ਪਟਨਾ, 10 ਦਸੰਬਰ (ਪੋਸਟ ਬਿਊਰੋ)- ਬਿਹਾਰ ਦੀ ਰਾਜਧਾਨੀ ਪਟਨਾ ਦੀ ਇਕ ਫਾਸਟ ਟਰੈਕ ਅਦਾਲਤ ਨੇ ਜਹਾਨਾਬਾਦ ਜ਼ਿਲੇ ਦੇ ਬਹੁ ਚਰਚਿਤ ਐਡੀਸ਼ਨਲ ਪਬਲਿਕ ਪ੍ਰੋਸਟੀਕਿਊਟਰ (ਸਰਕਾਰੀ ਵਕੀਲ) ਦੇ ਕਤਲ ਕੇਸ ਵਿਚ ਸੋਮਵਾਰ ਨੂੰ ਚਾਰ ਜਣਿਆਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਅਦਾਲਤ ਨੇ ਇਸ ਦੀ ਸੁਣਵਾਈ ਪਿੱਛੋਂ ਜਹਾਨਾਬਾਦ ਜ਼ਿਲੇ ਦੇ ਕਾਕੋ ਥਾਣਾ ਦੇ ਅਜੇ ਯਾਦਵ, ਬਲਬੀਰ ਯਾਦਵ, ਦਿਨੇਸ਼ ਯਾਦਵ ਅਤੇ ਉਸੇ ਜ਼ਿਲੇ ਦੇ ਘੋਸੀ ਥਾਣਾ ਖੇਤਰ ਦੇ ਸਤੇਂਦਰ ਯਾਦਵ ਨੂੰ ਸਰਕਾਰੀ ਵਕੀਲ ਦੀਨਦਿਆਲ ਯਾਦਵ ਨੂੰ ਗੋਲੀ ਮਾਰ ਕੇ ਮਾਰਨ ਦੇ ਮੰਨ ਕੇ ਇਹ ਸਜ਼ਾ ਸੁਣਾਈ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਪਟਨਾ ਹਾਈ ਕੋਰਟ ਦੇ ਆਦੇਸ਼ ਨਾਲ ਇਸ ਕੇਸ ਦੀ ਸੁਣਵਾਈ ਰਾਜਧਾਨੀ ਪਟਨਾ ਦੀ ਫਾਸਟ ਟਰੈਕ ਕੋਰਟ `ਚ ਕੀਤੀ ਜਾ ਰਹੀ ਸੀ। ਲਾਏ ਗਏ ਦੋਸ਼ ਅਨੁਸਾਰ 24 ਦਸੰਬਰ 2007 ਨੂੰ ਜਹਾਨਾਬਾਦ ਜ਼ਿਲੇ ਦੇ ਮਖਦੂਮਪੁਰ ਥਾਣੇ ਖੇਤਰ `ਚ ਸਰਕਾਰੀ ਵਕੀਲ ਦੀਨਦਿਆਲ ਯਾਦਵ ਦੀ ਦੋਸ਼ੀਆਂ ਨੇ ਇਕ ਅਪਰਾਧਕ ਯੋਜਨਾ ਦੇ ਅਧੀਨ ਗੋਲੀ ਮਾਰ ਕੇ ਉਸ ਸਮੇਂ ਹੱਤਿਆ ਕਰ ਦਿੱਤੀ, ਜਦੋਂ ਉਹ ਅਦਾਲਤ ਤੋਂ ਕੰਮ ਨਿਪਟਾ ਕੇ ਘਰ ਵਾਪਸ ਜਾ ਰਹੇ ਸਨ। ਇਸ ਘਟਨਾ ਦਾ ਕਾਰਨ ਦੱਸਿਆ ਗਿਆ ਕਿ ਵਕੀਲ ਦੀਨ ਦਿਆਲ ਯਾਦਵ ਇਕ ਕੇਸ ਵਿੱਚ ਪੀੜਤ ਦੇ ਵਕੀਲ ਸਨ ਅਤੇ ਉਨ੍ਹਾਂ ਨੂੰ ਮੁਕੱਦਮਾ ਛੱਡਣ ਦੀ ਧਮਕੀ ਦਿੱਤੀ ਜਾ ਰਹੀ ਸੀ, ਜਿਸ ਤੋਂ ਉਨ੍ਹਾਂ ਨੇ ਇਨਕਾਰ ਕਰ ਦਿੱਤਾ ਸੀ।