ਹਾਂਗਕਾਂਗ, 9 ਦਸੰਬਰ (ਪੋਸਟ ਬਿਊਰੋ)- ਹਾਂਗਕਾਂਗ ਦੇ ਜਹਾਜ਼ਾਂ ਦੀਆਂ ਮਹਿਲਾ ਪਾਇਲਟਾਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਕਈ ਵਾਰ ਸੈਕਸ ਸ਼ੋਸ਼ਣ ਝੱਲਣਾ ਪਿਆ ਹੈ। ‘ਮੀ ਟੂ` ਅੰਦੋਲਨ `ਚ ਇਨ੍ਹਾਂ ਨੇ ਸ਼ਿਕਾਇਤਾਂ ਵੀ ਕੀਤੀਆਂ ਹਨ।
ਇਸ ਬਾਰੇ ਹਾਂਗਕਾਂਗ ਦੀ ਇਕ ਪਾਇਲਟ ਨੇ ਕਿਹਾ ਕਿ ਉਨ੍ਹਾਂ ਨੂੰ ਨਾ ਸਿਰਫ ਯਾਤਰੀ ਪ੍ਰੇਸ਼ਾਨ ਕਰਦੇ ਹਨ, ਜਹਾਜ਼ ਦੇ ਕਰਿਊ ਸਟਾਫ ਵਾਲੇ ਵੀ ਘੱਟ ਨਹੀਂ। ਉਨ੍ਹਾਂ ਕਿਹਾ ਕਿ ਏਅਰ ਲਾਈਨਾਂ ਨੇ ਸਹੀ ਦਿਸ਼ਾ `ਚ ਕੁਝ ਕਦਮ ਚੁੱਕੇ ਹਨ, ਪਰ ਉਹ ਅਜੇ ‘ਮੀ ਟੂ` ਦੇ ਦੌਰ ਵਿੱਚ ਮਹੱਤਵ ਪੂਰਨ ਕਦਮ ਚੁੱਕਣ ਬਾਰੇ ਪਿੱਛੇ ਹਨ। ਹਾਂਗਕਾਂਗ ਕੈਬਿਨ ਅਟੈਂਡੈਂਟ ਯੂਨੀਅਨ ਦੀ ਅਗਵਾਈ ਕਰਨ ਵਾਲੀ ਵੇਨਸ ਫੰਗ ਨੇ ਕਿਹਾ ਕਿ ਏਅਰ ਲਾਈਨਾਂ ਨੂੰ ਆਪਣੇ ਸਟਾਫ ਨੂੰ ਪੀੜਤ ਹੋਣ ਤੋਂ ਬਚਣ ਬਾਰੇ ਵੀ ਜ਼ਰੂਰ ਦੱਸਣਾ ਚਾਹੀਦਾ ਹੈ। ਫੰਗ ਦਾ ਕਹਿਣਾ ਹੈ ਕਿ ਆਪਣੇ ਦੁਖੀ ਤਜਰਬੇ ਕਾਰਨ ਉਹ ਯੂਨੀਅਨ `ਚ ਸ਼ਾਮਲ ਹੋਈ ਸੀ। ਉਸ ਨੇ ਦੱਸਿਆ ਕਿ ਜਦ ਉਹ ਇਸ ਨੌਕਰੀ ਵਿੱਚ ਨਵੀਂ ਸੀ ਤਾਂ ਇਕ ਪਾਇਲਟ ਨੇ ਉਸ ਨੂੰ ਗਲਤ ਢੰਗ ਨਾਲ ਹੱਥ ਲਾਇਆ ਸੀ। ਉਸ ਦਾ ਕਹਿਣਾ ਹੈ ਕਿ ਘਟਨਾ ਸਮੇਂ ਕੈਬਿਨ ਪ੍ਰਬੰਧਕ ਨੇ ਇਸ ਬਾਰੇ ਦਖਲ ਦੇਣ ਦੀ ਥਾਂ ਉਸੇ ਨੂੰ ਧਮਕੀ ਦੇ ਦਿੱਤੀ ਸੀ। ਅੱਜ ਕੱਲ੍ਹ ਉਹ ਇਕ ਯੂਰਪੀ ਏਅਰਲਾਈਨ `ਚ ਕੰਮ ਕਰਦੀ ਹੈ।