ਪੈਰਿਸ, 9 ਦਸੰਬਰ (ਪੋਸਟ ਬਿਊਰੋ) : ਦੇਸ਼ ਭਰ ਵਿੱਚ ਹੋ ਰਹੇ ਹਿੰਸਕ ਮੁਜ਼ਾਹਰਿਆਂ ਨੂੰ ਰੋਕਣ ਲਈ ਠੋਸ ਮਾਪਦੰਡ ਅਪਨਾਉਣ ਵਾਸਤੇ ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੂਅਲ ਮੈਕਰੌਨ ਉੱਤੇ ਦਬਾਅ ਵੱਧ ਗਿਆ ਹੈ। ਸਾਰਾ ਦੇਸ਼ ਤੇ ਪੂਰੀ ਦੁਨੀਆ ਸੋਮਵਾਰ ਸ਼ਾਮ ਨੂੰ ਮੈਕਰੌਨ ਵੱਲੋਂ ਦਿੱਤੇ ਜਾਣ ਵਾਲੇ ਭਾਸ਼ਣ ਉੱਤੇ ਨਜ਼ਰਾਂ ਗੱਡੀ ਬੈਠੀ ਹੈ। ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਮੈਕਰੌਨ ਦੀ ਚੁੱਪੀ ਨੇ ਹੀ ਪੂਰੇ ਦੇਸ਼ ਤੇ ਸਰਕਾਰ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ।
ਇਹ ਵੀ ਪਤਾ ਲੱਗਿਆ ਹੈ ਕਿ ਮੈਕਰੌਨ ਦੀਆਂ ਨੀਤੀਆਂ ਤੇ ਅਮੀਰਾਂ ਦਾ ਪੱਖ ਪੂਰਨ ਦੀ ਉਨ੍ਹਾਂ ਦੀ ਕਥਿਤ ਫਿਤਰਤ ਕਾਰਨ ਹੀ ਵਧੇ ਹਿੰਸਕ ਮੁਜ਼ਾਹਰਿਆਂ ਨੂੰ ਰੋਕਣ ਤੇ ਸਥਿਤੀ ਉੱਤੇ ਕਾਬੂ ਪਾਉਣ ਲਈ ਕੋਈ ਠੋਸ ਰਣਨੀਤੀ ਲਿਆਉਣ ਵਾਸਤੇ ਮੈਕਰੌਨ ਸਵੇਰ ਵੇਲੇ ਕੌਮੀ ਤੇ ਲੋਕਲ ਅਧਿਕਾਰੀਆਂ ਨਾਲ ਸਲਾਹ ਮਸ਼ਵਰਾ ਕਰਨਗੇ। ਮੈਕਰੌਨ ਐਲਿਸੀ ਪੈਲੇਸ ਤੋਂ ਹੀ ਰਾਤੀਂ 8:00 ਵਜੇ ਜਨਤਾ ਨੂੰ ਸੰਬੋਧਨ ਕਰਨਗੇ।
ਇਸ ਤੋਂ ਪਹਿਲਾਂ ਸਰਕਾਰੀ ਬੁਲਾਰੇ ਬੈਂਜਾਮਿਨ ਗ੍ਰਿਵਾਕਸ ਨੇ ਇੱਕ ਇੰਟਰਵਿਊ ਵਿੱਚ ਆਖਿਆ ਕਿ ਇਸ ਵਿੱਚ ਕੋਈ ਸ਼ੱਕ ਨਹੀਂ ਹੈ ਕਿ ਮੈਕਰੌਨ ਫਰੈਂਚ ਦੇ ਲੋਕਾਂ ਦੇ ਦਿਲਾਂ ਤੱਕ ਪਹੁੰਚਣ ਦਾ ਰਾਹ ਜਾਣਦੇ ਹਨ ਤੇ ਉਨ੍ਹਾਂ ਨੂੰ ਪਤਾ ਹੈ ਕਿ ਉਨ੍ਹਾਂ ਨੇ ਇਨ੍ਹਾਂ ਲੋਕਾਂ ਨਾਲ ਕਿਸ ਤਰ੍ਹਾਂ ਗੱਲ ਕਰਨੀ ਹੈ। ਪਰ ਉਨ੍ਹਾਂ ਇਹ ਵੀ ਆਖਿਆ ਕਿ ਮੁਜ਼ਾਹਰਾਕਾਰੀਆਂ ਦੀਆਂ ਸਾਰੀਆਂ ਦਿੱਕਤਾਂ ਕਿਸੇ ਜਾਦੂ ਦੀ ਛੜੀ ਨਾਲ ਤਾਂ ਹੱਲ ਨਹੀਂ ਹੋਣ ਵਾਲੀਆਂ। ਪਿਛਲੇ ਹਫਤੇ ਮੈਕਰੌਨ ਨੇ ਫਿਊਲ ਟੈਕਸ ਵਿੱਚ ਕੀਤੇ ਵਾਧੇ ਨੂੰ ਵਾਪਿਸ ਲਿਆ ਸੀ। ਇਸ ਮੁੱਦੇ ਕਾਰਨ ਨਵੰਬਰ ਦੇ ਮੱਧ ਤੋਂ ਹੀ ਮੁਜ਼ਾਹਰੇ ਸ਼ੁਰੂ ਹੋ ਗਏ ਸਨ। ਮੈਕਰੌਨ ਵੱਲੋਂ ਅਜਿਹਾ ਮੁਜ਼ਾਹਰਾਕਾਰੀਆਂ ਨੂੰ ਸ਼ਾਂਤ ਕਰਨ ਲਈ ਹੀ ਕੀਤਾ ਗਿਆ ਸੀ। ਪਰ ਇਸ ਕਦਮ ਨੂੰ ਦੇਰੀ ਨਾਲ ਚੁੱਕਿਆ ਗਿਆ ਮਾਮੂਲੀ ਕਦਮ ਦੱਸਿਆ ਗਿਆ।
ਕਈ ਮੁਜ਼ਾਹਰਾਕਾਰੀ ਮੰਨਦੇ ਹਨ ਕਿ ਮੈਕਰੌਨ ਬਹੁਤ ਹੰਕਾਰੀ ਹਨ ਤੇ ਉਨ੍ਹਾਂ ਦੇ ਦਿਲ ਵਿੱਚ ਆਮ ਆਦਮੀਆਂ ਲਈ ਕੋਈ ਦਰਦ ਨਹੀਂ ਹੈ। ਸ਼ਨਿੱਚਰਵਾਰ ਨੂੰ ਵੀ ਉਨ੍ਹਾਂ ਤੋਂ ਅਸਤੀਫੇ ਦੀ ਮੰਗ ਕੀਤੀ ਜਾਂਦੀ ਰਹੀ। ਇਹ ਮੁਜ਼ਾਹਰੇ ਲਗਾਤਾਰ ਚੌਥੇ ਹਫਤੇ ਵਿੱਚ ਪਹੁੰਚ ਗਏ ਹਨ। ਰਿਟਾਇਰ ਲੋਕਾਂ ਨੂੰ ਵੀ ਇਹੋ ਲੱਗ ਰਿਹਾ ਹੈ ਕਿ ਮੈਕਰੌਨ ਸਰਕਾਰ ਦੀਆਂ ਨੀਤੀਆਂ ਕਾਰਨ ਸੱਭ ਤੋਂ ਵੱਧ ਨੁਕਸਾਨ ਉਨ੍ਹਾਂ ਨੂੰ ਹੋ ਰਿਹਾ ਹੈ। ਉਨ੍ਹਾਂ ਦਾ ਵੀ ਇਹੋ ਮੰਨਣਾ ਹੈ ਕਿ ਮੈਕਰੌਨ ਅਮੀਰ ਲੋਕਾਂ ਦਾ ਨੇਤਾ ਹੈ ਉਨ੍ਹਾਂ ਦਾ ਨਹੀਂ।
ਇਸ ਦੌਰਾਨ ਲੇਬਰ ਮੰਤਰੀ ਮੁਰੀਅਲ ਪੈਨੀਕਾਡ ਨੇ ਵੀ ਇਹ ਸਪਸ਼ਟ ਕਰ ਦਿੱਤਾ ਹੈ ਕਿ ਘੱਟ ਤੋਂ ਘੱਟ ਉਜਰਤਾਂ ਵਿੱਚ ਕੋਈ ਵਾਧਾ ਨਹੀਂ ਹੋਵੇਗਾ ਕਿਉਂਕਿ ਇਸ ਨਾਲ ਰੋਜ਼ਗਾਰ ਤਬਾਹ ਹੋ ਜਾਂਦੇ ਹਨ। ਇਸ ਦੌਰਾਨ ਐਤਵਾਰ ਨੂੰ ਟੂਰਿਸਟ ਸਾਈਟਸ ਨੂੰ ਮੁੜ ਖੋਲ੍ਹਿਆ ਗਿਆ ਜਦਕਿ ਵਰਕਰਜ਼ ਨੇ ਮੁਜ਼ਾਹਰਿਆਂ ਕਾਰਨ ਹੋਏ ਨੁਕਸਾਨ ਤੇ ਮਲਬੇ ਨੂੰ ਸਾਫ ਕੀਤਾ। ਇੱਥੇ ਦੱਸਣਾ ਬਣਦਾ ਹੈ ਕਿ ਸ਼ਨਿੱਚਰਵਾਰ ਨੂੰ ਪੈਰਿਸ ਵਿੱਚ 71 ਲੋਕ ਇਨ੍ਹਾਂ ਮੁਜ਼ਾਹਰਿਆਂ ਕਾਰਨ ਜ਼ਖ਼ਮੀ ਹੋਏ।