ਸਿਡਨੀ, 10 ਦਸੰਬਰ (ਪੋਸਟ ਬਿਊਰੋ)- ਬਹੁਤ ਉਤਸ਼ਾਹ ਨਾਲ ਮਨਾਏ ਜਾਂਦਾ ਕ੍ਰਿਸਮਸ ਦਾ ਤਿਓਹਾਰ ਹਰ ਕੋਈ ਆਪਣੇ ਪਰਿਵਾਰ ਨਾਲ ਮਨਾਉਣਾ ਚਾਹੁੰਦਾ ਹੈ। ਇਸ ਮੌਕੇੇ ਮਿਲੀਆਂ ਛੁੱਟੀਆਂ ਵਿਚ ਕਈ ਲੋਕ ਫੈਮਿਲੀ ਹੌਲੀਡੇਅ ਦੀ ਵੀ ਯੋਜਨਾ ਬਣਾਉਂਦੇ ਹਨ। ਇਸ ਖਾਸ ਮੌਕੇ ਇਕ ਅਪਾਹਜ ਭਾਰਤੀ ਸ਼ਖਸ ਨੇ ਆਸਟਰੇਲੀਆ ਵਿਚ ਛੁੱਟੀਆਂ ਮਨਾਉਣ ਦੀ ਯੋਜਨਾ ਬਣਾਈ ਸੀ, ਪਰ ਅਫਸੋਸ ਉਸ ਦਾ ਯਾਤਰੀ ਵੀਜ਼ਾ ਰੱਦ ਕਰ ਦਿੱਤਾ ਗਿਆ ਹੈ। ਭਾਰਤੀ ਸ਼ਖਸ ਨਾਲ ਹੋਏ ਇਸ ਵਿਤਕਰੇ ਦੀ ਗੱਲ ਸੋਸ਼ਲ ਮੀਡੀਆ `ਤੇ ਵਾਇਰਲ ਹੋ ਚੁੱਕੀ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਸ਼ੁਭਾਜੀਤ ਫੌਜ ਵਿਚ ਡਿਊਟੀ ਦੌਰਾਨ ਜ਼ਖਮੀ ਹੋ ਗਿਆ ਸੀ। ਠੀਕ ਹੋਣ ਮਗਰੋਂ ਉਹ ਵ੍ਹੀਲਚੇਅਰ ਦੀ ਵਰਤੋਂ ਕਰਦਾ ਹੈ। ਕ੍ਰਿਸਮਸ ਦੀਆਂ ਛੁੱਟੀਆਂ ਵਿਚ ਉਸ ਨੇ ਯਾਤਰੀ ਵੀਜ਼ਾ ਉਤੇ ਦੋ ਹਫਤੇ ਆਸਟਰੇਲੀਆ ਜਾਣ ਦੀ ਯੋਜਨਾ ਬਣਾਈ, ਪਰ ਆਸਟਰੇਲੀਆ ਪ੍ਰਸ਼ਾਸਨ ਨੇ ਉਸ ਦਾ ਵੀਜ਼ਾ ਇਹ ਕਹਿ ਕੇ ਰੱਦ ਕਰ ਦਿੱਤਾ ਕਿ ਸ਼ੁਭਾਜੀਤ ਕਾਰਨ ਉਨ੍ਹਾਂ ਦੀ ਸਿਹਤ ਸੇਵਾ ਉੱਤੇ ਵਾਧੂ ਬੋਝ ਪਵੇਗਾ।
ਬ੍ਰਾਇਨ ਬੇਲ ਨਾਮ ਦੇ ਇਕ ਸ਼ਖਸ ਨੇ ਆਪਣੇ ਟਵਿੱਟਰ ਦੇ ਜ਼ਰੀਏ ਇਸ ਦੀ ਜਾਣਕਾਰੀ ਦਿੱਤੀ। ਉਸ ਨੇ ਆਪਣੇ ਅਕਾਊਂਟ `ਤੇ ਲਿਖਿਆ, ‘ਆਸਟਰੇਲੀਆ ਸਰਕਾਰ ਨੇ ਭਾਰਤੀ ਸ਼ਖਸ ਨੂੰ ਕ੍ਰਿਸਸਮ ਦੌਰਾਨ ਯਾਤਰੀ ਵੀਜ਼ਾ ਦੇਣ ਤੋਂ ਸਾਫ ਮਨਾ ਕਰ ਦਿੱਤਾ ਹੈ, ਕਿਉਂਕਿ ਉਹ ਵ੍ਹੀਲਚੇਅਰ ਦੀ ਵਰਤੋਂ ਕਰਦਾ ਹੈ। ਆਸਟਰੇਲੀਆ ਦੇ ਮੁਤਾਬਕ ਜੇ ਸ਼ੁਭਾਜੀਤ ਇੱਥੇ ਆਵੇ ਤਾਂ ਉਸ ਦੀ ਸਿਹਤ ਸੇਵਾ ਉੱਤੇ ਵਾਧੂ ਬੋਝ ਪਵੇਗਾ। ਉਸ ਨੇ ਅੱਗੇ ਲਿਖਿਆ ਕਿ ਇਹ ਇਕ ਨਵਾਂ ਮਾਮਲਾ ਹੈ, ਜਿਸ ਵਿਚ ਅਪਾਹਜ ਸ਼ਖਸ ਨੂੰ ਆਸਟਰੇਲੀਆ ਆਉਣ ਦੀ ਇਜਾਜ਼ਤ ਨਹੀਂ ਦਿੱਤੀ ਗਈ। ਬੇਲ ਨੇ ਅੱਗੇ ਦੱਸਿਆ ਕਿ ਸ਼ੁਭਾਜੀਤ ਦੇ ਕੋਲ ਯਾਤਰਾ ਬੀਮਾ ਵੀ ਸੀ। ਉਹ ਮਿਲਟਰੀ ਸੇਵਾ ਵਿਚ ਲੱਗੀ ਸੱਟ ਦਾ ਇਲਾਜ ਕਰਵਾ ਚੁੱਕਾ ਹੈ ਅਤੇ ਆਸਟਰੇਲੀਆ ਦੀ ਸਿਹਤ ਸੇਵਾ ਦੀ ਵਰਤੋਂ ਕਰਨ ਦਾ ਉਸ ਦਾ ਕੋਈ ਇਰਾਦਾ ਨਹੀਂ। ਇਹ ਸਾਫ ਦਿਸਦਾ ਹੈ ਕਿ ਉਸ ਨੂੰ ਵੀਜ਼ਾ ਨਾ ਦੇਣ ਦਾ ਫੈਸਲਾ ਅਪਾਹਜਾਂ ਵਿਰੁੱਧ ਹੋਣ ਵਾਲੇ ਭੇਦਭਾਵ `ਤੇ ਆਧਾਰਿਤ ਹੈ।