ਮਾਂਟਰੀਅਲ, 6 ਦਸੰਬਰ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਦੇਸ਼ ਵਿੱਚ ਗੰਨ ਵਾਇਲੰਸ ਨੂੰ ਖ਼ਤਮ ਕਰਨ ਲਈ ਸਰਕਾਰ ਹੈਂਡਗੰਨਜ਼ ਤੇ ਹਮਲਾ ਕਰਨ ਲਈ ਵਰਤੇ ਜਾਣ ਵਾਲੇ ਹਥਿਆਰਾਂ ਤੱਕ ਪਹੁੰਚ ਨੂੰ ਸੀਮਤ ਕਰਨ ਦੀ ਯੋਜਨਾ ਬਣਾ ਰਹੀ ਹੈ।
1989 ਵਿੱਚ ਇਕੋਲ ਪੌਲੀਟੈਕਨਿਕ ਕਤਲੇਆਮ ਦੀ ਬਰਸੀ ਉੱਤੇ ਮਾਂਟਰੀਅਲ ਦੇ ਰੇਡੀਓ ਸਟੇਸ਼ਨ 98.5 ਐਫਐਮ ਉੱਤੇ ਗੱਲ ਕਰਦਿਆਂ ਟਰੂਡੋ ਨੇ ਹੋਸਟ ਦੇ ਪੁੱਛੇ ਜਾਣ ਉੱਤੇ ਇਨ੍ਹਾਂ ਹਥਿਆਰਾਂ ਉੱਤੇ ਮੁਕੰਮਲ ਪਾਬੰਦੀ ਤੋਂ ਵੀ ਇਨਕਾਰ ਨਹੀਂ ਕੀਤਾ। ਟਰੂਡੋ ਨੇ ਆਖਿਆ ਕਿ ਇਸ ਤਰ੍ਹਾਂ ਦੇ ਕਤਲੇਆਮ ਤੇ ਘਟਨਾਵਾਂ ਸਵੀਕਾਰਨਯੋਗ ਨਹੀਂ ਹਨ ਇਸ ਲਈ ਸਰਕਾਰ ਅਜਿਹੇ ਹਾਲਾਤ ਨਾਲ ਨਜਿੱਠਣ ਲਈ ਵੱਖਰਾ ਰਾਹ ਲੱਭ ਰਹੀ ਹੈ। ਪਰ ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਦਾ ਅਸਲ ਟੀਚਾ ਮੁਜਰਮਾਂ ਦੀ ਹੈਂਡਗੰਨਜ਼ ਤੇ ਅਜਿਹੇ ਅਸਾਲਟ ਹਥਿਆਰਾਂ ਤੱਕ ਸਹਿਜ ਪਹੁੰਚ ਨੂੰ ਸੀਮਤ ਕਰਨਾ ਹੈ।
ਜਿ਼ਕਰਯੋਗ ਹੈ ਕਿ 2015 ਵਿੱਚ ਟਰੂਡੋ ਨੇ ਆਪਣੀ ਚੋਣ ਮੁਹਿੰਮ ਦੌਰਾਨ ਹੈਂਡਗੰਨਜ਼ ਤੇ ਅਸਾਲਟ ਹਥਿਆਰਾਂ ਨੂੰ ਸੀਮਤ ਕਰਨ ਦਾ ਵਾਅਦਾ ਕੀਤਾ ਸੀ ਪਰ ਗੰਨ ਕੰਟਰੋਲ ਦੀ ਪੈਰਵੀ ਕਰਨ ਵਾਲਿਆਂ ਵੱਲੋਂ ਇਸ ਪਾਸੇ ਵੱਲ ਉੱਕਾ ਹੀ ਕੁੱਝ ਨਾ ਕੀਤੇ ਜਾਣ ਉੱਤੇ ਸਰਕਾਰ ਦੀ ਨੁਕਤਾਚੀਨੀ ਕੀਤੀ ਜਾ ਰਹੀ ਹੈ। ਪ੍ਰਧਾਨ ਮੰਤਰੀ ਵੱਲੋਂ ਅੱਜ ਦੀ ਇਹ ਟਿੱਪਣੀ 29 ਸਾਲ ਪਹਿਲਾਂ ਮਾਂਟਰੀਅਲ ਵਿੱਚ ਇਕੋਲ ਪੌਲੀਟੈਕਨਿਕ ਇੰਜੀਨੀਅਰਿੰਗ ਕਾਲਜ ਦੀਆਂ 14 ਲੜਕੀਆਂ ਨੂੰ ਗੋਲੀਆਂ ਮਾਰ ਕੇ ਮਾਰੇ ਜਾਣ ਦੀ ਘਟਨਾ ਦੀ ਬਰਸੀ ਮੌਕੇ ਕੀਤੀ ਗਈ।
ਟਰੂਡੋ ਮਾਊਂਟ ਰੌਇਲ ਵਿੱਚ ਰਾਤ ਸਮੇਂ ਹੋਣ ਜਾ ਰਹੇ ਯਾਦਗਾਰੀ ਸਮਾਰੋਹ ਵਿੱਚ ਪ੍ਰੀਮੀਅਰ ਫਰੈਂਕੌਇਸ ਲੀਗਾਲਟ ਤੇ ਹੋਰਨਾਂ ਅਹਿਮ ਹਸਤੀਆਂ ਨਾਲ ਸ਼ਾਮਲ ਹੋਣ ਲਈ ਜਾਣਗੇ।