ਵਾਸ਼ਿੰਗਟਨ, 7 ਦਸੰਬਰ (ਪੋਸਟ ਬਿਊਰੋ)- ਅਮਰੀਕਾ ਦੀ ਡੋਨਾਲਡ ਟਰੰਪ ਸਰਕਾਰ ਨੇ ਪਾਰਲੀਮੈਂਟਰੀ ਸੁਣਵਾਈ ਦੌਰਾਨ ਆਪਣੇ ਦੇਸ਼ ਦੇ ਪਾਰਲੀਮੈਂਟ ਮੈਂਬਰਾਂ ਨੂੰ ਦੱਸਿਆ ਕਿ ਚੀਨ ਦੇ ਨਜ਼ਰਬੰਦੀ ਕੈਂਪਾਂ ਵਿੱਚ ਅੱਠ ਤੋਂ 20 ਲੱਖ ਤੱਕ ਧਾਰਮਿਕ ਘੱਟ ਗਿਣਤੀ ਦੇ ਲੋਕ ਬੰਦ ਹਨ। ਇਸ ਤੋਂ ਪਹਿਲਾਂ ਅਮਰੀਕੀ ਪਾਰਲੀਮੈਂਟ ਮੈਂਬਰਾਂ ਨੇ ਚੀਨ ਦੇ ਸ਼ਿਨਜਿਆਂਗ ਪ੍ਰਾਂਤ ਵਿੱਚ ਵਿਆਪਕ ਪੱਧਰ 'ਤੇ ਮਨੁੱਖੀ ਅਧਿਕਾਰ ਦੇ ਉਲੰਘਣ ਨੂੰ ਲੈ ਚਿੰਤਾ ਪ੍ਰਗਟ ਕੀਤੀ ਹੈ।
ਪਾਰਲੀਮੈਂਟਰੀ ਸੁਣਵਾਈ ਦੌਰਾਨ ‘ਬਿਊਰੋ ਆਫ ਹਿਊਮਨ ਰਾਈਟ ਡੋਮੋਕ੍ਰੇਸੀ ਐਂਡ ਲੇਬਰ' ਵਿੱਚ ਉਪ ਸਹਾਇਕ ਵਿਦੇਸ਼ ਮੰਤਰੀ ਸਕਾਟ ਬਸਬੀ ਨੇ ਦੋਸ਼ ਲਾਇਆ ਕਿ ਚੀਨ ਦੁਨੀਆ ਦੇ ਹੋਰ ਤਾਨਾਸ਼ਾਹ ਸ਼ਾਸਨਾਂ ਦੇ ਅਜਿਹੇ ਦਮਨ ਵਾਲੇ ਕਦਮਾਂ ਦਾ ਸਮਰਥਨ ਵੀ ਕਰਦਾ ਹੈ। ਉਨ੍ਹਾਂ ਨੇ ਕਿਹਾ, ‘ਅਮਰੀਕਾ ਸਰਕਾਰ ਦਾ ਮੁਲੰਕਣ ਹੈ ਕਿ ਅਪ੍ਰੈਲ 2017 ਤੋਂ ਚੀਨੀ ਅਧਿਕਾਰੀਆਂ ਨੇ ਉਈਗਰ, ਕਜ਼ਾਕ ਅਤੇ ਹੋਰ ਮੁਸਲਿਮ ਘੱਟ ਗਿਣਤੀ ਭਾਈਚਾਰਿਆਂ ਦੇ ਅੱਠ ਲੱਖ ਤੋਂ 20 ਲੱਖ ਮੈਂਬਰਾਂ ਨੂੰ ਨਜ਼ਰਬੰਦੀ ਕੈਂਪਾਂ ਵਿੱਚ ਅਣਮਿਥੇ ਸਮੇਂ ਲਈ ਬੰਦ ਕਰ ਰੱਖਿਆ ਹੈ।' ਸੀਨੇਟ ਦੀ ਵਿਦੇਸ਼ ਮਾਮਲਿਆਂ ਦੀ ਉਪ ਕਮੇਟੀ ਦੇ ਸਾਹਮਣੇ ਬਸਬੀ ਨੇ ਦੱਸਿਆ ਕਿ ਸੂਚਨਾਵਾਂ ਦੇ ਅਨੁਸਾਰ ਹਿਰਾਸਤ ਵਿੱਚ ਰੱਖੇ ਬਹੁਤੇ ਲੋਕਾਂ ਖਿਲਾਫ ਕੋਈ ਦੋਸ਼ ਨਹੀਂ ਲਾਇਆ ਗਿਆ ਅਤੇ ਉਨ੍ਹਾਂ ਦੇ ਪਰਵਾਰਕ ਮੈਂਬਰਾਂ ਨੂੰ ਉਨ੍ਹਾਂ ਦੇ ਟਿਕਾਣਿਆਂ ਬਾਰੇ ਬੜੀ ਘੱਟ ਜਾਂ ਕੋਈ ਜਾਣਕਾਰੀ ਨਹੀਂ।
ਸ਼ੁਰੂ ਵਿੱਚ ਚੀਨ ਨੇ ਅਜਿਹੇ ਕੈਂਪਾਂ ਦੀ ਹੋਂਦ ਤੋਂ ਇਨਕਾਰ ਕੀਤਾ ਸੀ, ਪਰ ਇਸ ਬਾਰੇ ਜਨਤਕ ਰੂਪ ਨਾਲ ਖਬਰਾਂ ਆਉਣ ਪਿੱਛੋਂ ਚੀਨੀ ਅਧਿਕਾਰੀ ਦੱਸਦੇ ਹਨ ਕਿ ਇਹ ਕੇਂਦਰ ‘ਕਾਰੋਬਾਰੀ ਸਿੱਖਿਆ ਕੇਂਦਰ' ਹਨ। ਬਸਬੀ ਨੇ ਕਿਹਾ, ਇਹ ਤੱਥ ਗਲਤ ਹੈ, ਕਿਉਂਕਿ ਉਨ੍ਹਾਂ ਕੈਂਪਾਂ ਵਿੱਚ ਕਈ ਪ੍ਰਸਿੱਧ ਉਈਗਰ ਬੁੱਧੀਜੀਵੀ ਅਤੇ ਸੇਵਾਮੁਕਤ ਪੇਸ਼ੇਵਰ ਵੀ ਹਨ।