ਮਿਲਟਨ, 10 ਦਸੰਬਰ (ਪੋਸਟ ਬਿਊਰੋ)- ਕੱਲ੍ਹ ਟਾਈਗਰਜੀਤ ਸਿੰਘ ਨੇ ਆਪਣੇ ਸ਼ਹਿਰ ਮਿਲਟਨ ਵਿਖੇ ਆਪਣਾ ਸਲਾਨਾ ਦਸਵਾਂ ਸਮਾਗਮ ‘ਮਿਰੇਕਲ ਆਨ ਮੇਨ’ ਆਯੋਜਿਤ ਕੀਤਾ। ਇਹ ਪ੍ਰੋਗਰਾਮ ਸਵੇਰੇ 6:30 ਵਜੇ ਤੋਂ ਲੈ ਕੇ 9:30 ਵਜੇ ਤੱਕ ਹੁੰਦਾ ਹੈ। ਇਸ ਵਿਚ ਮਿਲਟਨ ਤੇ ਆਸਪਾਸ ਦੇ ਸਕੂਲਾਂ ਦੇ ਬੱਚੇ ਤੇ ਆਮ ਲੋਕ ਭਾਗ ਲੈਂਦੇ ਹਨ। ਕੱਲ੍ਹ ਸਵੇਰੇ 6 ਵਜੇ ਹੀ ਲੋਕ ਆਉਣੇ ਸ਼ੁਰੂ ਹੋ ਗਏ ਤੇ 7:30 ਵਜੇ ਤੱਕ ਦੂਰ-ਦੂਰ ਤੱਕ ਲੋਕ ਤੇ ਬੱਚੇ ਨਜ਼ਰ ਆ ਰਹੇ ਸਨ।
ਟਾਈਗਰਜੀਤ ਸਿੰਘ ਫਾਊਡੇਸ਼ਨ ਵਲੋਂ ਇਸ ਮੌਕੇ ਇਕੱਤਰ ਕੀਤੇ ਗਏ 50 ਹਜ਼ਾਰ ਡਾਲਰ ਦੇ ਖਿਡਾਉਣੇ ਬੱਚਿਆਂ ਵਿਚ ਵੰਡੇ ਗਏ। ਇਸ ਸਮਾਗਮ ਵਿਚ ਕੈਨੇਡਾ ਦੇ ਆਫੀਸ਼ੀਅਲ ਆਪੋਜਿਸ਼ਨ ਲੀਡਰ ਐਡਰਿਊ ਸ਼ੀਅਰ ਨੇ ਉਚੇਚੇ ਤੌਰ `ਤੇ ਭਾਗ ਲਿਆ ਤੇ ਉਨ੍ਹਾਂ ਨਾਲ ਡਿਪਟੀ ਲੀਡਰ ਲੀਸਾ ਰੇਟ ਵੀ ਸ਼ਾਮਲ ਸੀ। ਜੂਨੀਅਰ ਟਾਈਗਰ ਅਲੀ ਸਿੰਘ ਨੇ ਸਾਡੇ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਸ ਵਾਰ ਵੱਡੀਆਂ-ਵੱਡੀਆਂ ਕਾਰਪੋਰੇਸ਼ਨਾਂ ਨੇ ਇਸ ਸਮਾਗਮ ਨੂੰ ਸਪਾਂਸਰ ਕੀਤਾ। ਜਿਸ ਸਦਕਾ 6 ਲੱਖ ਤੋਂ ਉਪਰ ਫੰਡਜ਼ ਇਕੱਤਰ ਕੀਤੇ ਗਏ। ਜਿਹੜੇ ਕਿ ਵੱਖ-ਵੱਖ ਚੈਰੀਟੀਆਂ `ਚ ਵੰਡੇ ਜਾਣਗੇ।
ਟਾਈਗਰਜੀਤ ਸਿੰਘ ਨੇ ਸਭ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਇਹ ਸਭ ਕੁੱਝ ਪ੍ਰਮਾਤਮਾ ਦੀ ਮਿਹਰ ਸਦਕਾ ਹੀ ਹੋ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਸੋਮਵਾਰ ਦੀ ਸਵੇਰ ਨੂੰ ਇੰਨੀ ਠੰਢ `ਚ ਕੌਣ ਚੱਲ ਕੇ ਆਉਦਾ ਹੈ ਤੇ ਅੱਜ ਮਿਲਟਨ ਵਿਚ ਜਿਸ ਪਾਸੇ ਨਜ਼ਰ ਮਾਰਦੇ ਹਾਂ ਤਾਂ ਲੋਕਾਂ ਵਿਚ ਇਸ ਈਵੈਂਟ ਨੂੰ ਮਨਾਉਣ ਲਈ ਪੂਰਨ ਉਤਸ਼ਾਹ ਦੇਖਿਆ ਜਾ ਰਿਹਾ ਹੈ। ਉਨ੍ਹਾਂ ਮਿਲਟਨ ਦੇ ਮੇਅਰ, ਹਾਲਟਨ ਰੀਜ਼ਨਲ ਪੁਲਸ ਤੇ ਮਿਲਟਨ ਫਾਇਰ ਡਿਪਾਰਟਮੈਟ ਦਾ ਇਸ ਪ੍ਰੋਗਰਾਮ ਨੂੰ ਕਾਮਯਾਬ ਕਰਨ ਲਈ ਵਿਸ਼ੇਸ਼ ਤੌਰ `ਤੇ ਧੰਨਵਾਦ ਕੀਤਾ। ਟਾਈਗਰਜੀਤ ਸਿੰਘ ਨੇ ਦੱਸਿਆ ਕਿ ਇਹ ਸਾਰਾ ਪੈਸਾ ਆਉਣ ਵਾਲੇ ਦਿਨਾਂ ਵਿਚ ਵੱਖ-ਵੱਖ ਚੈਰੀਟੇਬਲ ਸੰਸਥਾਵਾਂ ਨੂੰ ਤਕਸੀਮ ਕਰ ਦਿੱਤਾ ਜਾਵੇਗਾ।