ਨਵੀਂ ਦਿੱਲੀ, 21 ਅਪ੍ਰੈਲ (ਪੋਸਟ ਬਿਊਰੋ)- ਮੰਗਲ ਗ੍ਰਹਿ ਉੱਤੇ ਇੱਕ ਰੋਬੋਟ ਹੈਲੀਕਾਪਟਰ ਦੀ ਪਹਿਲੀ ਉਡਾਣ ਨਾਲ ਨਾਸਾ ਵੱਲੋਂ ਇਤਿਹਾਸ ਰਚਣ ਵਿੱਚ ਭਾਰਤੀ ਮੂਲ ਦੇ ਇੱਕ ਵਿਗਿਆਨੀ ਦੀ ਅਹਿਮ ਭੂਮਿਕਾ ਰਹੀ।
ਇਸ ਹੈਲੀਕਾਪਟਰ ਮਿਸ਼ਨ ਦੇ ਚੀਫ ਇੰਜੀਨੀਅਰ ਬੌਬ ਬਲਰਾਮ ਆਈ ਆਈ ਟੀ ਮਦਰਾਸ ਤੋਂ ਪੜ੍ਹਾਈ ਕਰ ਕੇ ਗਏ ਹਨ। ਉਹ ਅਮਰੀਕੀ ਪੁਲਾੜ ਏਜੰਸੀ ਨਾਲ ਬੀਤੇ ਵੀਹ ਸਾਲਾਂ ਤੋਂ ਕੰਮ ਕਰ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਉਹ ਅਤੇ ਉਨ੍ਹਾਂ ਦੀ ਟੀਮ ਇਸ ਲਾਲ ਗ੍ਰਹਿ ਲਈ ਹੁਣ ਇੱਕ ਵੱਡੇ ਆਕਾਰ ਦੇ ਹੈਲੀਕਾਪਟਰ ਦਾ ਡਿਜ਼ਾਈਨ ਤਿਆਰ ਕਰਨ ਵਿੱਚ ਲੱਗੇ ਹਨ। ਇਹ ਨਵਾਂ ਹੈਲੀਕਾਪਟਰ ਸਾਢੇ ਚਾਰ ਕਿਲੋਗਰਾਮ ਤੱਕ ਦੇ ਜੰਤਰ ਢੋਣ ਦੇ ਸਮਰੱਥ ਹੋਵੇਗਾ।ਨਾਸਾ ਦੇ ਇੰਜੇਨਯੂਜੀ ਨਾਂਅ ਦੇ ਹੈਲੀਕਾਪਟਰ ਨੇ ਮੰਗਲ ਗ੍ਰਹਿ ਉੱਤੇ ਬੀਤੇ ਦਿਨੀਂ ਪਹਿਲੀ ਉਡਾਣ ਭਰੀ ਤਾਂ ਧਰਤੀ ਤੋਂ ਪਰੇ ਕਿਸੇ ਹੋਰ ਗ੍ਰਹਿ ਉੱਤੇ ਇਸ ਤਰ੍ਹਾਂ ਦੀ ਇਹ ਪਹਿਲੀ ਉਡਾਣ ਸੀ। ਲਗਭਗ 18 ਕਿਲੋਗਰਾਮ ਦਾ ਇਹ ਹੈਲੀਕਾਪਟਰ ਉਡਾਣ ਦੌਰਾਨ 10 ਫੁੱਟ ਦੀ ਉਚਾਈ ਹਾਸਲ ਕਰਨ ਵਿੱਚ ਸਫਲ ਰਿਹਾ। ਇਸ ਮਿਸ਼ਨ ਨੂੰ ਲਾਸ ਏਂਜਲਸ ਕੋਲ ਨਾਸਾ ਦੇ ਜੈਟ ਪ੍ਰੋਪਲਸਨ ਲੈਬਾਰਟਰੀ ਤੋਂ ਚਲਾਇਆ ਗਿਆ। ਮਿਸ਼ਨ ਦੇ ਚੀਫ ਇੰਜੀਨੀਅਰ ਬਲਰਾਮ ਨੇ ਇੰਜੇਨਯੂਟੀ ਵਿਕਸਤ ਕੀਤਾ ਸੀ। ਉਹ ਆਈ ਆਈ ਟੀ ਮਦਰਾਸ ਤੋਂ ਮਕੈਨੀਕਲ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕਰਨ ਪਿੱਛੋਂ ਅਮਰੀਕਾ ਚਲੇ ਗਏ ਸਨ ਅਤੇ ਇਸ ਤੋਂ ਬਾਅਦ ਉਨ੍ਹਾਂ ਨਿਊ ਯਾਰਕ ਦੇ ਰੇਨਸੀਲਰ ਪੋਲੀਟੈਕਨੀਕਲ ਇੰਸਟੀਚਿਊਟ ਤੋਂ ਕੰਪਿਊਟਰ ਐਂਡ ਸਿਸਟਮ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕੀਤੀ ਅਤੇ ਪੀ ਐਚ ਡੀ ਦੀ ਡਿਗਰੀ ਲਈ।