ਗੁੜਗਾਓਂ, 10 ਦਸੰਬਰ (ਪੋਸਟ ਬਿਊਰੋ)- ਜਾਅਲਸਾਜ਼ਾਂ ਨੇ ਜਰਮਨ ਦੂਤਘਰ ਦੀ ਗੱਡੀ ਵੇਚਣ ਦੇ ਨਾਂਅ 'ਤੇ ਗੁੜਗਾਓਂ ਦੇ ਇੱਕ ਵਿਅਕਤੀ ਨੂੰ 3.5 ਲੱਖ ਰੁਪਏ ਦਾ ਚੂਨਾ ਲਾ ਦਿੱਤਾ ਹੈ। ਇਹ ਵਾਰਦਾਤ ਜੁਲਾਈ 2018 ਵਿੱਚ ਹੋਈ ਅਤੇ ਇਸ ਦੌ ਜਾਂਚ ਦੇ ਬਾਅਦ ਕੱਲ੍ਹ ਮੁਕੱਦਮਾ ਦਰਜ ਕੀਤਾ ਗਿਆ।
ਇਸ ਮਹਾਨਗਰ ਦੇ ਅਰਾਲੀਆ ਵਿਚਲੇ ਡੀ ਐਲ ਐਫ ਲਿੰਕ ਸੈਕਟਰ 42 ਵਿੱਚ ਰਹਿਣ ਵਾਲੇ ਪ੍ਰਵੀਨ ਅਗਰਵਾਲ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਕਿ ਆਪਣੇ ਆਪ ਨੂੰ ਜਰਮਨ ਦੂਤਘਰ ਦਾ ਡਿਪਲੋਮੇਟ ਦੱਸਣ ਵਾਲੇ ਡਾਕਟਰ ਮਾਰਟਿਨ ਨੇਯ ਨਾਂਅ ਦੇ ਵਿਅਕਤੀ ਨੇ ਜੁਲਾਈ ਵਿੱਚ ਇੱਕ ਵੈਬਸਾਈਟ ਉੱਤੇ ਨੋਟਿਸ ਦਿੱਤਾ ਸੀ ਕਿ ਦੂਤਘਰ ਵਿੱਚ ਇੱਕ ਲਗਜਰੀ ਗੱਡੀ ਵਿਕਾਊ ਸੀ। ਇਸ ਨੂੰ ਖਰੀਦਣ ਦੇ ਲਈ ਗ੍ਰਾਹਕ ਨੂੰ ਕੁਲ ਕੀਮਤ ਦਾ ਪੰਜ ਫੀਸਦੀ ਪਹਿਲਾਂ ਜਮ੍ਹਾ ਕਰਨ ਦੀ ਸ਼ਰਤ ਰੱਖੀ ਸੀ। ਪ੍ਰਵੀਨ ਨੇ ਦਿੱਤੇ ਗਏ ਮੋਬਾਈਲ ਨੰਬਰ 'ਤੇ ਸੰਪਰਕ ਕੀਤਾ ਤਾਂ ਗੱਲ ਕਰਨ ਵਾਲੇ ਨੇ ਇੱਕ ਬੈਂਕ ਖਾਤਾ ਨੰਬਰ ਅਤੇ ਹੋਰ ਵੇਰਵਾ ਈ-ਮੇਲ ਰਾਹੀਂ ਭੇਜਿਆ ਅਤੇ ਸੰਬੰਧਤ ਖਾਤੇ ਵਿੱਚ ਰੁਪਏ ਜਮ੍ਹਾ ਕਰਨ ਲਈ ਕਿਹਾ। ਇਸ ਮੌਕੇ ਪ੍ਰਵੀਨ ਨੇ ਇਨਾਇਤ ਸਲੀਮ ਖਾਫੀ ਦੇ ਖਾਤੇ ਵਿੱਚ ਇੱਕ ਲੱਖ ਰੁਪਏ ਜਮ੍ਹਾ ਕਰਵਾਏ ਅਤੇ ਫਿਰ ਢਾਈ ਲੱਖ ਰੁਪਏ ਹੋਰ ਜਮ੍ਹਾ ਕਰਵਾਏ। ਉਨ੍ਹਾਂ ਨੇ ਦੱਸਿਆ ਕਿ ਬਾਅਦ ਵਿੱਚ ਪਤਾ ਲੱਗਾ ਕਿ ਜਰਮਨ ਦੂਤਘਰ ਵਿੱਚ ਮਾਰਟਿਨ ਨੇਯ ਨਾਂਅ ਦਾ ਕੋਈ ਡਿਪਲੋਮੇਟ ਨਹੀਂ ਹੈ, ਨਾ ਹੀ ਕੋਈ ਗੱਡੀ ਵਿਕਾਓ ਹੈ। ਇਸ ਦੇ ਬਾਅਦ ਪ੍ਰਵੀਨ ਨੇ ਡਿਪਟੀ ਕਮਿਸ਼ਨਰ ਪੁਲਸ (ਸਿਟੀ) ਨੂੰ ਸ਼ਿਕਾਇਤ ਦਿੱਤੀ ਤਾਂ ਮੁੱਢਲੀ ਜਾਂਚ ਦੇ ਬਾਅਦ ਸਾਈਬਰ ਥਾਣਾ ਪੁਲਸ ਨੂੰ ਕੇਸ ਦਰਜ ਕਰਨ ਦੇ ਹੁਕਮ ਦਿੱਤੇ ਗਏ।