ਬੇਲਗ੍ਰੇਡ, 10 ਦਸੰਬਰ (ਪੋਸਟ ਬਿਊਰੋ)- ਜਦੋਂ ਧਰਤੀ ਉੱਤੇ ਆਬਾਦੀ ਦਾ ਬੋਝ ਵਧ ਰਿਹਾ ਹੈ, ਓਦੋਂ ਕੁਝ ਦੇਸ਼ ਘੱਟ ਆਬਾਦੀ ਦੀ ਸਮੱਸਿਆ ਨਾਲ ਜੂਝ ਰਹੇ ਹਨ। ਇਸ ਸਮੱਸਿਆ ਦਾ ਸਾਹਮਣਾ ਕਰ ਰਹੇ ਦੇਸ਼ ਸਰਬੀਆ ਨੇ ਆਪਣੇ ਦੇਸ਼ ਦੇ ਨੌਜਵਾਨਾਂ ਨੂੰ ਇਹ ਅਪੀਲ ਕੀਤੀ ਹੈ, ‘ਬੱਚੇ ਪੈਦਾ ਕਰੋ, ਦੇਰੀ ਨਾ ਕਰੋ!`
ਇਕ ਸਮਾਚਾਰ ਏਜੰਸੀ ਮੁਤਾਬਕ ਬੱਚਿਆਂ ਦੀ ਘੱਟ ਆਬਾਦੀ ਦੀ ਸਮੱਸਿਆ ਦੂਰ ਕਰਨ ਦੇ ਲਈ ਸਰਬੀਆ ਵਿਚ ਇਸ ਮਕਸਦ ਦੇ ਲਾਗੂ ਹੋ ਰਹੇ ਨਾਅਰਿਆਂ ਵਿਚੋਂ ਇਕ ਨਾਅਰਾ ਇਹ ਵੀ ਹੈ, ‘ਚੱਲੋ ਬੱਚਿਆਂ ਦੀ ਕਿਲਕਾਰੀ ਸੁਣੀਏ`। ਦੂਜੇ ਪਾਸੇ ਦੇਸ਼ ਦੀਆਂ ਔਰਤਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਆਬਾਦੀ ਵਧਾਉਣ ਲਈ ਬਿਹਤਰ ਸਾਥ ਚਾਹੀਦਾ ਹੈ, ਸਿਰਫ ਪ੍ਰੇਰਣਾ ਦਾਇਕ ਸ਼ਬਦ ਨਹੀਂ ਚਾਹੀਦੇ। ਸਰਬੀਆ ਵਿਚ ਬਹੁਤ ਸਾਰੇ ਲੋਕ ਦੇਸ਼ ਛੱਡ ਕੇ ਜਾ ਰਹੇ ਹਨ ਤੇ ਇਸ ਕਾਰਨ ਵੀ ਜਨਮ ਦਰ ਤੇਜ਼ੀ ਨਾਲ ਡਿੱਗ ਰਹੀ ਹੈ। ਦੇਸ਼ ਵਿਚ ਔਸਤਨ ਹਰ ਦੋ ਪਰਿਵਾਰਾਂ ਵਿਚ 3 ਬੱਚੇ ਹਨ ਜੋ ਯੂਰਪ ਵਿਚ ਸਭ ਤੋਂ ਘੱਟ ਹਨ। ਇਸ ਕਾਰਨ ਸਰਬੀਆ ਦੀ ਆਬਾਦੀ ਘੱਟ ਕੇ 70 ਲੱਖ ਰਹਿ ਗਈ ਹੈ। ਯੂ ਐੱਨ ਓ ਦਾ ਖਿਆਲ ਹੈ ਕਿ ਸਾਲ 2050 ਤੱਕ ਸਰਬੀਆ ਦੀ ਆਬਾਦੀ ਹੋਰ 15 ਫੀਸਦੀ ਘੱਟ ਸਕਦੀ ਹੈ। ਘੱਟੇ ਬੱਚੇ ਪੈਦਾ ਕਰਨ ਦੇ ਰੁਝਾਨ ਨੂੰ ਘੱਟ ਕਰਨ ਲਈ ਸਰਬੀਆਈ ਅਧਿਕਾਰੀਆਂ ਨੇ ਕਈ ਪਰਪੋਜ਼ਲ ਦਿੱਤੇ ਹਨ। ਇਸ ਵਿਚ ਜੂਨ ਵਿਚ ਐਲਾਨੀ ਯੋਜਨਾ ਵੀ ਸ਼ਾਮਲ ਹੈ। ਯੋਜਨਾ ਮੁਤਾਬਕ ਉਨ੍ਹਾਂ ਇਲਾਕਿਆਂ ਵਿਚ ਘੱਟ ਮੰਜ਼ਿਲਾਂ ਵਾਲੇ ਮਕਾਨ ਬਣਨਗੇ, ਜਿੱਥੇ ਬੱਚਿਆਂ ਦੀ ਜਨਮ ਦਰ ਘੱਟ ਹੈ।
ਰਾਸ਼ਟਰਪਤੀ ਅਲੈਗਜ਼ੈਂਡਰ ਵੁਕਿਕ ਨੇ ਕਿਹਾ ਕਿ ਇਹ ਇਕ ਅਧਿਐਨ ਤੋਂ ਪਤਾ ਚੱਲਦਾ ਹੈ ਕਿ 2 ਤੋਂ 4 ਮੰਜ਼ਿਲਾ ਘਰਾਂ ਵਿਚ ਰਹਿਣ ਵਾਲੇ ਜੋੜਿਆਂ ਵਿਚ ਬੱਚੇ ਪੈਦਾ ਕਰਨ ਦੀ ਦਰ ਦੁੱਗਣੀ ਹੈ। ਇਸ ਦੇ ਇਲਾਵਾ ਔਰਤਾਂ ਨੂੰ ਹੋਰ ਬੱਚੇ ਪੈਦਾ ਕਰਨ ਲਈ ਪ੍ਰੇਰਿਤ ਕਰਨ ਲਈ ਨਵੇਂ ਮੈਟਰਨਟੀ ਦੇਖਭਾਲ ਕਾਨੁੰਨ ਪਾਸ ਕੀਤੇ ਗਏ ਹਨ।