ਓਟਵਾ, 2 ਮਾਰਚ (ਪੋਸਟ ਬਿਊਰੋ) : ਐਸਟ੍ਰਾਜ਼ੈਨੇਕਾ ਕੋਵਿਡ-19 ਵੈਕਸੀਨਜ਼ ਦੀ ਪਹਿਲੀ ਖੇਪ ਸਵੇਰ ਤੱਕ ਕੈਨੇਡਾ ਪਹੁੰਚ ਜਾਵੇਗੀ। ਇਸ ਦੇ ਨਾਲ ਹੀ ਇਸ ਹਫਤੇ ਕੁੱਲ ਮਿਲਾ ਕੇ ਵੈਕਸੀਨ ਦੀਆਂ 944,600 ਡੋਜ਼ਾਂ ਕੈਨੇਡਾ ਨੂੰ ਹਾਸਲ ਹੋਣਗੀਆਂ। ਇਹ ਜਾਣਕਾਰੀ ਪ੍ਰੋਕਿਓਰਮੈਂਟ ਮੰਤਰੀ ਅਨੀਤਾ ਆਨੰਦ ਨੇ ਮੰਗਲਵਾਰ ਨੂੰ ਦਿੱਤੀ।
ਕੈਨੇਡਾ ਨੂੰ ਦੋ ਮਿਲੀਅਨ ਡੋਜ਼ਾਂ ਦੇਣ ਦੀ ਹੋਈ ਡੀਲ ਦੇ ਹਿੱਸੇ ਵਜੋਂ ਭਾਰਤ ਦੇ ਸੀਰਮ ਇੰਸਟੀਚਿਊਟ ਤੇ ਵੈਰਿਟੀ ਫਾਰਮਾਸਿਊਟੀਕਲਜ਼ ਵੱਲੋਂ ਪਹਿਲੀ ਖੇਪ ਵਜੋਂ ਐਸਟ੍ਰਾਜ਼ੈਨੇਕਾ ਦੇ 500,000 ਸ਼ੌਟਸ ਕੈਨੇਡਾ ਘੱਲੇ ਜਾ ਰਹੇ ਹਨ। ਇਸ ਦੇ ਨਾਲ ਹੀ ਫਾਈਜ਼ਰ-ਬਾਇਓਐਨਟੈਕ ਵੈਕਸੀਨ ਦੀਆਂ 444,600 ਡੋਜ਼ਾਂ ਵੀ ਇਸ ਹਫਤੇ ਕੈਨੇਡਾ ਨੂੰ ਹਾਸਲ ਹੋਣਗੀਆਂ।ਆਨੰਦ ਨੇ ਆਖਿਆ ਕਿ ਇਸ ਹਫਤੇ ਅੰਦਾਜ਼ਨ ਹਾਸਲ ਹੋਣ ਵਾਲੀਆਂ 945,000 ਡੋਜ਼ਾਂ ਤੋਂ ਇਲਾਵਾ ਅਗਲੇ ਹਫਤੇ ਸਾਨੂੰ ਵੈਕਸੀਨ ਦੀਆਂ 900,000 ਡੋਜ਼ਾਂ ਹੋਰ ਹਾਸਲ ਹੋਣਗੀਆਂ।
ਫੈਡਰਲ ਸਰਕਾਰ ਨੇ ਆਖਿਆ ਕਿ ਐਸਟ੍ਰਾਜੈ਼ਨੇਕਾ ਨੂੰ ਕੈਨੇਡਾ ਦੀਆਂ ਮਨਜੂ਼ਰਸ਼ੁਦਾ ਵੈਕਸੀਨਜ਼ ਦੀ ਸੂਚੀ ਵਿੱਚ ਸ਼ਾਮਲ ਕੀਤੇ ਜਾਣ ਨਾਲ ਵੈਕਸੀਨ ਦੀ ਖੇਪ ਦਿਨੋਂ ਦਿਨ ਵਧਦੀ ਹੀ ਜਾਣ ਵਾਲੀ ਹੈ। ਇਸ ਨਾਲ ਹੋਰ ਲੋਕਾਂ ਦਾ ਟੀਕਾਕਰਣ ਕਰਨ ਲਈ ਰਾਹ ਪੱਧਰਾ ਹੋ ਜਾਵੇਗਾ ਤੇ ਜੂਨ ਦੇ ਅੰਤ ਤੱਕ 14·5 ਮਿਲੀਅਨ ਕੈਨੇਡੀਅਨਾਂ ਨੂੰ ਪੂਰੀ ਤਰ੍ਹਾਂ ਵੈਕਸੀਨੇਟ ਕੀਤੇ ਜਾਣ ਦਾ ਟੀਚਾ ਪੂਰਾ ਕਰਨ ਵਿੱਚ ਵੀ ਮਦਦ ਮਿਲੇਗੀ।
ਇੰਟਰਗਵਰਮੈਂਟਲ ਅਫੇਅਰਜ਼ ਮੰਤਰੀ ਡੌਮੀਨਿਕ ਲੀਬਲਾਂਕ ਨੇ ਆਖਿਆ ਕਿ ਇਸ ਹਫਤੇ ਸਾਡੀ ਸਰਕਾਰ ਵੱਲੋਂ ਪ੍ਰੋਵਿੰਸਾਂ ਨੂੰ ਵੈਕਸੀਨਜ਼ ਦੀ ਡਲਿਵਰੀ ਦੇ ਕੰਮ ਵਿੱਚ ਵਾਧਾ ਕਰ ਦਿੱਤਾ ਜਾਵੇਗਾ, ਇਸ ਨਾਲ ਬਹੁਤੇ ਕੈਨੇਡੀਅਨਾਂ ਨੂੰ ਵੈਕਸੀਨ ਹਾਸਲ ਕਰਨ ਦਾ ਮੌਕਾ ਮਿਲੇਗਾ ਤੇ ਅਸੀਂ ਚਾਹੁੰਦੇ ਹਾਂ ਕਿ ਜਿਸ ਕਿਸੇ ਨੂੰ ਵੀ ਵੈਕਸੀਨ ਲਵਾਉਣ ਦੀ ਪੇਸ਼ਕਸ਼ ਕੀਤੀ ਜਾਵੇ ਉਹ ਉਸ ਨੂੰ ਸਵੀਕਾਰ ਲਵੇ।