ਫ਼ਰੀਦਾਬਾਦ, 25 ਮਾਰਚ (ਪੋਸਟ ਬਿਊਰੋ)- ਹਰਿਆਣਾ ਦੇ ਇਸ ਜ਼ਿਲ੍ਹੇ ਦੇ ਬਹੁ-ਚਰਚਿਤ ਨਿਕਿਤਾ ਤੋਮਰ ਕਤਲ ਕੇਸ ਦੇ ਦੋ ਦੋਸ਼ੀਆਂ ਤੌਸੀਫ ਤੇ ਰੇਹਾਨ ਨੂੰ ਫਾਸਟ ਟ੍ਰੈਕ ਕੋਰਟ ਨੇ ਦੋਸ਼ੀ ਕਰਾਰ ਦਿੱਤਾ ਹੈ। ਕਤਲ ਲਈ ਵਰਤਿਆ ਹਥਿਆਰ ਤੌਸੀਫ ਨੂੰ ਦਿਵਾਉਣ ਵਾਲੇ ਤੀਜੇ ਦੋਸ਼ੀ ਅਜ਼ਹਰੂਦੀਨ ਨੂੰ ਬਰੀ ਕਰ ਦਿੱਤਾ ਗਿਆ ਹੈ। ਕੇਸ ਦੀ ਸੁਣਵਾਈ ਕੱਲ੍ਹ ਪੂਰੀ ਹੋ ਗਈ ਅਤੇ ਕੋਰਟ ਨੇ ਦੋ ਮੁਲਜ਼ਮਾਂ ਨੂੰ ਦੋਸ਼ੀ ਕਰਾਰ ਦਿੱਤਾ ਸੀ। ਸਜ਼ਾ ਦਾ ਐਲਾਨ 26 ਮਾਰਚ ਨੂੰ ਕੀਤਾ ਜਾਵੇਗਾ।
ਵਰਨਣ ਯੋਗ ਹੈ ਕਿ ਇਹ ਕੇਸ ਐਡੀਸ਼ਨਲ ਸੈਸ਼ਨ ਜੱਜ ਸਰਤਾਜ ਬਾਸਵਾਨਾ ਦੀ ਫਾਸਟ ਟ੍ਰੈਕ ਕੋਰਟ ਵਿੱਚ ਚੱਲ ਰਿਹਾ ਸੀ।ਪੰਜਾਬ ਹਰਿਆਣਾ ਹਾਈ ਕੋਰਟ ਦੇ ਹੁਕਮ ਉੱਤੇ ਇਸ ਕੇਸ ਦੀ ਸੁਣਵਾਈ ਐਡੀਸ਼ਨਲ ਸੈਸ਼ਨ ਜੱਜ ਸਰਤਾਜ ਬਾਸਵਾਨਾ ਦੀ ਕੋਰਟ ਵਿੱਚ ਸ਼ੁਰੂ ਹੋਈ ਅਤੇ ਇੱਕ ਦਸੰਬਰ ਨੂੰ ਪਹਿਲੀ ਗਵਾਹੀ ਕਰਵਾਈ ਗਈ, ਜਿਸ ਵਿੱਚ ਘਟਨਾ ਦੇ ਚਸ਼ਮਦੀਦ ਨਿਕਿਤਾ ਦੇ ਚਚੇਰੇ ਭਰਾ ਤਰੁਣ ਤੋਮਰ ਅਤੇ ਸਹੇਲੀ ਨਿਕਿਤਾ ਸ਼ਰਮਾ ਸ਼ਾਮਲ ਹੋਏ। ਬਚਾਅ ਧਿਰ ਵੱਲੋਂ 55 ਲੋਕਾਂ ਨੇ ਗਵਾਹੀ ਦਿੱਤੀ, ਜਿਨ੍ਹਾਂ ਵਿੱਚ ਪਰਵਾਰ ਦੇ ਮੈਂਬਰਾਂ ਤੇ ਕਾਲਜ ਦੇ ਪ੍ਰਿੰਸੀਪਲ ਸਮੇਤ ਕਈ ਪੁਲਸ ਮੁਲਾਜ਼ਮ ਸ਼ਾਮਲ ਹੋਏ। ਬਚਾਅ ਧਿਰ ਨੇ ਦੋ ਦਿਨਾਂ ਵਿੱਚ ਆਪਣੇ ਗਵਾਹ ਪੇਸ਼ ਕੀਤੇ ਅਤੇ ਗਵਾਹਾਂ ਦੇ ਬਿਆਨ ਦਰਜ ਕਰਵਾਏ। ਕੱਲ੍ਹ ਦੋਵਾਂ ਧਿਰਾਂ ਵੱਲੋਂ ਗਵਾਹੀਆਂ ਪੂਰੀਆਂ ਹੋ ਗਈਆਂ।ਕੋਰਟ ਰੂਮ ਵਿੱਚ ਜਦੋਂ ਤਿੰਨੋਂ ਦੋਸ਼ੀਆਂ ਨੂੰ ਪੇਸ਼ ਕੀਤਾ ਤਾਂ ਉਨ੍ਹਾਂ ਵਿੱਚੋਂ ਇੱਕ ਦੋਸ਼ੀ ਅਜ਼ਰੂ ਘਬਰਾਹਟ ਨਾਲ ਬੇਹੋਸ਼ ਹੋ ਗਿਆ। ਉਸ ਦੇ ਹੋਸ਼ ਵਿੱਚ ਆਉਣ ਪਿੱਛੋਂ ਜੱਜ ਨੇ ਫੈਸਲਾ ਸੁਣਾਇਆ। ਨਿਕਿਤਾ ਤੋਮਰ ਵਾਲੇ ਪੱਖ ਦੇ ਐਡਵੋਕੇਟ ਐਦਲ ਸਿੰਘ ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ ਕੁਲ 57 ਗਵਾਹਾਂ ਦੀ ਗਵਾਹੀ ਹੋ ਚੁੱਕੀ ਹੈ। ਬਚਾਅ ਧਿਰ ਵੱਲੋਂ ਵਕੀਲ ਅਨਵਰ ਖਾਨ, ਅਨੀਸ ਖਾਨ ਤੇ ਪੀ ਐਲ ਗੋਇਲ ਨੇ ਮੁਲਜ਼ਮਾਂ ਦੇ ਬਚਾਅ ਵਿੱਚ ਵੱਖ-ਵੱਖ ਪੱਖ ਰੱਖੇ। ਇਸ 26 ਮਾਰਚ ਨੂੰ ਇਸ ਮਾਮਲੇ ਨੂੰ ਪੂਰੇ ਪੰਜ ਮਹੀਨੇ ਹੋ ਜਾਣਗੇ।