* ਮੈਂ ਗੁਨਾਹ ਨਹੀਂ ਕੀਤਾ, ਮੁਆਫੀ ਕਾਹਦੀ ਮੰਗਾਂ: ਮੱਕੜ
ਲੁਧਿਆਣਾ, 10 ਦਸੰਬਰ (ਪੋਸਟ ਬਿਊਰੋ)- ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਲੰਬਾ ਸਮੇਂ ਪ੍ਰਧਾਨ ਰਹੇ ਅਵਤਾਰ ਸਿੰਘ ਮੱਕੜ ਤੋਂ ਜਦੋਂ ਕੱਲ੍ਹ ਪੁੱਛਿਆ ਗਿਆ ਤਾਂ ਉਹ ਅਕਾਲੀ ਦਲ ਵੱਲੋਂ ਸ੍ਰੀ ਅਕਾਲ ਤਖਤ ਵਿਖੇ ਮੁਆਫੀ ਮੰਗਣ ਗਏ ਆਗੂਆਂ ਦੇ ਨਾਲ ਕਿਉਂ ਨਹੀਂ ਗਏ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਕੋਈ ਗੁਨਾਹ ਨਹੀਂ ਕੀਤਾ। ਸੰਸਾਰ ਵਿੱਚ ਬੈਠੇ ਸਿੱਖ ਤੇ ਅਸੀਂ ਕਜਿ ਦੋ ਟਾਈਮ ਰੋਜ਼ ਮੁਆਫੀ ਮੰਗਦੇ ਹਾਂ, ਪਰ ਜਿਹੜੇ ਓਥੇ ਗਏ ਹਨ, ਉਹ ਦੱਸ ਦੇਣ ਕਾਹਦੀ ਮੁਆਫੀ ਮੰਗਣ ਗਏ ਹਨ। ਉਨ੍ਹਾਂ ਕਿਹਾ ਕਿ ਜਿੱਥੋਂ ਤੱਕ ਉਨ੍ਹਾਂ ਦੇ ਜਾਣ ਦਾ ਸਵਾਲ ਹੈ, ਉਹ ਗੁਰੂ ਘਰ ਦੇ ਸੇਵਾਦਾਰ ਹਨ, ਜਦੋਂ ਚਾਹੁਣ ਜਾ ਸਕਦੇ ਹਨ। ਉਨ੍ਹਾਂ ਨੂੰ ਪੁੱਛਿਆ ਕਿ ਜਦੋਂ ਸਿਰਸਾ ਸਾਧ ਨੂੰ ਮੁਆਫੀ ਦਿੱਤੀ ਗਈ ਸੀ, ਤੁਸੀਂ ਉਸ ਵੇਲੇ ਪ੍ਰਧਾਨ ਹੁੰਦੇ ਸੀ, ਤੁਹਾਡਾ ਵੀ ਇਸੇ ਲਈ ਬਾਦਲਾਂ ਦੇ ਨਾਲ ਜਾਣਾ ਬਣਦਾ ਸੀ ਤਾਂ ਮੱਕੜ ਨੇ ਕਿਹਾ ਕਿ ਸਿਰਸਾ ਸਾਧ ਨੂੰ ਮੁਆਫੀ ਦੇਣ ਮੌਕੇ ਮੈਂ ਰੋਕਿਆ ਸੀ, ਪਰ ਮੇਰੀ ਕਿਸੇ ਨੇ ਮੰਨੀ ਨਹੀਂ ਸੀ।
ਪੱਤਰਕਾਰਾਂ ਵੱਲੋਂ ਜ਼ੋਰ ਦੇ ਕੇ ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਤੁਸੀਂ ਕਿਉਂ ਨਹੀਂ ਗਏ ਤਾਂ ਉਨ੍ਹਾਂ ਕਿਹਾ ਕਿ ਮੈਂ ਕੋਈ ਗਲਤੀ ਨਹੀਂ ਕੀਤੀ, ਉਂਝ ਮੈਂ ਮੁਆਫੀ ਮੰਗਦਾ ਹਾਂ, ਮੈਂ ਹਰ ਮਹੀਨੇ ਗੁਰੂ ਘਰ ਜਾਂਦਾ ਹਾਂ ਤੇ ਸਰਬੱਤ ਦੇ ਭਲੇ ਲਈ ਅਰਦਾਸ ਕਰਦਾ ਹਾਂ। ਉਨ੍ਹਾਂ ਕਿਹਾ ਕਿ ਫਿਲਹਾਲ ਉਹ ਆਪਰੇਸ਼ਨ ਕਰਵਾਉਣ ਜਾ ਰਹੇ ਹਨ, ਇਸ ਲਈ ਉਹ ਤੰਦਰੁਸਤ ਹੋ ਕੇ ਸਿਹਤਯਾਬੀ ਦੀ ਅਰਦਾਸ ਜ਼ਰੂਰ ਕਰ ਰਹੇ ਹਨ।