ਹਾਲਟਨ, 7 ਮਈ (ਪੋਸਟ ਬਿਊਰੋ) : ਹਾਲਟਨ ਰੀਜਨ ਦੇ ਯੰਗ ਰੈਜ਼ੀਡੈਂਟਸ ਨੂੰ ਵੀ ਹੁਣ ਸੰਭਾਵੀ ਤੌਰ ਉੱਤੇ 19 ਮਈ ਤੋਂ ਕੋਵਿਡ-19 ਵੈਕਸੀਨ ਦੇ ਸ਼ੌਟ ਹਾਸਲ ਹੋ ਜਾਣਗੇ।
ਵੀਰਵਾਰ ਨੂੰ ਪਬਲਿਕ ਹੈਲਥ ਯੂਨਿਟ ਨੇ ਆਖਿਆ ਕਿ ਹਾਲਟਨ ਰੀਜਨ ਵਿੱਚ ਹੁਣ ਕਿਸੇ ਵੀ ਪੋਸਟਲ ਕੋਡ ਨਾਲ ਸਬੰਧਤ 16 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਯੰਗ ਰੈਜ਼ੀਡੈਂਟਸ ਨੂੰ ਵੀ ਵੈਕਸੀਨ ਲਾਉਣ ਦਾ ਕੰਮ ਬੁੱਧਵਾਰ 19 ਮਈ ਤੋਂ ਸੁ਼ਰੂ ਕਰ ਦਿੱਤਾ ਜਾਵੇਗਾ। ਇਹ ਵੀ ਆਖਿਆ ਗਿਆ ਹੈ ਕਿ ਇਹ ਸੱਭ ਵੈਕਸੀਨ ਦੀ ਸਪਲਾਈ ਉੱਤੇ ਹੀ ਨਿਰਭਰ ਕਰੇਗਾ। ਹਾਲਟਨ ਰੀਜਨ ਵਿੱਚ 10 ਮਈ, ਦਿਨ ਸੋਮਵਾਰ ਤੋਂ 16 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਉਨ੍ਹਾਂ ਲੋਕਾਂ ਲਈ ਵੀ ਵੈਕਸੀਨ ਅਪੁਆਇੰਟਮੈਂਟਸ ਸ਼ੁਰੂ ਕੀਤੀਆਂ ਜਾਣਗੀਆਂ ਜਿਹੜੇ ਘਰ ਤੋਂ ਕੰਮ ਨਹੀਂ ਕਰ ਸਕਦੇ।
ਲੋਕਲ ਪਬਲਿਕ ਹੈਲਥ ਦੇ ਅੰਕੜਿਆਂ ਮੁਤਾਬਕ ਘਰ ਤੋਂ ਬਾਹਰ ਰਹਿ ਕੇ ਕੰਮ ਕਰਨ ਵਾਲਿਆਂ ਨੂੰ ਕੋਵਿਡ-19 ਹੋਣ ਦੀ ਸੰਭਾਵਨਾ ਜਿ਼ਆਦਾ ਹੈ ਤੇ ਇਸ ਦੇ ਨਾਲ ਹੀ ਵਧੇਰੇ ਉਮਰ ਦੇ ਲੋਕ ਵੀ ਇਸ ਗੰਭੀਰ ਵਾਇਰਸ ਦਾ ਸਹਿਜੇ ਸਿ਼ਕਾਰ ਹੋ ਸਕਦੇ ਹਨ ਤੇ ਉਨ੍ਹਾਂ ਨੂੰ ਹਸਪਤਾਲ ਭਰਤੀ ਕਰਵਾਉਣਾ ਪੈ ਸਕਦਾ ਹੈ ਤੇ ਇੱਥੋਂ ਤੱਕ ਕਿ ਉਨ੍ਹਾਂ ਦੀ ਮੌਤ ਵੀ ਹੋ ਸਕਦੀ ਹੈ। ਰੀਜਨ ਵੱਲੋਂ 40 ਤੇ ਇਸ ਤੋਂ ਵੱਧ ਉਮਰ ਦੇ ਨਾਲ ਨਾਲ 50 ਤੇ ਇਸ ਤੋਂ ਵੱਧ ਉਮਰ ਦੇ ਉਨ੍ਹਾਂ ਲੋਕਾਂ ਦੀਆਂ ਅਪੁਆਇੰਟਮੈਂਟਸ ਵੀ ਲਈਆਂ ਜਾ ਰਹੀਆਂ ਹਨ ਜਿਹੜੇ ਘਰੇ ਰਹਿ ਕੇ ਕੰਮ ਨਹੀਂ ਕਰ ਸਕਦੇ।
ਆਉਣ ਵਾਲੇ ਹਫਤਿਆਂ ਵਿੱਚ ਵੈਕਸੀਨ ਦੀ ਉਪਲਬਧਤਾ ਨੂੰ ਵੇਖਦਿਆਂ ਹੋਇਆਂ ਰੀਜਨ ਵੱਲੋਂ 12 ਮਈ ਤੋਂ 40 + ਤੇ 14 ਮਈ ਤੋਂ 30 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਨੂੰ ਵੈਕਸੀਨੇਟ ਕਰਨ ਦੀ ਯੋਜਨਾ ਵੀ ਹੈ। ਹਾਲਟਨ ਰੀਜਨ ਮੈਡੀਕਲ ਆਫੀਸਰ ਆਫ ਹੈਲਥ ਡਾ· ਹਮੀਦਾਹ ਮਘਾਨੀ ਨੇ ਆਖਿਆ ਕਿ ਵਧੇਰੇ ਰੈਜ਼ੀਡੈਂਟਸ ਲਈ ਅਪੁਆਇੰਟਮੈਂਟਸ ਖੋਲ੍ਹਣ ਨਾਲ ਟਰਾਂਸਮਿਸ਼ਨ, ਗੰਭੀਰ ਬਿਮਾਰੀ ਤੇ ਮੌਤ ਦਾ ਖਤਰਾ ਘਟੇਗਾ ਤੇ ਅਸੀਂ ਕਮਿਊਨਿਟੀ ਦੀ ਪ੍ਰੋਟੈਕਸ਼ਨ ਵੱਲ ਵਧਾਂਗੇ।