ਨਕੋਦਰ, 19 ਅਪ੍ਰੈਲ (ਪੋਸਟ ਬਿਊਰੋ)- ਨਕੋਦਰ-ਜਲੰਧਰ ਰੋਡ ਉੱਤੇ ਪਿੰਡ ਮੁੱਧ ਦੇ ਜਿਸ ਵਿਅਕਤੀ ਨੂੰ ਕੁਝ ਦਿਨ ਪਹਿਲਾਂ ਮੁੱਧਾਂ ਗੇਟ ਤੋਂ ਪੈਦਲ ਪਿੰਡ ਮੁੱਧ ਵੱਲ ਜਾਂਦੇ ਸਮੇਂ ਮੋਟਰਸਾਈਕਲ ਸਵਾਰ ਨੇ ਟੱਕਰ ਮਾਰੀ ਸੀ ਅਤੇ ਉਸ ਦਿਨ ਤੋਂ ਉਸ ਦਾ ਇਲਾਜ ਹੋ ਰਿਹਾ ਸੀ, ਕੱਲ੍ਹ ਉਸ ਦੀ ਮੌਤ ਹੋ ਗਈ ਹੈ। ਪੁਲਸ ਨੇ ਰਾਮ ਸਿੰਘ ਪੁੱਤਰ ਦਰਸ਼ਨ ਸਿੰਘ ਪਿੰਡ ਮੁੱਧ ਦੇ ਬਿਆਨ ਉੱਤੇ ਮੋਟਰਸਾਈਕਲ ਚਾਲਕ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।
ਸਦਰ ਥਾਣੇ ਦੇ ਮੁਖੀ ਵਿਨੋਦ ਕੁਮਾਰ ਦੇ ਮੁਤਾਬਕ ਰਾਮ ਸਿੰਘ ਪਿੰਡ ਮੁੱਧ ਨੇ ਦੱਸਿਆ ਕਿ ਮੈਂ ਅਤੇ ਮੇਰੇ ਨਾਲ ਰਾਜੀਵ ਕੁਮਾਰ ਪੁੱਤਰ ਗੁਰਦਿੱਤ ਸਿੰਘ ਪਿੰਡ ਮੁੱਧ ਬੀਤੀ 4 ਅਪ੍ਰੈਲ ਨੂੰ ਰੋਟੀ ਪਾਣੀ ਖਾਣ ਪਿੱਛੋਂ ਸੈਰ ਕਰਦੇ ਜਦੋਂ ਗੇਟ ਮੁੱਧ ਤੋਂ ਪਿੰਡ ਵੱਲ ਆਪਣੇ ਹੱਥ ਪੈਦਲ ਜਾ ਰਹੇ ਸੀ ਤਾਂ ਪਿੱਛੋਂ ਹਰਦੀਪ ਸਿੰਘ ਪੁੱਤਰ ਸੁਰਿੰਦਰ ਪਾਲ ਨੇ ਤੇਜ਼ ਰਫ਼ਤਾਰ ਮੋਟਰਸਾਈਕਲ ਲਾਪ੍ਰਵਾਹੀ ਨਾਲ ਰਾਜੀਵ ਕੁਮਾਰ ਵਿੱਚ ਮਾਰਿਆ, ਜਿਸ ਨਾਲ ਉਸ ਦੇ ਸਿਰ ਵਿੱਚ ਸੱਟ ਲੱਗ ਗਈ ਤੇ ਉਹ ਬੇਹੋਸ਼ ਹੋ ਗਿਆ। ਉਸ ਨੂੰ ਕਮਲਜੀਤ ਸਿੰਘ ਪਿੰਡ ਮੁੱਧ ਦੀ ਮਦਦ ਨਾਲ ਸ੍ਰੀ ਰਾਮ ਨਿਊਰੋ ਸੈਂਟਰ ਜਲੰਧਰ ਲੈ ਗਏ ਅਤੇ ਉਥੇ ਦਾ ਇਲਾਜ ਚੱਲਦਾ ਰਿਹਾ ਤੇ ਕੱਲ੍ਹ ਸਵੇਰੇ ਉਸ ਦੀ ਮੌਤ ਹੋ ਗਈ। ਬਿਆਨਕਰਤਾ ਨੇ ਮੋਟਰਸਾਈਕਲ ਚਾਲਕ ਹਰਦੀਪ ਸਿੰਘ ਉੱਤੇ ਕਾਰਵਾਈ ਦੀ ਮੰਗ ਕੀਤੀ ਹੈ। ਥਾਣਾ ਮੁਖੀ ਨੇ ਦੱਸਿਆ ਕਿ ਮੋਟਰਸਾਈਕਲ ਚਾਲਕ ਦੇ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ ਤੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।