ਅੰਮ੍ਰਿਤਸਰ, 10 ਦਸੰਬਰ (ਪੋਸਟ ਬਿਊਰੋ)- ਗ੍ਰੀਨ ਵੈਲੀ ਦੀ ਕੋਠੀ ਵਿੱਚ ਬਣੇ ਫਾਈਨੈਂਸ਼ੀਅਲ ਇਨਕਲੂਜ਼ਨ ਕੰਪਨੀ ਦੇ ਬ੍ਰਾਂਚ ਦਫਤਰ ਵਿੱਚ ਕੱਲ੍ਹ ਸਵੇਰੇ ਆਏ ਛੇ ਨਕਾਬਪੋਸ਼ ਡਕੈਤਾਂ ਨੇ ਪਿਸਤੌਲ ਦੀ ਨੋਕ ਉੱਤੇ ਅੱਠ ਮੁਲਾਜ਼ਮਾਂ ਨੂੰ ਬਾਥਰੂਮ ਵਿੱਚ ਬੰਦੀ ਬਣਾ ਕੇ ਅੱਠ ਲੱਖ 59 ਹਜ਼ਾਰ ਲੁੱਟ ਲਈ। ਡਕੈਤ ਜਾਂਦੇ ਸਮੇਂ ਕਰਮਚਾਰੀ ਅਤੇ ਉਤਰ ਪ੍ਰਦੇਸ਼ ਵਾਸੀ ਸਚਿਨ ਰਾਣਾ ਦੀ ਜੇਬ ਵਿੱਚ ਪਏ 1500 ਰੁਪਏ, ਇੱਕ ਬਾਈਕ ਵੀ ਲੈ ਗਏ, ਜਦ ਕਿ ਮੁਲਾਜ਼ਮਾਂ ਦੇ ਅੱਠ ਮੋਬਾਈਲ ਬੈਗ ਵਿੱਚ ਪਾ ਕੇ ਜਾਣ ਲੱਗੇ ਉਸ ਕੋਠੀ ਦੇ ਬਾਹਰ ਸੁੱਟ ਗਏ।
ਹੈਦਰਾਬਾਦ ਦੀ ਇਸ ਫਾਈਨਾਂਸ ਕੰਪਨੀ ਦੇ ਦਫਤਰ ਦੇ ਮੁੱਖ ਦਰਵਾਜ਼ੇ ਦਾ ਲਾਕ ਖਰਾਬ ਸੀ ਅਤੇ ਚਿਟਕਨੀ ਨਾ ਲੱਗੀ ਹੋਣ ਕਾਰਨ ਡਕੈਤ ਤਾਲਾ ਲੱਗਾ ਲੋਹੇ ਦਾ ਗੇਟ ਟੱਪ ਕੇ ਆਸਾਨੀ ਨਾਲ ਆ ਗਏ। ਕੰਪਨੀ ਦੇ ਮੁਲਾਜ਼ਮ ਨਵਜੀਤ ਦੇ ਮੁਤਾਬਕ ਘਟਨਾ ਦੇ ਵਕਤ ਉਹ ਆਪਣੇ ਸਾਥੀ ਮੁਲਾਜ਼ਮਾਂ ਉੱਤਰ ਪ੍ਰਦੇਸ਼ ਦੇ ਸੀਤਾ ਸਿੰਘ, ਮਾਨਸਾ ਦੇ ਜਸਬੀਰ ਸਿੰਘ, ਬੁਢਾਨਾ ਦੇ ਤਾਹਿਰ ਖਾਨ, ਲੋਹਗੜ੍ਹ ਪਿੰਡ ਦੇ ਗੁਰਮੇਜ ਸਿੰਘ, ਤਲਵੰਡੀ ਭਾਈ ਫਿਰੋਜ਼ਪੁਰ ਦੇ ਅਮਨਦੀਪ ਸਿੰਘ, ਮੁਜ਼ੱਫਰ ਨਗਰ ਦੇ ਇੰਤਜ਼ਾਰ ਅਲੀ ਸਮੇਤ ਦਫਤਰ ਦੀ ਛੱਤ ਦੇ ਉਪਰ ਬਣੇ ਕਮਰੇੇ ਵਿੱਚ ਸੁੱਤੇ ਪਏ ਸਨ। ਕਰੀਬ ਪੌਣੇ ਪੰਜ ਵਜੇ ਕਿਸੇ ਨੇ ਉਸ ਨੂੰ ਨੀਂਦ ਤੋਂ ਜਗਾਇਆ ਅਤੇ ਇੱਕ ਨਕਾਬਪੋਸ਼ ਨੌਜਵਾਨ ਨੇ ਉਸ ਦੀ ਕਨਪਟੀ 'ਤੇ ਪਿਸਤੌਲ ਰੱਖ ਕੇ ਚੁੱਪ ਰਹਿਣ ਨੂੰ ਕਿਹਾ। ਇਸ ਦੌਰਾਨ ਉਸਦੇ ਦੂਸਰੇ ਸਾਥੀ ਪਿਸਤੌਲਧਾਰੀ ਨੌਜਵਾਨ ਨੇ ਕੈਸ਼ ਦੇ ਬਾਰੇ ਪੁੱਛਿਆ। ਬ੍ਰਾਂਚ ਮੈਨੇਜਰ ਬਲਜੀਤ ਨੇ ਦੱਸਿਆ ਕਿ ਨਕਾਬਪੋਸ਼ ਡਕੈਤਾਂ ਨੇ ਉਸ ਨੂੰ ਵੀ ਨੀਂਦ ਤੋਂ ਜਗਾ ਕੇ ਪਿਸਤੌਲ ਦਿਖਾ ਕੇ ਉਸ ਤੋਂ ਕੈਸ਼ ਦੇ ਬਾਰੇ ਪੁੱਛਿਆ। ਇਨਕਾਰ ਕਰਨ 'ਤੇ ਗੱਲ੍ਹ ਉਤੇ ਥੱਪੜ ਮਾਰਦੇ ਹੋਏ ਸੇਫ ਦੀਆਂ ਚਾਬੀਆਂ ਮੰਗੀਆਂ। ਇਸ ਦੇ ਬਾਅਦ ਉਨ੍ਹਾਂ ਨੇ ਸਾਰੇ ਨੂੰ ਬਾਥਰੂਮ ਵਿੱਚ ਬੰਦ ਕਰ ਕੇ ਬਾਹਰੋਂ ਤਾਲਾ ਲਾ ਕੇ ਸੇਫ ਖੋਲ੍ਹ ਕੇ ਵਿੱਚੋਂ ਕੈਸ਼ ਕੱਢਿਆ ਅਤੇ ਫਰਾਰ ਹੋ ਗਏ।