ਆਹਨਾ ਕੁਮਰਾ ਨੇ ਪਿੱਛੇ ਜਿਹੇ ਅਗਲੀ ਸ਼ਾਰਟ ਫਿਲਮ ‘ਹੈਪੀ ਬਰਥ ਡੇਅ’ ਦਾ ਪਹਿਲਾ ਪੋਸਟਰ ਸੋਸ਼ਲ ਮੀਡੀਆ ਉਤੇ ਸ਼ੇਅਰ ਕੀਤਾ। ਇਸ ਦਾ ਨਿਰਦੇਸ਼ਨ ਪ੍ਰਸਾਦ ਕਦਮ ਨੇ ਕੀਤਾ ਹੈ। ਇਸ ਵਿੱਚ ਅਨੁਪਮ ਖੇਰ ਦਾ ਅਹਿਮ ਰੋਲ ਹੈ। ਪੋਸਟਰ ਵਿੱਚ ਅਨੁਪਮ ਕਾਲੇ ਰੰਗ ਦਾ ਕੋਟ ਅਤੇ ਟੋਪੀ ਪਹਿਨੇ ਦਿਖਾਈ ਦੇ ਰਹੇ ਹਨ। ਨਾਲ ਹੀ ਉਸ ਨੇ ਇੱਕ ਸੁੰਦਰ ਗੁਲਾਬੀ ਡ੍ਰੈੱਸ ਫੜੀ ਹੈ, ਜਦ ਕਿ ਆਹਨਾ ਉਸ ਦੇ ਪਿੱਛੇ ਖੜ੍ਹੀ ਦਿਖਾਈ ਦੇ ਰਹੀ ਹੈ। ਕਿਹਾ ਜਾ ਰਿਹਾ ਹੈ ਕਿ ਇਸ ਵਿੱਚ ਆਹਨਾ ਦਾ ਰੋਲ ਬਹੁਤ ਵੱਖਰਾ ਹੈ। ਇਹ ਰੋਲ ਕੁਝ ਅਜਿਹਾ ਹੈ, ਜੋ ਹਰ ਕਿਸੇ ਨੂੰ ਹੈਰਾਨ ਕਰ ਦੇੇਵੇਗਾ।
ਇੰਸਟਾਗ੍ਰਾਮ 'ਤੇ ਪੋਸਟਰ ਨੂੰ ਸ਼ੇਅਰ ਕਰਦੇ ਹੋਏ ਆਹਨਾ ਨੇ ਲਿਖਿਆ, ‘‘ਆਪਣੀ ਸ਼ਾਰਟ ਫਿਲਮ ‘ਹੈਪੀ ਬਰਥ ਡੇਅ’ ਦਾ ਪੋਸਟਰ ਪੇਸ਼ ਕਰ ਕੇ ਉਤਸ਼ਾਹਤ ਹਾਂ।” ਦੂਜੇ ਪਾਸੇ ਅਨੁਪਮ ਖੇਰ ਨੇ ਲਿਖਿਆ, ‘‘ਸਾਡੀ ਫਿਲਮ ਦੇ ਪਹਿਲੇ ਲੁਕ ਨੂੰ ਸ਼ੇਅਰ ਕਰਦੇ ਹੋਏ ਉਤਸ਼ਾਹਤ ਹਾਂ। ਇਹ ਪਹਿਲਾਂ ਹੀ ਕੁਝ ਇੰਟਰਨੈਸ਼ਨਲ ਫਿਲਮ ਫੈਸਟੀਵਲ ਵਿੱਚ ਚੁਣੀ ਜਾ ਚੁੱਕੀ ਹੈ। ਉਮੀਦ ਹੈ ਕਿ ਇਹ ਤੁਾਹਨੂੰ ਵੀ ਪਸੰਦ ਆਵੇਗੀ।” ਆਹਨਾ ਕਹਿੰਦੀ ਹੈ ਕਿ ਉਹ ਕਦੇ ਵੀ ਚੰਗੇ ਕਲਾਕਾਰਾਂ ਨਾਲ ਕੰਮ ਕਰਨ ਦਾ ਮੌਕਾ ਨਹੀਂ ਛੱਡਦੀ ਤੇ ਫਿਲਮ ਦੀ ਚੋਣ ਦੇ ਮਾਮਲੇ ਵਿੱਚ ਚੰਗੀ ਕਹਾਣੀ ਨਾਲ ਵੀ ਕਦੇ ਸਮਝੌਤਾ ਨਹੀਂ ਕਰਦੀ। ਫਿਲਮ ਟ੍ਰੇਡ ਐਨਾਲਿਸਟ ਗਿਰੀਸ਼ ਜੌਹਰ, ਜਿਸ ਨੇ ਇਸ ਸ਼ਾਰਟ ਫਿਲਮ ਦਾ ਸਹਿ ਨਿਰਮਾਣ ਕੀਤਾ ਹੈ, ਨੇ ਦੱਸਿਆ, ‘‘ਇੱਕ ਨੌਜਵਾਨ ਟੀਮ ਵੱਲੋਂ ਬਣਾਈ ਇਹ ਸ਼ਾਰਟ ਫਿਲਮ ਹੈ। ਪ੍ਰਸਾਦ ਇਸ ਦੇ ਨਿਰਦੇਸ਼ਕ ਹਨ। ਇਸ ਵਿੱਚ ਅਨੁਪਮ ਖੇਰ ਸਰ ਜਿਹੇ ਮਹਾਨ ਸਿਤਾਰੇ ਹਨ ਅਤੇ ਸਾਰੇ ਜਾਣਦੇ ਹਨ ਕਿ ਉਹ ਬਿਹਤਰੀਨ ਕਲਾਕਾਰ ਹਨ। ਉਨ੍ਹਾਂ ਨਾਲ ਕੰਮ ਕਰਨ ਵਿੱਚ ਖੁਸ਼ੀ ਹੋਈ। ਫਿਲਮ ਵਿੱਚ ਨੌਜਵਾਨ ਤੇ ਪ੍ਰਤਿਭਾਸ਼ਾਲੀ ਅਭਿਨੇਤਰੀ ਆਨਨਾ ਵੀ ਹੈ। ਅਸੀਂ ਇਸ ਨੂੰ ਮਈ ਵਿੱਚ ਰਿਲੀਜ਼ ਕਰਨ ਦੀ ਵਿਚਾਰ ਕਰ ਰਹੇ ਹਾਂ।” ਪਿਛਲੇ ਸਾਲ ਫਿਲਮ ‘ਖੁਦਾ ਹਾਫਿਜ਼’ ਵਿੱਚ ਆਈ ਆਹਨਾ ਦੀਆਂ ਅਗਲੀਆਂ ਫਿਲਮਾਂ ਵਿੱਚ ‘ਇੰਡੀਆ ਲਾਕਡਾਊਨ’, ‘ਬਾਵਰੀ ਛੋਰੀ' ਤੇ ‘ਸ਼ਮਸ਼ੇਰਾ’ ਆਦਿ ਫਿਲਮਾਂ ਹਨ।