ਨਵੀਂ ਦਿੱਲੀ, 6 ਦਸੰਬਰ (ਪੋਸਟ ਬਿਊਰੋ)- ਭਾਰਤ ਵਿੱਚ ਵਿਦੇਸ਼ੀ ਸਿਗਰਟਾਂ ਦਾ ਵਧ ਰਿਹਾ ਨਾਜਾਇਜ਼ ਕਾਰੋਬਾਰ ਇਸ ਦੇਸ਼ ਦੇ ਖਜ਼ਾਨੇ ਨੂੰ ਵੱਡਾ ਚੂਨਾ ਲਾ ਰਿਹਾ ਹੈ। ਸਮੱਗਲਿੰਗ ਨਾਲ ਆਉਣ ਵਾਲੀਆਂ ਵਿਦੇਸ਼ੀ ਬ੍ਰਾਂਡ ਦੀਆਂ ਸਿਗਰਟਾਂ ਜ਼ਰੀਏ ਸਰਕਾਰ ਨੂੰ ਹਰ ਸਾਲ ਲਗਭਗ 13,000 ਕਰੋੜ ਰੁਪਏ ਦਾ ਨੁਕਸਾਨ ਉਠਾਉਣਾ ਪੈ ਰਿਹਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਘਰੇਲੂ ਬਾਜ਼ਾਰ ਵਿੱਚ ਵਿਦੇਸ਼ੀ ਬਰਾਂਡ ਦੀ ਸਿਗਰਟ ਦੀ ਮੰਗ ਕਾਫੀ ਵੱਧ ਹੈ। ਇਹੀ ਕਾਰਨ ਹੈ ਕਿ ਸਾਲ 2011 ਤੋਂ ਬਾਅਦ ਦੇਸ਼ ਵਿੱਚ ਇਸ ਦਾ ਗੈਰ ਕਨੂੰਨੀ ਕਾਰੋਬਾਰ ਕਾਫੀ ਵਧ ਗਿਆ ਹੈ, ਖਾਸ ਤੌਰ ਉਤੇ ਸਾਲ 2012-13 ਤੋਂ ਬਾਅਦ ਤੋਂ ਇਸ 'ਤੇ ਟੈਕਸ ਦਰ ਵਧਣ ਨਾਲ ਇਸ ਦੀ ਸਮੱਗਲਿੰਗ ਵਿੱਚ ਕਾਫੀ ਵਾਧਾ ਹੋਇਆ ਹੈ। ਉਦਯੋਗ ਖੇਤਰ ਦੇ ਅਨੁਮਾਨ ਮੁਤਾਬਕ ਇਸ ਸਮੇਂ ਤੋਂ ਬਾਅਦ ਇਸ ਦਾ ਗੈਰ ਕਾਨੂੰਨੀ ਕਾਰੋਬਾਰ ਕਰੀਬ 28 ਫੀਸਦੀ ਤੱਕ ਵਧਿਆ ਹੈ। ਸਾਲ 2011 ਵਿੱਚ ਦੇਸ਼ ਵਿੱਚ ਕਰੀਬ 19.5 ਅਰਬ ਸਿਗਰਟ ਸਟਿਕ ਦੀ ਵਿਕਰੀ ਗੈਰ ਕਾਨੂੰਨੀ ਹੁੰਦੀ ਸੀ। ਇਹ ਅੰਕੜਾ 2017 ਵਿੱਚ ਵਧ ਕੇ 24.9 ਅਰਬ ਸਿਗਰਟ ਸਟਿਕ ਹੋ ਗਿਆ ਹੈ। ਸਿਗਰਟ ਦੇ ਇਸ ਗੈਰ ਕਾਨੂੰਨੀ ਕਾਰੋਬਾਰ ਦਾ ਅਸਰ ਸਿੱਧੇ ਤੌਰ ਉਤੇ ਸਰਕਾਰ ਦੇ ਖਜ਼ਾਨੇ 'ਤੇ ਪੈ ਰਿਹਾ ਹੈ। ਉਦਯੋਗ ਸੰਗਠਨ ਫਿੱਕੀ ਦੇ ਇਕ ਅਨੁਮਾਨ ਮੁਤਾਬਕ ਸਾਲ 2012 ਵਿੱਚ ਗੈਰ ਕਾਨੂੰਨੀ ਕਾਰੋਬਾਰ ਨਾਲ ਨੁਕਸਾਨ ਦਾ ਅੰਕੜਾ 6239 ਕਰੋੜ ਰੁਪਏ ਦਾ ਸੀ। ਇਹ ਸਾਲ 2017 ਵਿੱਚ ਵਧਦੇ ਹੋਏ 13,000 ਕਰੋੜ ਰੁਪਏ ਨੂੰ ਪਾਰ ਕਰ ਗਿਆ ਹੈ। ਅਨੁਮਾਨ ਮੁਤਾਬਕ ਇਸ ਵਿੱਚ ਕਰੀਬ 26 ਫੀਸਦੀ ਦੀ ਕਮੀ ਆਈ ਹੈ। ਉਦਯੋਗ ਦਾ ਮੰਨਣਾ ਹੈ ਕਿ ਜੀ ਐਸ ਟੀ ਵਿੱਚ ਇਕ ਵਾਰ ਫਿਰ ਟੈਕਸ ਦੀਆਂ ਦਰਾਂ ਵਿੱਚ ਭਾਰੀ ਵਾਧੇ ਨਾਲ ਵਿਦੇਸ਼ੀ ਸਿਗਰਟਾਂ ਦੀ ਸਮੱਗਲਿੰਗ ਵਿੱਚ ਤੇਜ਼ੀ ਆ ਰਹੀ ਹੈ।