ਨਵੀਂ ਦਿੱਲੀ, 15 ਅਪਰੈਲ, (ਪੋਸਟ ਬਿਊਰੋ)- ਸਮੁੱਚੇ ਭਾਰਤ ਵਿੱਚ ਕੋਰੋਨਾ ਦੇ ਕਾਰਨ ਹਾਲਾਤ ਹੋਰ ਵਿਗੜਦੇ ਵੇਖ ਕੇ ਹਿੰਦੂ ਸੰਤਾਂ ਦੇ ਪੰਚਾਇਤੀ ਨਿਰੰਜਨੀ ਅਖਾੜੇ ਦੇ ਸੈਕਟਰੀ ਮਹੰਤ ਰਵਿੰਦਰਪੁਰੀ ਨੇ ਆਪਣੇ ਅਖਾੜੇ ਵੱਲੋਂ ਕੁੰਭ ਮੇਲੇ ਦੀ ਦਸ ਦਿਨ ਅਗਾਊਂ ਸਮਾਪਤੀ ਦਾ ਐਲਾਨ ਕਰ ਦਿੱਤਾ ਹੈ।
ਇਸ ਮੌਕੇ ਮਹੰਤ ਰਵਿੰਦਰ ਪੁਰੀ ਨੇ ਸਾਫ ਕਿਹਾ ਕਿ ਮੁੱਖ ਸ਼ਾਹੀ ਇਸ਼ਨਾਨ ਸਮਾਪਤ ਹੋ ਗਿਆ ਹੈ, ਉਸ ਪਿੱਛੋਂ ਅਖਾੜਿਆਂ ਵਿੱਚ ਵੱਡੀ ਗਿਣਤੀ ਵਿੱਚ ਸੰਤਾਂ ਤੇ ਭਗਤਾਂ ਵਿੱਚ ਕੋਰੋਨਾ ਦੇ ਲੱਛਣ ਵਿਖਾਈ ਦਿੱਤੇ ਹਨ। ਕੋਰੋਨਾ ਦੇ ਵਧਦੇਕੇਸਾਂ ਨੂੰ ਵੇਖ ਕੇ ਸਾਡੇ ਅਖਾੜੇ ਨੇ 17 ਅਪਰੈਲ ਨੂੰ ਕੁੰਭ ਖ਼ਤਮ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਹ ਅਖਾੜਾ ਪ੍ਰੀਸ਼ਦ ਦਾ ਫੈਸਲਾ ਨਹੀਂ, ਸਾਡੇ ਅਖਾੜੇ ਦਾ ਨਿੱਜੀ ਫੈਸਲਾ ਹੈ। ਬਹੁਤੇ ਅਖਾੜਿਆਂ ਦੀ ਇਹੋ ਰਾਏ ਹੈ ਅਤੇ ਅਸੀਂ ਆਪਣੇ ਅਖਾੜੇ ਵੱਲੋਂ ਕੁੰਭ ਸਮਾਪਤੀ ਦਾ ਐਲਾਨ ਕਰ ਦਿੱਤਾ ਹੈ। ਸਮਝਿਆ ਜਾਂਦਾ ਹੈ ਕਿ ਨਿਰੰਜਨੀ ਅਖਾੜੇ ਤੋਂ ਬਾਅਦ ਬਾਕੀ 6 ਸੰਨਿਆਸੀ ਅਖਾੜੇ ਵੀ ਆਪਣੇ ਕੁੰਭ ਸਮਾਪਤੀ ਦਾ ਐਲਾਨ ਕਰ ਸਕਦੇ ਹਨ, ਜਦੋਂ ਕਿ 27 ਅਪਰੈਲ ਦਾ ਸ਼ਾਹੀ ਇਸਨਾਨ ਹੋਣਾ ਅਜੇ ਬਾਕੀ ਹੈ। ਇਸ ਸ਼ਾਹੀ ਇਸ਼ਨਾਨ ਵਿੱਚਕੁੰਭ ਦੀ ਸਮਾਪਤੀ ਦਾ ਐਲਾਨ ਕਰਨ ਵਾਲੇ ਅਖਾੜਿਆਂ ਦੇ ਬਾਅਦ ਸਿਰਫ 3 ਬੈਰਾਗੀ ਅਖਾੜੇ, ਦੋ ਉਦਾਸੀਨ ਤੇ ਇੱਕ ਨਿਰਮਲ ਅਖਾੜਾ ਹੀ ਰਹਿ ਜਾਣਗੇ। ਇਨ੍ਹਾਂ ਵੱਲੋਂ ਅਗੇਤੀ ਸਮਾਪਤੀ ਦਾ ਐਲਾਨ ਕੀਤਾ ਜਾ ਸਕਦਾ ਹੈ।
ਕੁੰਭ ਦੇ ਮੇਲੇ ਤੋਂ ਇਸ ਦੌਰਾਨ ਇੱਕ ਮਾੜੀ ਖਬਰ ਇਹ ਆਈ ਹੈ ਕਿ ਨਿਰਵਾਣੀ ਅਖਾੜੇ ਦੇ ਮਹਾ ਮੰਡਲੇਸ਼ਵਰ ਸਵਾਮੀ ਕਪਿਲ ਦੇਵ ਦਾ ਕੋਰੋਨਾ ਦੀ ਬਿਮਾਰੀ ਕਾਰਨ ਦੇਹਾਂਤ ਹੋ ਗਿਆ ਹੈ। ਉਹ ਪਿਛਲੇ ਦਿਨੀਂ ਕੋਰੋਨਾ ਦੀ ਲਾਗ ਲੱਗ ਜਾਣ ਕਾਰਨ ਹਸਪਤਾਲ ਦਾਖਲ ਕਰਾਏ ਗਏ ਸਨ, ਪਰ ਇਲਾਜ ਦੇ ਬਾਵਜੂਦ ਉਨ੍ਹਾਂ ਨੂੰ ਬਚਾਇਆ ਨਹੀਂ ਜਾ ਸਕਿਆ ਤੇ ਅੱਜ ਵੀਰਵਾਰ ਨੂੰ ਉਨ੍ਹਾਂ ਦਾ ਦੇਹਾਂਤ ਹੋ ਗਿਆ ਹੈ। ਨਿਰਵਾਣੀ ਅਖਾੜਾ ਚਾਰ ਪ੍ਰਮੁੱਖ ਅਖਾੜਿਆਂ ਵਿੱਚੋਂ ਇੱਕ ਹੈ।
ਭਾਰਤ ਵਿੱਚ ਪੂਰੇ ਦੇਸ਼ ਵਿੱਚ ਕੋਰੋਨਾ ਦੀ ਰਫਤਾਰ ਬੇਕਾਬੂ ਹੋਈ ਸਮਝੀ ਜਾਂਦੀ ਹੈ। ਪਿਛਲੇ 24 ਘੰਟਿਆਂ ਵਿੱਚ ਭਾਰਤ ਵਿੱਚ ਕੋਰੋਨਾ ਦੇ ਲਗਪਗ 2 ਲੱਖ ਤੋਂ ਵੱਧ ਨਵੇਂ ਕੇਸ ਮਿਲੇ ਅਤੇ ਲਗਾਤਾਰ ਦੂਸਰੇ ਦਿਨ ਇਕ ਹਜ਼ਾਰ ਤੋਂ ਵੱਧ ਮੌਤਾਂ ਹੋਈਆਂ ਹਨ। ਇਸ ਦੌਰਾਨ ਮੌਤ ਦਰ ਦੇ ਨਵੇਂ ਰਿਕਾਰਡ ਬਣ ਰਹੇ ਹਨ ਤੇਮ੍ਰਿਤਕਾਂ ਦੇ ਅੰਤਿਮ ਸੰਸਕਾਰ ਲਈ ਉਨ੍ਹਾਂ ਦੇ ਵਾਰਸਾਂ ਨੂੰ ਕਾਫੀ ਉਡੀਕਣਾ ਪੈ ਰਿਹਾ ਹੈ। ਦਿੱਲੀ ਵਿੱਚਪਿਛਲੇ ਚਾਰ ਦਿਨਾਂ ਵਿੱਚ240 ਮੌਤਾਂ ਹੋਈਆਂ ਹਨ ਤੇ ਇਸ ਨਾਲ ਸ਼ਮਸ਼ਾਨ ਘਾਟ ਤੇ ਕਬਰਸਤਾਨ ਦੋਵਾਂ ਥਾਵਾਂ ਉੱਤੇਲਾਸ਼ਾਂ ਦੇ ਅੰਤਿਮ ਸੰਸਕਾਰ ਅਤੇ ਸਪੁਰਦ-ਏ-ਖਾਕ ਕਰਨ ਦੇ ਲਈ ਭੀੜ ਲਗੀ ਹੋਈ ਹੈ। ਦਿੱਲੀ ਦੇ ਆਈਟੀਓਵਿਖੇ ਸਭ ਤੋਂ ਵੱਡੇ ਕੋਵਿਡ ਕਬਰਸਤਾਨ ਵਿੱਚ ਲਾਸ਼ਾਂ ਨੂੰ ਦਫ਼ਨਾਉਣ ਲਈ ਜ਼ਮੀਨ ਘਟਣ ਲੱਗੀ ਹੈ ਤੇ ਸ਼ਮਸ਼ਾਨ ਘਾਟਾਂ ਵਿੱਚਸਿਵੇ ਬੁਝਣ ਦਾ ਨਾਂਅ ਨਹੀਂ ਲੈ ਰਹੇ। ਨਿਗਮਬੋਧ ਘਾਟ ਵਿੱਚ ਲਾਸ਼ਾਂ ਦਾ ਅੰਤਿਮ ਸੰਸਕਾਰ ਕਰਨ ਲਈ ਲੋਕਾਂ ਨੂੰ ਕਈ-ਕਈ ਘੰਟੇ ਉਡੀਕ ਕਰਨੀ ਪੈ ਰਹੀ ਹੈ।