ਕੋਲਕਾਤਾ, 11 ਅਪ੍ਰੈਲ (ਪੋਸਟ ਬਿਊਰੋ)- ਪੱਛਮੀ ਬੰਗਾਲ ਦੇ ਕੂਚਬਿਹਾਰ ਜ਼ਿਲੇ ਵਿੱਚ ਕੱਲ੍ਹ ਇੱਕ ਵੋਟਿੰਗ ਕੇਂਦਰ ਅੱਗੇ ਅਣਪਛਾਤੇ ਲੋਕਾਂ ਨੇ ਗੋਲੀ ਚਲਾਈ ਅਤੇ ਪਹਿਲੀ ਵਾਰ ਵੋਟ ਪਾਉਣ ਆਏ ਨੌਜਵਾਨ ਦਾ ਕਤਲ ਕਰ ਦਿੱਤਾ। ਤਿ੍ਰਣਮੂਲ ਕਾਂਗਰਸ (ਟੀ ਐਸ ਸੀ) ਨੇ ਦੋਸ਼ ਲਾਇਆ ਕਿ ਕਤਲ ਦੇ ਪਿੱਛੇ ਭਾਜਪਾ ਦਾ ਹੱਥ ਹੈ, ਪਰ ਭਾਜਪਾ ਨੇ ਕਿਹਾ ਕਿ ਨੌਜਵਾਨ ਵੋਟਿੰਗ ਕੇਂਦਰ ਉੱਤੇਉਸ ਦਾ ਪੋਲਿੰਗ ਏਜੰਟ ਸੀ ਅਤੇ ਉਸ ਨੇ ਇਸ ਲਈ ਤ੍ਰਿਣਮੂਲ ਨੂੰ ਦੋਸ਼ੀ ਦੱਸਿਆ ਹੈ।
ਇੱਕ ਪੁਲਸ ਅਧਿਕਾਰੀ ਦੇ ਮੁਤਾਬਕ ਆਨੰਦ ਬਰਮਨ ਨਾਂਅ ਦੇ ਨੌਜਵਾਨ ਨੂੰ ਸਿਤਾਲਕੁਚੀ ਦੇ ਪਠਾਨਤੁਲੀ ਇਲਾਕੇ ਵਿੱਚ ਬੂਥ ਨੰਬਰ 85 ਦੇ ਬਾਹਰ ਘੜੀਸ ਕੇ ਲਿਆਂਦਾ ਗਿਆ ਤੇ ਗੋਲੀ ਮਾਰ ਦਿੱਤੀ ਗਈ। ਘਟਨਾ ਸਮੇਂ ਵੋਟਾਂ ਪੈ ਰਹੀਆਂ ਸਨ। ਇਸ ਘਟਨਾ ਪਿੱਛੋਂ ਤਿ੍ਰਣਮੂਲ ਅਤੇ ਭਾਜਪਾ ਸਮਰਥਕਾਂ ਦੀ ਝੜਪ ਸ਼ੁਰੂ ਹੋ ਗਈ ਤੇ ਵੋਟਿੰਗ ਕੇਂਦਰ ਦੇ ਬਾਹਰ ਬੰਬ ਸੁੱਟੇ ਜਾਣ ਕਾਰਨ ਕਈ ਲੋਕ ਜ਼ਖਮੀ ਹੋ ਗਏ। ਕੇਂਦਰੀ ਸੁਰੱਖਿਆ ਬਲਾਂ ਨੂੰ ਸਥਿਤੀ ਨੂੰ ਕੰਟਰੋਲ ਕਰਨ ਲਈ ਲਾਠੀਚਾਰਜ ਕਰਨਾ ਪਿਆ।ਇੱਕ ਚੋਣ ਅਧਿਕਾਰੀ ਨੇ ਕਿਹਾ ਕਿ ਸਾਨੂੰ ਸੂਚਨਾ ਮਿਲੀ ਕਿ ਕੂਚਬਿਹਾਰ ਜ਼ਿਲੇ ਵਿੱਚ ਸਿਤਾਲਕੁਚੀ ਵਿੱਚ ਇੱਕ ਵੋਟਿੰਗ ਕੇਂਦਰ ਦੇ ਬਾਹਰ ਇੱਕ ਨੌਜਵਾਨ ਦਾ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ ਹੈ। ਅਸੀਂ ਸੁਪਰਵਾਈਜ਼ਰ ਨੂੰ ਛੇਤੀ ਤੋਂ ਛੇਤੀ ਰਿਪੋਰਟ ਦੇਣ ਨੂੰ ਕਿਹਾ ਹੈ ਅਤੇ ਹਾਲਾਤ ਬਾਰੇ ਜਾਣਕਾਰੀ ਲਈ ਹੈ।