ਟੋਕੀਓ, 6 ਦਸੰਬਰ (ਪੋਸਟ ਬਿਊਰੋ)- ਜਾਪਾਨ ਦੇ ਸਮੁੰਦਰੀ ਤੱਟ `ਤੇ ਵੀਰਵਾਰ ਸਵੇਰੇ ਦੋ ਅਮਰੀਕੀ ਫ਼ੌਜੀ ਜਹਾਜ਼ਾਂ `ਚ ਟੱਕਰ ਹੋ ਗਈ। ਹਵਾ ਤੋਂ ਹਵਾ `ਚ ਫਿਊਲ ਭਰਨ ਦੀ ਪ੍ਰਕਿਰਿਆ ਵੇਲੇ ਇਹ ਹਾਦਸਾ ਹੋਇਆ। ਦੋਵਾਂ ਜਹਾਜ਼ਾਂ ਨੇ ਜਾਪਾਨ ਦੇ ਇਵਾਕੁਨੀ ਸਥਿਤ ਮਰੀਨ ਕਾਰਪਸ ਏਅਰ ਸਟੇਸ਼ਨ ਤੋਂ ਉਡਾਣ ਭਰੀ ਸੀ।
ਜਾਪਾਨ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਟੱਕਰ ਐਫ ਏ-18 ਅਤੇ ਕੇ ਸੀ-130 ਹਰਕਿਊਲਿਸ ਜਹਾਜ਼ਾਂ ਵਿਚ ਹੋਈ। ਦੋਵਾਂ ਜਹਾਜ਼ਾਂ `ਚ ਕੁਲ ਸੱਤ ਨੇਵੀ ਫੌਜੀ ਸਵਾਰ ਸਨ। ਇਨ੍ਹਾਂ ਵਿੱਚੋਂ ਦੋ ਜਣਿਆਂ ਨੂੰ ਬਚਾ ਲਿਆ ਹੈ ਤੇ ਹੋਰ ਪੰਜ ਦੀ ਭਾਲ ਲਈ ਮੁਹਿੰਮ ਚੱਲ ਰਹੀ ਹੈ। ਜਾਪਾਨ ਦੇ ਰੱਖਿਆ ਮੰਤਰੀ ਤਾਕੇਸ਼ੀ ਇਵਾਯਾ ਨੇ ਕਿਹਾ ਕਿ ਸਾਡਾ ਧਿਆਨ ਤਲਾਸ਼ ਅਤੇ ਬਚਾਅ ਮੁਹਿੰਮ ਉਤੇ ਹੈ। ਘਟਨਾ ਦੀ ਪੂਰੀ ਜਾਣਕਾਰੀ ਮਿਲਣ ਦੇ ਬਾਅਦ ਹੀ ਜਾਪਾਨ ਇਸ ਉਤੇ ਕੋਈ ਟਿੱਪਣੀ ਕਰੇਗਾ। ਅਮਰੀਕੀ ਰਾਜਦੂਤ ਵਿਲੀਅਮ ਹੇਗਰਟੀ ਨੇ ਬਚਾਅ ਕਾਰਜਾਂ `ਤੇ ਤੱਤਪਰਤਾ ਲਈ ਜਾਪਾਨੀ ਫ਼ੌਜ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਹਾਦਸਾ ਹਵਾ ਤੋਂ ਹਵਾ `ਚ ਤੇਲ ਭਰਨ ਦੀ ਇਕ ਨਿਯਮਿਤ ਪ੍ਰਕਿਰਿਆ ਦੌਰਾਨ ਹੋਇਆ।
ਬੀਤੇ ਕੁਝ ਸਾਲਾਂ ਵਿੱਚ ਅਮਰੀਕਾ ਦੇ ਹਵਾਈ ਹਾਦਸੇ ਤੇਜ਼ੀ ਨਾਲ ਵਧੇ ਹਨ। ‘ਦ ਮਿਲਟਰੀ ਟਾਈਮਜ਼` ਮੁਤਾਬਕ 2013 ਤੋਂ 2017 ਤਕ ਹਵਾਈ ਹਾਦਸਿਆਂ `ਚ 40 ਫ਼ੀਸਦੀ ਵਾਧਾ ਹੋ ਗਿਆ। ਇਨ੍ਹਾਂ ਵਿੱਚ ਘੱਟੋ ਘੱਟ 133 ਫ਼ੌਜੀਆਂ ਦੀ ਜਾਨ ਗਈ ਹੈ। ਕਈ ਅਮਰੀਕੀ ਪਾਰਲੀਮੈਂਟ ਮੈਂਬਰਾਂ ਦਾ ਕਹਿਣਾ ਹੈ ਕਿ ਫ਼ੌਜੀ ਮੁਹਿੰਮਾਂ ਦੀ ਅਧਿਕਤਾ ਤੇ ਆਧੁਨਿਕੀਕਰਨ `ਤੇ ਧਿਆਨ ਨਾ ਦਿੱਤੇ ਜਾਣ ਕਾਰਨ ਹਾਦਸੇ ਹੋ ਰਹੇ ਹਨ। ਜਾਪਾਨ `ਚ ਵੀ ਅਮਰੀਕੀ ਫ਼ੌਜੀ ਹਾਦਸੇ ਚਿੰਤਾ ਦਾ ਕਾਰਨ ਬਣੇ ਹੋਏ ਹਨ, ਖ਼ਾਸ ਤੌਰ `ਤੇ ਦੱਖਣੀ ਸੂਬੇ ਓਕੀਨਾਵਾ ਦੇ ਲੋਕਾਂ `ਚ। ਇਥੇ ਅਮਰੀਕੀ ਫ਼ੌਜ ਵੱਡੇ ਪੱਧਰ `ਤੇ ਮੌਜੂਦ ਹੈ।