ਭੋਪਾਲ, 11 ਅਪ੍ਰੈਲ (ਪੋਸਟ ਬਿਊਰੋ)- ਜਲੰਧਰ ਦੇ ਇੱਕ ਐਮ ਬੀ ਬੀ ਐਸ ਡਾਕਟਰ ਦੀ ਸ਼ਿਕਾਇਤ ਉੱਤੇਮੱਧ ਪ੍ਰਦੇਸ਼ ਪੁਲਸ ਨੇ ਤਿੰਨ ਜਣਿਆਂ ਦੇ ਖਿਲਾਫ ਧੋਖਾਧੜੀ ਦਾ ਕੇਸ ਦਰਜ ਕੀਤਾ ਹੈ।
ਇਸ ਸੰਬੰਧ ਵਿੱਚ ਪੀੜਤ ਦਾ ਕਹਿਣਾ ਹੈ ਕਿ ਦੋਸ਼ੀਆਂ ਨੇ ਇੰਦੌਰ ਦੇ ਇੰਡੈਕਸ ਮੈਡੀਕਲ ਕਾਲਜ ਵਿੱਚ ਐਮ ਡੀ ਦਾ ਦਾਖਲਾ ਦਿਵਾਉਣ ਦੇ ਨਾਂਅ ਉੱਤੇ ਉਸ ਕੋਲੋਂ 22 ਲੱਖ 46 ਹਜ਼ਾਰ ਰੁਪਏ ਹੜੱਪ ਲਏ। ਸਾਰਾ ਸਾਲ ਪਰੇਸ਼ਾਨ ਹੋਣ ਦੇ ਬਾਅਦ ਵੀ ਉਸ ਨੂੰ ਨਾ ਕਾਲਜ ਵਿੱਚ ਸੀਟ ਮਿਲੀ ਅਤੇ ਨਾ ਉਸ ਦੀ ਰਕਮ ਵਾਪਸ ਕੀਤੀ ਗਈ। ਮੱਧ ਪ੍ਰਦੇਸ਼ ਦੇ ਕੋਲਾਰ ਥਾਣਾ ਇੰਚਾਰਜ ਚੰਦਰਕਾਂਤ ਪਟੇਲ ਦੇ ਮੁਤਾਬਕ ਗੋਪਾਲ ਨਗਰ ਜਲੰਧਰ (ਪੰਜਾਬ) ਦਾ ਵਾਸੀ 25 ਸਾਲਾ ਸ਼ੁਭਮ ਸਹਿਗਲ ਐਮ ਬੀ ਬੀ ਐਸ ਕਰ ਚੁੱਕਾ ਹੈ ਅਤੇ ਪੀ ਜੀ ਦਾਖਲੇ ਦੀ ਤਿਆਰੀ ਕਰ ਰਿਹਾ ਹੈ। ਸਾਲ 2020 ਵਿੱਚ ਉਸ ਨੇ ਨੀਟ ਪੀ ਜੀ ਪ੍ਰੀਖਿਆ ਪਾਸ ਕੀਤੀ ਸੀ ਅਤੇ ਉਸ ਨੂੰ ਐਮ ਡੀ ਦੀ ਸੀਟ ਚਾਹੀਦੀ ਸੀ। ਇਸੇ ਦੌਰਾਨ ਉਸ ਦਾ ਸੰਪਰਕ ਵਿਸ਼ਵਜੀਤ ਨਾਂਅ ਦੇ ਨੌਜਵਾਨ ਨਾਲ ਹੋਇਆ, ਜਿਸ ਦਾ ਕਹਿਣਾ ਸੀ ਕਿ ਉਸ ਨੂੰ ਇੰਡੈਕਸ ਮੈਡੀਕਲ ਕਾਲਜ ਵਿੱਚ ਐਮ ਡੀ ਸੀਟ ਮਿਲ ਜਾਏਗੀ। ਉਸ ਨੂੰ ਇੰਦੌਰ ਸੱਦਿਆ ਗਿਆ, ਜਿੱਥੇ ਉਸ ਨੂੰ ਲੈਣ-ਦੇਣ ਦੀ ਗੱਲ ਕਰਨ ਦੇ ਲਈ ਭੋਪਾਲ ਦੇ ਕੋਲਾਰ ਦੇ ਅਨਾਇਤਪੁਰ ਵਿੱਚ ਐਡਵਾਂਸ ਮੈਡੀਕਲ ਕਾਲਜ ਵਿੱਚ ਬੁਲਾਇਆ ਗਿਆ ਤਾਂ ਓਥੇ ਰੋਹਿਤ ਭਦੌਰੀਆ, ਵਿਸ਼ਵਜੀਤ ਅਤੇ ਅਭਿਸ਼ੇਕ ਰਾਜ ਰੰਜਨ ਮਿਲੇ। ਓਦੋਂ ਰੋਹਿਤ ਭਦੌਰੀਆ ਨੇ ਦੱਸਿਆ ਕਿ ਉਹ ਇੰਡੈਕਸ ਮੈਡੀਕਲ ਕਾਲਜ ਦੇ ਚੇਅਰਮੈਨ ਸੁਰੇਸ਼ ਭਦੌਰੀਆ ਦਾ ਭਤੀਜਾ ਹੈ ਤੇ ਉਨ੍ਹਾਂ ਦੇ ਗਰੁੱਪ ਦੇ ਇੰਡੈਕਸ ਮੈਡੀਕਲ ਕਾਲਜ ਇੰਦੌਰ, ਐਡਵਾਂਸ ਮੈਡੀਕਲ ਕਾਲਜ ਭੋਪਾਲ ਅਤੇ ਅਮਲਤਾਸ ਮੈਡੀਕਲ ਕਾਲਜ ਦੀ ਪ੍ਰਵੇਸ਼ ਪ੍ਰੀਖਿਆ ਉਸ ਦੇ ਜ਼ਿੰਮੇ ਹੈ। ਸੁ਼ਭਮ ਨੇ ਭਰੋਸਾ ਕਰ ਕੇ ਦੋਸ਼ੀਆਂ ਨੂੰ ਫਰਵਰੀ 2020 ਵਿਚ ਸੱਤ ਲੱਖ ਨਕਦ ਅਤੇ ਬਾਕੀ ਰਕਮ 22 ਲੱਖ 46 ਹਜ਼ਾਰ ਰੁਪਏ ਦੋਸ਼ੀਆਂ ਨੂੰ ਦੇ ਦਿੱਤੇ ਸਨ।
ਪੀੜਤ ਸ਼ੁਭਮ ਸਹਿਗਲ ਨੇ ਦੱਸਿਆ ਕਿ ਦੋਸ਼ੀ ਰੋਹਿਤ ਭਦੌਰੀਆ ਦਾ ਇੰਦੌਰ ਦੇ ਇੰਡੈਕਸ ਮੈਡੀਕਲ ਕਾਲਜ ਵਿੱਚ ਚੰਗਾ ਰਸੂਖ ਸੀ। ਇਨ੍ਹਾਂ ਲੋਕਾਂ ਨੇ ਉਨ੍ਹਾਂ ਨੂੰ ਪੂਰਾ ਕਾਲਜ ਘੁੰਮਾਇਆ ਤੇ ਉਸ ਨੂੰ ਦੇਖ ਕੇ ਲੱਗਦਾ ਸੀ ਕਿ ਉਹ ਉਸ ਕਾਲਜ ਕਮੇਟੀ ਵਿੱਚ ਹੈ। ਇਸੇ ਤਰ੍ਹਾਂ ਭੋਪਾਲ ਦੇ ਐਡਵਾਂਸ ਕਾਲਜ ਵਿੱਚ ਵੀ ਰੋਹਿਤ ਨੂੰ ਕਾਲਜ ਵਿੱਚ ਇੱਕ ਚੈਂਬਰ ਵਿੱਚ ਮਿਲਿਆ ਸੀ। ਉਸ ਦਾ ਆਪਣਾ ਕੈਬਿਨ ਸੀ, ਇਸ ਲਈ ਉਹ ਇਸ ਠੱਗ ਦੇ ਜਾਲ ਵਿੱਚ ਫਸ ਗਿਆ। ਦੋਸ਼ੀ ਨੇ ਉਸ ਨੂੰ ਧਮਕੀ ਵੀ ਦਿੱਤੀ ਸੀ ਕਿ ਪੁਲਸ ਵਿੱਚ ਸ਼ਿਕਾਇਤ ਕੀਤੀ ਤਾਂ ਜਾਣਦਾ ਨਹੀਂ, ਇਥੇ ਪੁਲਸ ਅਤੇ ਪ੍ਰਸ਼ਾਸਨ ਸਭ ਉਨ੍ਹਾਂ ਦਾ ਹੈ।