ਪਟਨਾ, 10 ਦਸੰਬਰ (ਪੋਸਟ ਬਿਊਰੋ)- ਬਿਹਾਰ ਦੇ ਇੱਕ ਰਿਟਾਇਰਡ ਆਈ ਜੀ ਉਮਾ ਸ਼ੰਕਰ ਸੁਧਾਂਸ਼ੂ ਦੀ ਧੀ ਡਾਕਟਰ ਸਨਿਗਧਾ ਨੇ ਕੱਲ੍ਹ ਪਟਨਾ ਵਿੱਚ ਇੱਕ ਅਪਾਰਟਮੈਂਟ ਦੀ ਛੱਤ ਤੋਂ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ। ਪੇਸ਼ੇ ਤੋਂ ਡਾਕਟਰ ਸਨਿਗਧਾ ਦਾ ਵਿਆਹ ਅਗਲੇ ਦਿਨ ਕਿਸ਼ਨਗੰਜ ਦੇ ਜ਼ਿਲ੍ਹਾ ਮੈਜਿਸਟਰੇਟ (ਡੀ ਐੱਮ) ਮਹਿੰਦਰ ਕੁਮਾਰ ਨਾਲ ਹੋਣਾ ਤੈਅ ਸੀ। ਸ਼ਨੀਵਾਰ ਨੂੰ ਸਨਿਗਧਾ ਅਤੇ ਮਹਿੰਦਰ ਕੁਮਾਰ ਦੀ ਮੰਗਣੀ ਹੋਈ ਸੀ।
ਸਨਿਗਧਾ ਕੋਲਕਾਤਾ ਦੇ ਇੱਕ ਮੈਡੀਕਲ ਕਾਲਜ ਤੋਂ ਪੋਸਟ ਗ੍ਰੈਜੂਏਟ ਦੀ ਸਟੂਡੈਂਟ ਸੀ। ਪੁਲਸ ਅਨੁਸਾਰ ਪਟਨਾ ਦੇ ਪਟੇਲਨਗਰ ਵਿੱਚ ਰਹਿ ਰਹੇ ਸਾਬਕਾ ਆਈ ਜੀ ਉਮਾ ਸ਼ੰਕਰ ਸੁਧਾਂਸ਼ੂ ਦੀ ਧੀ ਸਨਿਗਧਾ ਸਵੇਰੇ ਡਰਾਈਵਰ ਦੇ ਨਾਲ ਕਾਰ ਉੱਤੇ ਕੋਤਵਾਲੀ ਖੇਤਰ ਵਿੱਚ ਮਿਊਜ਼ੀਅਮ ਦੇ ਸਾਹਮਣੇ ਉਦੈਗਿਰੀ ਅਪਾਰਟਮੈਂਟ ਪਹੁੰਚੀ। ਇਥੇ ਉਸ ਦੀ ਭੈਣ ਰਹਿੰਦੀ ਹੈ। ਸਨਿਗਧਾ ਭੈਣ ਦੇ ਘਰ ਨਾ ਜਾ ਕੇ ਅਪਾਰਟਮੈਂਟ ਦੀ 14ਵੀਂ ਮੰਜ਼ਿਲ ਉਤੇ ਗਈ ਅਤੇ ਉਥੋਂ ਛਾਲ ਮਾਰ ਦਿੱਤੀ। ਐੱਸ ਐੱਸ ਪੀ ਮਨੂ ਮਹਾਰਾਜ ਨੇ ਦੱਸਿਆ ਕਿ ਮਾਮਲਾ ਖੁਦਕੁਸ਼ੀ ਦਾ ਲੱਗਦਾ ਹੈ। ਛੱਤ ਤੋਂ ਇੱਕ ਮੋਬਾਈਲ ਫੋਨ ਮਿਲਿਆ ਹੈ, ਪਰ ਕੋਈ ਸੁਸਾਈਡ ਨੋਟ ਨਹੀਂ ਮਿਲਿਆ। ਪਰਵਾਰ ਸਦਮੇ ਵਿੱਚ ਹੈ, ਇਸ ਲਈ ਪੁਲਸ ਨੇ ਸਾਰੇ ਇਸ ਬਾਰੇ ਵਿੱਚ ਕੋਈ ਪੁੱਛਗਿੱਛ ਨਹੀਂ ਕੀਤੀ ਹੈ। ਸੁਧਾਂਸ਼ੂ ਬਿਹਾਰ ਦੇ ਰੋਹਤਾਸ ਜ਼ਿਲ੍ਹੇ ਦੇ ਦਿਨਾਰਾ ਦੇ ਮੂਲ ਵਾਸੀ ਹਨ।