਸ ਕਾਰਨ ਹਾਲੇ ਤੱਕ ਨਾ ਨਕੋਦਰ ਕਾਂਡ, ਨਾ ਬਰਗਾੜੀ, ਬਹਿਬਲ ਕਲਾਂ ਤੇ ਨਾ ਜਗ੍ਹਾ-ਜਗ੍ਹਾ ਹੋਈ ਸ੍ਰੀ ਗੁਰੁੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਤੇ ਸ਼੍ਰੋਮਣੀ ਕਮੇਟੀ ਵੱਲੋਂ ਗਾਇਬ ਕੀਤੇ ਗਏ 328 ਪਾਵਨ ਸਰੂਪਾਂ ਦੇ ਕੇਸਾਂ ਵਿੱਚ ਇਨਸਾਫ਼ ਮਿਲਿਆ ਹੈ।
ਉਨ੍ਹਾਂ ਕਿਹਾ ਕਿ ਗੁਰਦੁਆਰਾ ਜੁਡੀਸ਼ਲ ਕਮਿਸ਼ਨ ਦਾ ਕੋਰਮ ਪੂਰਾ ਨਾ ਹੋਣ ਕਾਰਨ ਅਗਲੀ ਤਾਰੀਖ 28 ਮਈ ਨੂੰ ਹੈ। ਐਡਵੋਕੇਟ ਨਵਪ੍ਰੀਤ ਸਿੰਘ ਮੰਨਣ ਨੇ ਕਿਹਾ ਕਿ ਕਾਗਜ਼ ਪੱਤਰ ਸੌਂਪ ਕੇ ਸਾਰਾ ਕੇਸ ਜੱਜ ਸਤਨਾਮ ਸਿੰਘ ਕਲੇਰ ਨਾਲ ਡਿਸਕਸ ਕੀਤਾ ਗਿਆ ਤਾਂ ਉਨ੍ਹਾਂ ਨੇ ਪ੍ਰਵਾਨ ਕਰ ਲਿਆ ਹੈ, ਪਰ ਅਜਿਹੇ ਕੇਸਾਂ ਵਿੱਚ ਦੋ ਜੱਜਾਂ ਦਾ ਪੈਨਲ ਬੈਠਦਾ ਹੈ ਅਤੇ ਅੱਜ ਕੋਰਟ ਵਿਖੇ ਸਿਰਫ਼ ਇੱਕੋ ਜੱਜ ਸੀ। ਇਸਦੇ ਇਲਾਵਾ ਉਨ੍ਹਾਂ ਦੀ ਸਟੈਨੋ ਕੋਰੋਨਾ ਦੇ ਕਾਰਨ ਕੁਆਰੰਟਾਈਨ ਹੈ, ਜਿਸ ਦਾ ਸਮਾਂ 14 ਦਿਨਾਂ ਹੈ। ਜੱਜ ਸਾਹਿਬ ਨੇ ਅਗਲੀ ਤਾਰੀਖ 28 ਮਈ ਦੀ ਦਿੱਤੀ ਹੈ।