ਕ੍ਰਿਤੀ ਸਨਨ ਫਿਲਮ ‘ਰਹਿਨਾ ਹੈ ਤੇਰੇ ਦਿਲ ਮੇਂ’ ਦੇ ਸੀਕਵਲ ਵਿੱਚ ਕੰਮ ਕਰਦੀ ਦਿੱਸ ਸਕਦੀ ਹੈ। ਸਾਲ 2001 ਵਿੱਚ ਆਈ ‘ਰਹਿਨਾ ਹੈ ਤੇਰੇ ਦਿਲ ਮੇਂ’ ਵਿੱਚ ਆਰ ਮਾਧਵਨ, ਦੀਆ ਮਿਰਜ਼ਾ ਅਤੇ ਸੈਫ ਅਲੀ ਖਾਨ ਨੇ ਮੁੱਖ ਭੂਮਿਕਾ ਨਿਭਾਈ ਸੀ। ਫਿਲਮ ਮੇਕਰ ਵਾਸੂ ਭਗਨਾਨੀ ਦੇ ਬੇਟੇ ਜੈਕੀ ਭਗਨਾਨੀ ਇਸ ਫਿਲਮ ਦਾ ਸੀਕਵਲ ਬਣਾਉਣ ਲੱਗੇ ਹਨ।
ਦੱਸਿਆ ਜਾ ਰਿਹਾ ਹੈ ਕਿ ਜੈਕੀ ਭਗਨਾਨੀ ਫਿਲਮ ‘ਰਹਿਨਾ ਹੈ ਤੇਰੇ ਦਿਲ ਮੇਂ’ ਫਿਰ ਬਣਾਉਣਾ ਚਾਹੁੰਦੇ ਹਨ ਜਿਸ ਵਿੱਚ ਉਹ ਫਿਰ ਆਰ ਮਾਧਵਨ, ਦੀਆ ਮਿਰਜ਼ਾ ਅਤੇ ਸੈਫ ਅਲੀ ਖਾਨ ਨੂੰ ਲੈਣਾ ਚਾਹੁੰਦੇ ਸਨ। ਸ਼ੁਰੂਆਤੀ ਪਲਾਨ ਮੁਤਾਬਕ ਉਹ ਵੀਹ ਸਾਲ ਬਾਅਦ ਦੀ ਕਹਾਣੀ ਦਿਖਾਉਣਾ ਚਾਹੁੰਦੇ ਹਨ। ਜੈਕੀ ਕਰੀਬ ਇੱਕ ਸਾਲ ਤੋਂ ਇਸ ਫਿਲਮ ਦੀ ਕਾਸਟਿੰਗ 'ਤੇ ਕੰਮ ਕਰ ਰਹੇ ਹਨ। ਮਾਧਵਨ, ਸੈਫ ਅਤੇ ਦੀਆ ਨੂੰ ਫਿਰ ਇਕੱਠੇ ਲਿਆਉਣਾ ਉਨ੍ਹਾਂ ਲਈ ਮੁਮਕਿਨ ਨਹੀਂ ਹੋ ਰਿਹਾ। ਆਖਰ ਉਨ੍ਹਾਂ ਨੇ ਇਨ੍ਹਾਂ ਤਿੰਨਾਂ ਅਭਿਨੇਤਾਵਾਂ ਨੂੰ ਇਕੱਠੇ ਲਿਆਉਣ ਦਾ ਪਲਾਨ ਡਰਾਪ ਕਰ ਦਿੱਤਾ ਤੇ ਫਿਲਮ ਦੇ ਸੀਕਵਲ ਨੂੰ ਨਵੀਂ ਕਹਾਣੀ ਦੇ ਨਾਲ ਪੇਸ਼ ਕਰਨ ਦਾ ਫੈਸਲਾ ਲਿਆ ਹੈ। ਚਰਚਾ ਹੈ ਕਿ ਫਿਲਮ ਦੀ ਕਾਸਟਿੰਗ ਸ਼ੁਰੂ ਹੋ ਚੁੱਕੀ ਹੈ ਅਤੇ ਫਿਲਹਾਲ ਕ੍ਰਿਤੀ ਸਨਨ ਨੂੰ ਬਤੌਰ ਲੀਡ ਅਭਿਨੇਤਰੀ ਫਾਈਨਲ ਕਰ ਲਿਆ ਗਿਆ ਹੈ। ਇਸ ਵਾਰ ਦੀ ਕਹਾਣੀ ਵੀ ਇੱਕ ਲੜਕੀ ਅਤੇ ਦੋ ਲੜਕਿਆਂ ਦੇ ਆਲੇ ਦੁਆਲੇ ਹੋਵੇਗੀ। ਅਭਿਨੇਤਾ ਦੀ ਚੋਣ ਅਜੇ ਹੋਣੀ ਬਾਕੀ ਹੈ।