ਜਲੰਧਰ, 6 ਮਾਰਚ (ਪੋਸਟ ਬਿਊਰੋ)- ਸ਼ਾਹਕੋਟ ਵਿੱਚ ਸ਼ਾਦੀ ਦੇ ਬਾਅਦ ਲੜਕੇ ਨੂੰ ਕੈਨੇਡਾ ਲੈ ਜਾਣ ਦਾ ਝਾਂਸਾ ਦੇ ਕੇ ਉਸੇ ਦੇ ਖਰਚੇ ਉੱਤੇ ਲੜਕੀ ਨੇ ਉਸ ਨਾਲ ਸ਼ਾਦੀ ਕੀਤੀ ਅਤੇ ਜਦੋਂ ਪੀੜਤ ਲੜਕੇ ਨੇ ਸੰਬੰਧ ਬਣਾਉਣ ਦੀ ਗੱਲ ਕਹੀ ਤਾਂ ਉਸ ਨੇ ਕਿਹਾ ਕਿ ਕੈਨੇਡਾ ਜਾ ਕੇ ਹੀ ਹਨੀਮੂਨ ਮੰਨਾਵਾਗੇ। ਫਿਰ ਕਿਸਾਨ ਪਰਵਾਰ ਦੇ ਖਰਚੇ ਉੱਤੇ ਲੜਕੀ ਕੈਨੇਡਾ ਪਹੁੰਚ ਗਈ ਤੇ ਓਥੇ ਜਾਂਦੇ ਸਾਰ ਕਿਸੇ ਹੋਰ ਨਾਲ ਸ਼ਾਦੀ ਕਰ ਲਈ। ਇਸ ਪਿੱਛੋਂ ਸ਼ਿਕਾਇਤ ਕੀਤੀ ਤਾਂ ਥਾਣਾ ਸ਼ਾਹਕੋਟ ਪੁਲਸ ਨੇ ਦੋਸ਼ੀ ਬਾਪ-ਬੇਟੀ ਉੱਤੇਧੋਖਾਧੜੀ ਦਾ ਪਰਚਾ ਦਰਜ ਕਰ ਲਿਆ ਹੈ।
ਪੁਲਸ ਨੂੰ ਦਿੱਤੇ ਬਿਆਨ ਵਿੱਚ ਸ਼ਾਹਕੋਟ ਦੇ ਪਿੰਡ ਧਰਮੀਵਾਲ ਦੇ ਦਲਬੀਰ ਸਿੰਘ ਨੇ ਕਿਹਾ ਕਿ ਉਹ ਆਪਣੇ ਬੇਟੇ ਬੂਟਾ ਸਿੰਘ ਨਾਲ ਖੇਤੀ ਕਰਦੇ ਸਨ ਤੇ ਬੂਟਾ ਸਿੰਘ ਨੂੰ ਕੈਨੇਡਾ ਭੇਜਣਾ ਚਾਹੁੰਦੇ ਸੀ। ਇਸ ਬਾਰੇ ਪਿੰਡ ਰੌਂਤਾ ਦਾ ਹਰਜਿੰਦਰ ਸਿੰਘ ਕਾਲਾ ਉਨ੍ਹਾਂ ਕੋਲ ਆਇਆ ਤੇ ਕਿਹਾ ਕਿ ਉਸਦੀ ਬੇਟੀ ਸੰਦੀਪ ਕੌਰ ਨੇ ਆਈਲੈਟਸ ਕਲੀਅਰ ਕਰ ਲਈ ਹੈ ਅਤੇ ਸ਼ਾਦੀ ਦੇ ਬਾਅਦ ਸੰਦੀਪ ਕੌਰ ਨਾਲ ਬੂਟਾ ਸਿੰਘ ਨੂੰ ਕੈਨੇਡਾ ਭੇਜ ਦੇਣਗੇ। ਰਿਸ਼ਤਾ ਤਹਿ ਹੋ ਗਿਆ ਤਾਂ ਹਰਜਿੰਦਰ ਨੇ ਕਿਹਾ ਕਿ ਉਨ੍ਹਾਂ ਨੇ ਬੇਟੀ ਸੰਦੀਪ ਕੌਰ ਦਾ ਸਟਡੀ ਵੀਜ਼ਾ ਐਪਲਾਈ ਕਰ ਦਿੱਤਾ ਹੈ, ਉਸਦੀ ਫੀਸ ਭਰ ਦਿਉ। ਉਨ੍ਹਾਂ ਨੇ ਆਪਣੀ ਕੰਬਾਈਨ ਵੇਚੀ ਅਤੇ 7.05 ਲੱਖ ਰੁਪਏ ਸੰਦੀਪ ਦੇ ਅਕਾਉਂਟ ਵਿੱਚ ਜਮ੍ਹਾ ਕਰਵਾ ਦਿੱਤੇ। ਇਸ ਦੇ ਬਾਅਦ ਵਿਦੇਸ਼ ਜਾ ਕੇ ਲੜਕੀ ਨੇ ਦੂਸਰੀ ਸ਼ਾਦੀ ਕਰ ਲਈ ਹੈ। ਪੁਲਸ ਨੇ ਲੜਕੀ ਅਤੇ ਉਸ ਦੇ ਪਿਤਾ ਦੇ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ।