ਟੋਰਾਂਟੋ, 10 ਦਸੰਬਰ (ਪੋਸਟ ਬਿਊਰੋ) : ਐਲਨ ਮਸਕ ਦਾ ਕਹਿਣਾ ਹੈ ਕਿ ਜਲਦ ਹੀ ਬੰਦ ਹੋਣ ਜਾ ਰਹੀ ਜਨਰਲ ਮੋਟਰਜ਼ ਫੈਕਟਰੀਜ਼ ਨੂੰ ਉਹ ਖਰੀਦਣ ਦਾ ਮਨ ਬਣਾ ਰਹੇ ਹਨ ਤੇ ਫਿਰ ਉੱਥੇ ਟੈਸਲਾ ਦਾ ਨਿਰਮਾਣ ਕਰਨਾ ਸ਼ੁਰੂ ਕਰਨਗੇ।
ਇੱਕ ਇੰਟਰਵਿਊ ਵਿੱਚ ਮਸਕ ਨੇ ਆਖਿਆ ਕਿ 2019 ਦੇ ਅੰਤ ਤੱਕ ਜਨਰਲ ਮੋਟਰਜ਼ ਜਿਨ੍ਹਾਂ ਪੰਜ ਫੈਸਿਲਿਟੀਜ਼ ਨੂੰ ਬੰਦ ਕਰਨ ਦਾ ਮਨ ਬਣਾ ਰਹੀ ਹੈ ਉਨ੍ਹਾਂ ਵਿੱਚੋਂ ਕੁੱਝ ਨੂੰ ਖਰੀਦਣ ਵਿੱਚ ਉਨ੍ਹਾਂ ਦੀ ਪੂਰੀ ਦਿਲਚਸਪੀ ਹੈ। ਇੱਕ ਵਿਸ਼ਲੇਸ਼ਕ ਅਨੁਸਾਰ ਭਾਵੇਂ ਆਪਣੇ ਵਿਵਾਦਗ੍ਰਸਤ ਬਿਆਨਾਂ ਲਈ ਮਸਕ ਜਾਣੇ ਜਾਂਦੇ ਹਨ ਪਰ ਫਿਰ ਵੀ ਉਹ ਜੀਐਮ ਦੀਆਂ ਫੈਕਟਰੀਜ਼ ਵਿੱਚੋਂ ਕੁੱਝ ਕੁ ਨੂੰ ਖਰੀਦਣ ਵਿੱਚ ਸੱਚੀ-ਮੁੱਚੀਂ ਦਿਲਚਸਪੀ ਰੱਖਦੇ ਹੋ ਸਕਦੇ ਹਨ।
ਯੂਨੀਵਰਸਿਟੀ ਆਫ ਟੋਰਾਂਟੋ ਦੇ ਰੌਟਮੈਨ ਸਕੂਲ ਆਫ ਮੈਨੇਜਮੈਂਟ ਵਿੱਚ ਪ੍ਰੋਫੈਸਰ ਆਫ ਸਟਰੈਟੇਜਿਕ ਮੈਨੇਜਮੈਂਟ ਵਿੱਲ ਮਿਸ਼ੇਲ ਦਾ ਕਹਿਣਾ ਹੈ ਕਿ ਐਲਨ ਕਦੋਂ ਸੱਚ ਬੋਲ ਰਹੇ ਹਨ ਜਾਂ ਕਦੋਂ ਫੜ੍ਹ ਮਾਰ ਰਹੇ ਹਨ ਇਸ ਬਾਰੇ ਕੁੱਝ ਵੀ ਆਖਣਾ ਸੌਖਾ ਨਹੀਂ ਹੈ। ਕਈ ਵਾਰੀ ਤਾਂ ਇੰਜ ਲੱਗਦਾ ਹੈ ਕਿ ਉਹ ਹਵਾ ਵਿੱਚ ਫੋਕੀਆਂ ਮਾਰ ਰਹੇ ਹਨ ਪਰ ਕਈ ਵਾਰੀ ਉਨ੍ਹਾਂ ਦੀ ਆਖੀ ਗੱਲ ਪਿੱਛੇ ਡੂੰਘੀ ਰਣਨੀਤੀ ਹੁੰਦੀ ਹੈ।
ਇਸ ਮਾਮਲੇ ਵਿੱਚ ਮਸਕ ਦੇ ਦਾਅਵੇ ਵਿੱਚ ਗੰਭੀਰਤਾ ਹੋ ਸਕਦੀ ਹੈ ਕਿਉਂਕਿ ਟੈਸਲਾ ਇਸ ਸਮੇਂ ਪਹਿਲਾਂ ਕਿਸੇ ਵੀ ਸਮੇਂ ਨਾਲੋਂ ਵੱਧ ਵਾਹਨ ਡਲਿਵਰ ਕਰ ਰਹੀ ਹੈ। ਇਸ ਤੋਂ ਇਲਾਵਾ ਕੰਪਨੀ ਕੈਲੇਫੋਰਨੀਆ ਵਿੱਚ ਆਪਣੀ ਮੌਜੂਦਾ ਫੈਕਟਰੀ ਵਿੱਚ ਉਤਪਾਦਨ ਦੀ ਹੱਦ ਪਾਰ ਕਰਨ ਵਾਲੀ ਹੈ।