ਕੋਚੀ, 20 ਅਪ੍ਰੈਲ (ਪੋਸਟ ਬਿਊਰੋ)- ਭਾਰਤ ਦੀ ਸਮੁੰਦਰੀ ਫੌਜ ਨੇ ਕੱਲ੍ਹ ਅਰਬ ਸਾਗਰ ਵਿੱਚ ਮੱਛੀਆਂ ਫੜਨ ਵਾਲੇ ਜਹਾਜ਼ ਤੋਂ 3000 ਕਰੋੜ ਰੁਪਏ ਦੀ ਡਰੱਗਸ ਜ਼ਬਤ ਕੀਤੀ ਹੈ। ਇਹ ਜਹਾਜ਼ ਵਿਦੇਸ਼ੀ ਹੋਣ ਦਾ ਸ਼ੱਕ ਹੈ।
ਫੌਜ ਦੇ ਇੱਕ ਬੁਲਾਰੇ ਨੇ ਕਿਹਾ ਕਿ ਭਾਰਤੀ ਨੇਵੀ ਦਾ ਜਹਾਜ਼ ‘ਸੁਵਰਣ’ ਅਰਬ ਸਾਗਰ ਵਿੱਚ ਗਸ਼ਤ ਉੱਤੇ ਸੀ ਤਾਂ ਇਸੇ ਦੌਰਾਨ ਇਸ ਦਾ ਸਾਹਮਣਾ ਮੱਛੀਆਂ ਫੜਨ ਵਾਲੇ ਜਹਾਜ਼ ਨਾਲ ਹੋਇਆ, ਜੋ ਸ਼ੱਕੀ ਹਾਲਤ ਵਿੱਚ ਲੰਘ ਰਿਹਾ ਸੀ। ਉਨ੍ਹਾਂ ਕਿਹਾ ਕਿ ਜਹਾਜ਼ ਦੀ ਜਾਂਚ ਕਰਨ ਉੱਤੇ ਨੇਵੀ ਦੀ ਟੀਮ ਨੂੰ 300 ਕਿੱਲੋਗ੍ਰਾਮ ਤੋਂ ਵੱਧ ਨਸ਼ੇ ਵਾਲਾ ਪਦਾਰਥ ਮਿਲਿਆ, ਜਿਸ ਨੂੰ ਜ਼ਬਤ ਕਰ ਲਿਆ ਗਿਆ ਹੈ। ਬੁਲਾਰੇ ਨੇ ਕਿਹਾ ਕਿ ਅੱਗੇ ਦੀ ਜਾਂਚ ਲਈ ਜਹਾਜ਼ ਤੇ ਚਾਲਕ ਦਲ ਦੇ ਮੈਂਬਰਾਂ ਨੂੰ ਨੇੜਲੀ ਬੰਦਰਗਾਹ ਕੋਚੀ ਲਿਜਾਇਆ ਗਿਆ। ਉਨ੍ਹਾਂ ਦੱਸਿਆ ਕਿ ਜ਼ਬਤ ਕੀਤੇ ਨਸ਼ੇ ਵਾਲੇ ਪਦਾਰਥਾਂ ਦੀ ਕੌਮਾਂਤਰੀ ਬਾਜ਼ਾਰ ਵਿੱਚ ਅੰਦਾਜ਼ਨ ਕੀਮਤ 3000 ਕਰੋੜ ਰੁਪਏ ਹੈ। ਉਨ੍ਹਾ ਇਹ ਨਹੀਂ ਦੱਸਿਆ ਕਿ ਜਹਾਜ਼ ਅਤੇ ਨਸ਼ੇ ਵਾਲੇ ਪਦਾਰਥਾਂ ਦੀ ਜ਼ਬਤੀ ਕਿਸ ਸਥਾਨ ਤੋਂ ਜਾਂ ਕਿਸ ਦਿਨ ਕੀਤੀ ਗਈ।