ਡਾਊਨਜ਼, 6 ਦਸੰਬਰ (ਪੋਸਟ ਬਿਊਰੋ) : ਗਲਤ ਦਿਸ਼ਾ ਵੱਲ ਵੱਧ ਰਹੇ ਸੈਮੀਟਰੇਲਰ ਦੀ ਇਲੀਨੌਇਸ ਹਾਈ ਸਕੂਲ ਦੀ ਕੁੜੀਆਂ ਦੀ ਬਾਸਕਟਬਾਲ ਟੀਮ ਨੂੰ ਲਿਜਾ ਰਹੀ ਬੱਸ ਨਾਲ ਆਹਮੋ ਸਾਹਮਣੀ ਹੋਈ ਟੱਕਰ ਕਾਰਨ ਟਰੱਕ ਦੇ ਡਰਾਈਵਰ ਤੇ ਬੱਸ ਵਿੱਚ ਸਵਾਰ ਇੱਕ ਬਾਲਗ ਦੀ ਮੌਤ ਹੋ ਗਈ। ਇਹ ਜਾਣਕਾਰੀ ਵੀਰਵਾਰ ਨੂੰ ਅਧਿਕਾਰੀਆਂ ਨੇ ਦਿੱਤੀ।
ਇਲੀਨੌਇਸ ਸਟੇਟ ਪੁਲਿਸ ਨੇ ਦੱਸਿਆ ਕਿ ਇਸ ਹਾਦਸੇ ਵਿੱਚ ਅੱਠ ਲੜਕੀਆਂ ਜ਼ਖਮੀ ਹੋ ਗਈਆਂ। ਹਾਦਸਾ ਡਾਊਨਜ਼ ਨੇੜੇ ਇੰਟਰਸਟੇਟ 74 ਉੱਤੇ ਬੁੱਧਵਾਰ ਰਾਤ ਨੂੰ ਵਾਪਰਿਆ। ਪੁਲਿਸ ਨੇ ਦੱਸਿਆ ਕਿ ਬੱਸ ਦਾ ਡਰਾਈਵਰ ਤੇ ਕੋਚ ਵੀ ਜ਼ਖ਼ਮੀ ਹੋ ਗਏ। ਕੁੜੀਆਂ ਦੀ ਇਹ ਟੀਮ ਸ਼ੈਂਪੇਨ ਸੈਂਟਰਲ, ਨੌਰਮਲ ਵੈਸਟ ਹਾਈ ਸਕੂਲ ਵਿੱਚ ਇੱਕ ਗੇਮ ਵਿੱਚ ਹਿੱਸਾ ਲੈਣ ਤੋਂ ਬਾਅਦ ਪਰਤ ਰਹੀ ਸੀ। ਇਹ ਜਾਣਕਾਰੀ ਸਕੂਲ ਦੇ ਅਥਲੈਟਿਕ ਡਾਇਰੈਕਟਰ ਸਟੈਨ ਲੁਈਸ ਨੇ ਦਿੱਤੀ। ਜਿਹੜੀਆਂ ਕੁੜੀਆਂ ਜ਼ਖ਼ਮੀ ਹੋਈਆਂ ਹਨ ਉਨ੍ਹਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਉਨ੍ਹਾਂ ਨੂੰ ਐਂਬੂਲੈਂਸ ਰਾਹੀਂ ਮੌਕੇ ਤੋਂ ਲਿਜਾਇਆ ਗਿਆ।
ਪੁਲਿਸ ਨੇ ਦੱਸਿਆ ਕਿ ਨੌਰਮਲ ਦੇ 72 ਸਾਲਾ ਚਾਰਲਸ ਕਰੈਬਟਰੀ ਬੱਸ ਵਿੱਚ ਸਵਾਰ ਯਾਤਰੀ ਸਨ ਜਿਨ੍ਹਾਂ ਦੀ ਹਾਦਸੇ ਵਿੱਚ ਮੌਤ ਹੋਈ। ਉਹ ਨੌਰਮਲ ਵੈਸਟ ਨਾਲ ਵਾਲੰਟੀਅਰ ਵਜੋਂ ਜੁੜੇ ਹੋਏ ਸਨ।