ਓਨਟਾਰੀਓ, 5 ਮਾਰਚ (ਪੋਸਟ ਬਿਊਰੋ) : ਓਨਟਾਰੀਓ ਸਰਕਾਰ ਅੱਜ ਇਹ ਤੈਅ ਕਰੇਗੀ ਕਿ ਜੀਟੀਏ ਦੇ ਉਨ੍ਹਾਂ ਦੋ ਕੋਵਿਡ-19 ਹੌਟ ਸਪੌਟਸ ਉੱਤੇ ਕਿਸ ਹੱਦ ਤੱਕ ਪਾਬੰਦੀਆਂ ਲਾਈਆਂ ਜਾਣਗੀਆਂ ਜਿੱਥੇ ਪਹਿਲਾਂ ਹੀ ਸਟੇਅ ਐਟ ਹੋਮ ਦੇ ਆਰਡਰ ਹਨ।
ਜਿ਼ਕਰਯੋਗ ਹੈ ਕਿ ਟੋਰਾਂਟੋ ਤੇ ਪੀਲ ਦੇ ਉੱਘੇ ਡਾਕਟਰਾਂ ਵੱਲੋਂ ਪਹਿਲਾਂ ਹੀ ਪ੍ਰੋਵਿੰਸ ਉੱਤੇ ਦੋਵਾਂ ਰੀਜਨਜ਼ ਨੂੰ ਗ੍ਰੇਅ ਜ਼ੋਨ ਵਿੱਚ ਲਿਆਉਣ ਲਈ ਦਬਾਅ ਪਾਇਆ ਜਾ ਰਿਹਾ ਹੈ। ਸਰਕਾਰ ਵੱਲੋ ਇਸ ਸਬੰਧ ਵਿੱਚ ਉਸ ਸਮੇਂ ਐਲਾਨ ਕੀਤੇ ਜਾਣ ਦੀ ਸੰਭਾਵਨਾ ਹੈ ਜਦੋਂ ਡੱਗ ਫੋਰਡ ਵੱਲੋਂ ਆਪਣੇ ਕੈਬਨਿਟ ਨਾਲ ਮੀਟਿੰਗ ਕਰ ਲਈ ਜਾਵੇਗੀ।
ਪ੍ਰੋਵਿੰਸ ਦੇ ਚੀਫ ਮੈਡੀਕਲ ਆਫੀਸਰ ਡਾ· ਡੇਵਿਡ ਵਿਲੀਅਮਜ਼ ਦਾ ਕਹਿਣਾ ਹੈ ਕਿ ਉਹ ਪਾਜ਼ੀਟਿਵੀ ਦਰ ਨੂੰ ਲੈ ਕੇ ਚਿੰਤਤ ਹਨ। ਇਸ ਤੋਂ ਇਲਾਵਾ ਡਾ· ਵਿਲੀਅਮਜ਼ ਦੀ ਚਿੰਤਾ ਦਾ ਵੱਡਾ ਕਾਰਨ ਰੀਜਨ ਵਿੱਚ ਫੈਲ ਰਹੇ ਹੋਰ ਇਨਫੈਕਸ਼ੀਅਸ ਵੇਰੀਐਂਟਸ ਹਨ। ਉਨ੍ਹਾਂ ਆਖਿਆ ਕਿ ਸਾਨੂੰ ਬਹੁਤ ਹੀ ਸਾਵਧਾਨੀ ਤੋਂ ਕੰਮ ਲੈਣਾ ਹੋਵੇਗਾ ਤੇ ਵੈਕਸੀਨ ਦੀ ਉਡੀਕ ਕਰਨੀ ਹੋਵੇਗੀ।  
ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਵੱਲੋਂ ਸਿਟੀ ਦੇ ਉੱਘੇ ਡਾਕਟਰਾਂ ਵੱਲੋਂ ਕੀਤੀਆਂ ਜਾ ਰਹੀਆਂ ਸਿਫਾਰਿਸ਼ਾਂ ਦਾ ਪੱਖ ਪੂਰਿਆ ਜਾ ਰਿਹਾ ਹੈ ਤੇ ਉਨ੍ਹਾਂ ਦਾ ਵੀ ਆਖਣਾ ਹੈ ਕਿ ਹੁਣ ਸਿਟੀ ਨੂੰ ਗ੍ਰੇਅ ਜ਼ੋਨ ਵਿੱਚ ਲਿਆਉਣ ਦਾ ਸਮਾਂ ਆ ਗਿਆ ਹੈ। ਉਨ੍ਹਾਂ ਆਖਿਆ ਕਿ ਇਹੋ ਪਹੁੰਚ ਸਹੀ ਰਹੇਗੀ।