ਨਵੀਂ ਦਿੱਲੀ, 20 ਅਪ੍ਰੈਲ (ਪੋਸਟ ਬਿਊਰੋ)- ਦਿੱਲੀ ਹਾਈਕੋਰਟ ਨੇ ਦੇਸ਼ ਦੀ ਰਾਜਧਾਨੀ ਵਿੱਚ ਕੋਰੋਨਾ ਵਾਇਰਸ ਦੇ ਤੇਜ਼ੀ ਨਾਲ ਵਧਦੇ ਕੇਸਾਂ ਕਾਰਨ ਜ਼ਿਲ੍ਹਾ ਅਦਾਲਤਾਂ ਨੂੰ ਹੁਕਮ ਦਿੱਤਾ ਹੈ ਕਿ ਉਹ ਸਿਰਫ਼ ਜ਼ਰੂਰੀ ਕੇਸਾਂ ਉੱਤੇ, ਉਹ ਵੀ ਵੀਡੀਓ ਕਾਨਫਰੰਸਿੰਗ ਰਾਹੀਂ ਹੀ ਸੁਣਵਾਈ ਕਰਨ।
ਵਰਨਣ ਯੋਗ ਹੈ ਕਿ ਦਿੱਲੀ ਵਿੱਚ ਕੱਲ੍ਹ ਕੋਵਿਡ-19 ਦੇ ਇੱਕ ਦਿਨ ਵਿੱਚ ਸਭ ਤੋਂ ਵੱਧ 25465 ਨਵੇਂ ਕੇਸ ਮਿਲੇ ਸਨ ਤੇ ਇਥੇ ਇਨਫੈਕਸ਼ਨ ਦੀ ਦਰ ਵਧ ਕੇ 29.74 ਫੀਸਦੀ ਉੱਤੇ ਪਹੁੰਚ ਗਈ ਸੀ। ਇਸ ਦਾ ਮਤਲਬ ਇਹ ਹੈ ਕਿ ਲੱਗਭਗ ਹਰ ਤੀਜਾ ਨਮੂਨਾ ਜਾਂਚ ਵਿੱਚ ਇਨਫੈਕਟਿਡ ਮਿਲਿਆ ਹੈ।ਇਸ ਹੁਕਮ ਤੋਂ ਇੱਕ ਦਿਨ ਪਹਿਲਾਂ ਹਾਈਕੋਰਟ ਨੇ ਕਿਹਾ ਸੀ ਕਿ ਉਹ ਇਸ ਸਾਲ ਪੇਸ਼ ਹੋਏ ਕੇਸਾਂ ਵਿੱਚੋਂ 19 ਅਪ੍ਰੈਲ ਤੋਂ ਸਿਰਫ਼ ਉਨ੍ਹਾਂ ਕੇਸਾਂ ਉੱਤੇ ਸੁਣਵਾਈ ਕਰੇਗੀ, ਜੋ ਅਤਿ ਜ਼ਰੂਰੀ ਹਨ। ਅੱਠ ਅਪ੍ਰੈਲ ਨੂੰ ਹਾਈਕੋਰਟ ਨੇ ਤੈਅ ਕੀਤਾ ਸੀ ਕਿ 9 ਤੋਂ 23 ਅਪ੍ਰੈਲ ਤੱਕ ਉਹ ਸਿਰਫ਼ ਡਿਜੀਟਲ ਮੀਡੀਆ ਨਾਲ ਹੀ ਕੇਸਾਂ ਉੱਤੇ ਸੁਣਵਾਈ ਕਰੇਗੀ।