ਅਭਿਨੇਤਰਾ ਨਵਾਜ਼ੂਦੀਨ ਸਿੱਦੀਕੀ ਦਾ ਮੰਨਣਾ ਹੈ ਕਿ ਉਸ ਨੇ ਪੰਜਾਬੀ ਸੰਗੀਤ ਇੰਡਸਟਰੀ ਨੂੰ ਹਮੇਸ਼ਾ ਉਚੇ ਪੱਧਰ ਤੇ ਰੱਖਿਆ ਹੈ। ਉਹ ਗੀਤ ‘ਬਾਰਿਸ਼ ਕੀ ਜਾਏ’ ਦੀ ਵੀਡੀਓ ਵਿੱਚ ਪੰਜਾਬੀ ਗਾਇਕਾ ਅਤੇ ਅਦਾਕਾਰਾ ਸੁਨੰਦਾ ਸ਼ਰਮਾ ਨਾਲ ਨਵੀਂ ਸ਼ੁਰੂਆਤ ਕਰਦੇ ਦਿੱਸਣਗੇ। ਨਵਾਜ਼ੂਦੀਨ ਨੇ ਕਿਹਾ, ‘‘ਕਈ ਸਾਲਾਂ ਤੋਂ ਗੈਰ ਫਿਲਮੀ ਮਿਊਜ਼ਿਕ ਵੀਡੀਓ ਕਰਨਾ ਮੇਰੀ ਛੁਪੀ ਇੱਛਾ ਸੀ, ਪਰ ਅਜਿਹਾ ਪ੍ਰਾਜੈਕਟ ਦੇ ਕੰਮ ਦਾ ਕਦੇ ਮੌਕਾ ਨਹੀਂ ਮਿਲਿਆ, ਜਿਸ ਨਾਲ ਮੈਂ ਕੁਝ ਵੱਖਰਾ ਕਰ ਸਕਾਂ।” ਉਨ੍ਹਾਂ ਕਿਹਾ, ‘ਬਾਰਿਸ਼ ਕੀ ਜਾਏ’ ਗੀਤ ਨਾਲ ਉਸ ਨੂੰ ਆਪਣੀ ਇਹ ਇੱਛਾ ਪੂਰੀ ਕਰਨ ਦਾ ਮੌਕਾ ਮਿਲਿਆ। ਉਸ ਨੇ ਕਿਹਾ, ‘‘ਮੈਂ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਨੂੰ ਹਮੇਸ਼ਾ ਉਚੇ ਸਥਾਨ ਉੱਤੇ ਰੱਖਦਾ ਹਾਂ ਅਤੇ ਇਸ ਰੰਗ-ਬਿਰੰਗੇ, ਪ੍ਰਮਾਣਿਕ ਅਤੇ ਅਮੀਰ ਇੰਡਸਟਰੀ ਨਾਲ ਨਵੀਂ ਸ਼ੁਰੂਆਤ ਕਰਨਾ ਸੱਚਮੁੱਚ ਸ਼ਾਨਦਾਰ ਹੈ।”
ਨਵਾਜ਼ੂਦੀਨ ਨੇ ਕਿਹਾ, ‘‘ਇਸ ਨੂੰ ਖੇਤਰੀ ਕਹਿਣਾ ਗਲਤ ਹੋਵੇਗਾ। ਇੱਕ ਸਮਾਂ ਸੀ, ਜਦੋਂ ਗਾਇਕ ਕਦੇ ਕਦਾਈਂ ਬਾਲੀਵੁੱਡ ਟ੍ਰੈਕ ਵਿੱਚ ਆਉਂਦੇ ਸਨ, ਪਰ ਮੈਨੂੰ ਲੱਗਦਾ ਹੈ ਕਿ ਅੱਜ ਭੂਮਿਕਾ ਇਸ ਦੇ ਉਲਟ ਹੈ ਅਤੇ ਅਦਾਕਾਰ ਮਿਊਜ਼ਿਕ ਵੀਡੀਓ ਤੱਕ ਪਹੁੰਚ ਕਰਦੇ ਹਨ ਕਿਉਂਕਿ ਉਹ ਇਨ੍ਹਾਂ ਦਾ ਮਹੱਤਵ ਸਮਝਦੇ ਹਨ। ਦਰਅਸਲ ਇਹ ਮਿਊਜ਼ਿਕ ਇੰਡਸਟਰੀ ਲਈ ਅੱਗੇ ਵਧਣ ਦਾ ਸਮਾਂ ਹੈ।” ਸੁਨੰਦਾ ਸ਼ਰਮਾ ਬਾਰੇ ਨਵਾਜ਼ੂਦੀਨ ਨੇ ਕਿਹਾ ਕਿ ਉਹ ਇੱਕ ਕਮਾਲ ਦੀ ਗਾਇਕਾ ਹੈ ਅਤੇ ਅਦਾਕਾਰੀ ਦੀ ਯੋਗਤਾ ਵੀ ਰੱਖਦੀ ਹੈ। ਉਸ ਨੇ ਕਿਹਾ ਕਿ ਸੁਨੰਦਾ ਨਾਲ ਕੰਮ ਕਰਨਾ ਉਨ੍ਹਾਂ ਲਈ ਕਾਫੀ ਮਜ਼ੇਦਾਰ ਤਜਰਬਾ ਰਿਹਾ ਹੈ। ‘ਬਾਰਿਸ਼ ਕੀ ਜਾਏ’ ਗਾਣੇ ਦੇ ਬੋਲ ਜਾਨੀ ਨੇ ਲਿਖੇ ਹਨ ਤੇ ਇਸ ਨੂੰ ਬੀ ਪਰਾਕ ਨੇ ਗਾਇਆ ਹੈ। ਇਸ ਗਾਣੇ ਦੀ ਵੀਡੀਓ ਅਰਵਿੰਦਰ ਖਹਿਰਾ ਨੇ ਬਣਾਈ ਹੈ, ਜੋ 27 ਮਾਰਚ ਨੂੰ ਰਿਲੀਜ਼ ਹੋਵੇਗੀ। ਗਾਣੇ ਦਾ ਟਰੇਲਰ ਰਿਲੀਜ਼ ਹੋ ਚੁੱਕਿਆ ਹੈ, ਜਿਸ ਨੂੰ ਦਰਸ਼ਕਾਂ ਨੇ ਕਾਫੀ ਪਸੰਦ ਕੀਤਾ ਹੈ।