ਚਕੁੁਲਿਆ, 20 ਅਪ੍ਰੈਲ (ਪੋਸਟ ਬਿਊਰੋ)- ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੇ ਕੱਲ੍ਹ ਚੋਣ ਕਮਿਸ਼ਨ ਨੂੰ ਅਪੀਲ ਕੀਤੀ ਹੈ ਕਿ ਉਹ ਸੂਬੇ ਵਿੱਚ ਪਹਿਲਾਂ ਦੇ ਪ੍ਰੋਗਰਾਮ ਅਨੁਸਾਰ ਚੋਣਾਂ ਕਰਾਉਣ ਦੇ ਆਪਣੇ ਫੈਸਲੇ ਉੱਤੇ ਮੁੜ ਵਿਚਾਰ ਕਰੇ। ਬੈਨਰਜੀ ਨੇ ਉਤਰੀ ਦਿਨਾਜਪੁਰ ਦੇ ਚਕੁਲਿਆ ਵਿੱਚ ਇੱਕ ਰੈਲੀ ਵਿੱਚ ਕਿਹਾ ਕਿ ਕਮਿਸ਼ਨ ਨੂੰ ਜਨਤਕ ਸਿਹਤ ਨੂੰ ਪਹਿਲ ਦੇਣੀ ਚਾਹੀਦੀ ਹੈ। ਮੈਂ ਹੱਥ ਜੋੜ ਕੇ ਚੋਣ ਕਮਿਸ਼ਨ ਨੂੰ ਅਪੀਲ ਕਰਦੀ ਹਾਂ ਕਿ ਅਗਲੇ ਤਿੰਨ ਪੜਾਵਾਂ ਦੀਆਂ ਚੋਣਾਂ ਇੱਕੋ ਦਿਨ ਕਰਵਾ ਲਵੇ। ਜੇ ਇੱਕ ਦਿਨ ਵਿੱਚ ਨਹੀਂ ਹੋ ਸਕਦੀਆਂ ਤਾਂ ਦੋ ਦਿਨਾਂ ਵਿੱਚ ਕਰਾ ਲਓ ਤੇ ਇੱਕ ਦਿਨ ਬਚਾ ਲਓ। ਉਨ੍ਹਾਂ ਚੋਣ ਕਮਿਸ਼ਨ ਨੂੰ ਕਿਹਾ ਕਿ ਤੁਸੀਂ ਭਾਜਪਾ ਦੇ ਕਹਿਣ ਉੱਤੇ ਆਪਣਾ ਫੈਸਲਾ ਨਾ ਲਵੋ। ਕ੍ਰਿਪਾ ਕਰਕੇ ਚੋਣਾਂ ਦਾ ਪ੍ਰੋਗਰਾਮ ਘੱਟ ਕਰ ਕੇ ਜਨਤਾ ਦੀ ਸਿਹਤ ਨੂੰ ਬਚਾਓ, ਭਾਵੇਂ ਇੱਕ ਹੀ ਦਿਨ ਬਚ ਜਾਵੇ।
ਮਮਤਾ ਬੈਨਰਜੀ ਨੇ ਕਿਹਾ ਕਿ ਉਹ ਤੇ ਉਨ੍ਹਾਂ ਦੀ ਪਾਰਟੀ ਦਾ ਕੋਈ ਨੇਤਾ ਸੰਘਣੇ ਇਲਾਕਿਆਂ ਵਿੱਚ ਕੋਈ ਰੈਲੀ ਨਹੀਂ ਕਰੇਗਾ। ਉਨ੍ਹਾਂ ਨੇ ਮੋਦੀ ਸਰਕਾਰ ਉੱਤੇ ਪਿਛਲੇ ਛੇ ਮਹੀਨਿਆਂ ਵਿੱਚ ਲੋੜੀਂਦੇ ਕਦਮ ਨਾ ਉਠਾਉਣ ਦਾ ਦੋਸ਼ ਵੀ ਲਾਇਆ। ਭਾਜਪਾ ਨੂੰ ਦੰਗਾਈਆਂ ਤੇ ਜੰਗ ਭੜਕਾਉਣ ਵਾਲਿਆਂ ਦੀ ਪਾਰਟੀ ਦੱਸ ਕੇ ਮਮਤਾ ਬੈਨਰਜੀ ਨੇ ਰੈਲੀ ਵਿੱਚ ਮੌਜੂਦ ਲੋਕਾਂ ਨੂੰ ਕਿਹਾ ਕਿ ਉਹ ਬੰਗਾਲ ਨੂੰ ਗੁਜਰਾਤ ਨਾ ਬਣਨ ਦੇਣ। ਮਮਤਾ ਨੇ ਕੋਲਕਾਤਾ ਵਿੱਚ ਕੱਲ੍ਹ ਦੋ ਰੋਡ ਸ਼ੋਅ ਕੀਤੇ। ਪਾਰਟੀ ਦੇ ਬੁਲਾਰੇ ਡੇਰੇਕ ਓ ਬ੍ਰਾਇਨ ਨੇ ਟਵੀਟ ਕੀਤਾ ਕਿ ‘ਮਮਤਾ ਬੈਨਰਜੀ ਕੋਲਕਾਤਾ ਵਿੱਚ ਪ੍ਰਚਾਰ ਨਹੀਂ ਕਰੇਗੀ। 26 ਅਪ੍ਰੈਲ ਨੂੰ ਕੋਲਕਾਤਾ ਸ਼ਹਿਰ ਵਿੱਚ ਪ੍ਰਚਾਰ ਦੇ ਆਖਰੀ ਦਿਨ ਸਿਰਫ਼ ਇੱਕ ਬੈਠਕ ਹੋਵੇਗੀ।