ਸਾਲ 2020 ਵਿੱਚ ਕਈ ਵੱਡੀਆਂ ਫਿਲਮਾਂ ਦੇ ਰਿਲੀਜ਼ ਨਾ ਹੋ ਸਕਣ ਕਾਰਨ ਇਸ ਸਾਲ ਬਾਕਸ ਆਫਿਸ ਉੱਤੇ ਟਕਰਾਅ ਹੋਣਾ ਲਾਜ਼ਮੀ ਹੈ। ਇਹ ਟੱਕਰ ਈਦ ਉੱਤੇ ਦੇਖੀ ਜਾਵੇਗੀ। ਪਿਛਲੇ ਕੁਝ ਸਾਲਾਂ ਤੋਂ ਸਲਮਾਨ ਖਾਨ ਆਪਣੀਆਂ ਫਿਲਮਾਂ ਨੂੰ ਈਦ ਉੱਤੇ ਰਿਲੀਜ਼ ਕਰ ਰਹੇ ਹਨ। ਇਸ ਸਾਲ ਫਿਰ ਸਲਮਾਨ ਖਾਨ ਈਦ, ਯਾਨੀ 13 ਮਈ, ਨੂੰ ਆਪਣੀ ਫਿਲਮ ‘ਰਾਧੇ: ਯੋਰ ਮੋਸਟ ਵਾਂਟਿਡ ਭਾਈ’ ਨੂੰ ਸਿਨੇਮਾਘਰਾਂ ਵਿੱਚ ਲਿਆਉਣ ਦਾ ਐਲਾਨ ਕਰ ਚੁੱਕੇ ਹਨ। ਅੱਗੋਂ ਜਾਨ ਅਬਰਾਹਮ ਨੇ ਵੀ ਆਪਣੀ ਫਿਲਮ ‘ਸਤਿਆਮੇਵ ਜਯਤੇ 2’ ਨੂੰ ਉਸੇ ਦਿਨ ਰਿਲੀਜ਼ ਕਰਨ ਦਾ ਐਲਾਨ ਕੀਤਾ ਹੈ।
ਜਾਨ ਨੇ ਫਿਲਮ ਦਾ ਨਵਾਂ ਪੋਸਟਰ ਰਿਲੀਜ਼ ਕਰਦੇ ਹੋਏ ਇੰਸਟਾਗ੍ਰਾਮ ਉੱਤੇ ਲਿਖਿਆ, ‘ਇਸ ਈਦ ਉੱਤੇ ਸੱਤਿਆ ਬਨਾਮ ਜੈ ਲੜਨਗੇ, ਦੋਵੇਂ ਭਾਰਤ ਮਾਂ ਦੇ ਲਾਲ।’ ਪਹਿਲਾਂ ‘ਸੱਤਿਆਮੇਵ ਜਯਤੇ 2’ ਦੀ ਰਿਲੀਜ਼ ਤਰੀਕ 13 ਮਈ ਤੈਅ ਸੀ। ਇਸ ਦੀ ਸੂਚਨਾ ਜਾਨ ਨੇ ਇਸ ਸਾਲ ਗਣਤੰਤਰ ਦਿਵਸ ਮੌਕੇ ਇੰਸਟਾਗ੍ਰਾਮ ਉੱਤੇ ਦਿੱਤੀ ਸੀ। ‘ਸੱਤਿਆਮੇਵ ਜਯਤੇ 2’ ਫਿਲਮ ਸਾਲ 2018 ਵਿੱਚ ਰਿਲੀਜ਼ ਫਿਲਮ ‘ਸੱਤਿਆਮੇਵ ਜਯਤੇ’ ਦੀ ਸੀਕਵਲ ਹੈ। ਫਿਲਮ ਦਾ ਨਿਰਦੇਸ਼ਨ ਮਿਲਾਪ ਜਾਵੇਰੀ ਨੇ ਕੀਤਾ ਹੈ। ਓਧਰ ਆਦਰ ਜੈਨ, ਜੈਕੀ ਸ਼ਰਾਫ ਅਤੇ ਸ਼ਲੋਕਾ ਪੰਡਿਤ ਦੀ ਫਿਲਮ ‘ਹੈਲੋ ਚਾਰਲੀ’ ਨੌਂ ਅਪ੍ਰੈਲ ਨੂੰ ਅਮੇਜ਼ਨ ਪ੍ਰਾਈਮ ਵੀਡੀਓ ਉੱਤੇ ਰਿਲੀਜ਼ ਹੋਵੇਗੀ। ਇਸ ਦੇ ਨਿਰਮਾਤਾ ਰਿਤੇਸ਼ ਸਿਧਵਾਨੀ ਤੇ ਫਰਹਾਨ ਅਖਤਰ ਹਨ।