ਬਰੈਂਪਟਨ, 5 ਦਸੰਬਰ (ਪੋਸਟ ਬਿਊਰੋ) : ਅੱਜ ਇੱਥੇ ਕੀਤੀ ਗਈ ਖਾਸ ਮੀਟਿੰਗ ਵਿੱਚ ਬਰੈਂਪਟਨ ਸਿਟੀ ਕਾਉਂਸਲ ਨੇ ਸਿਟੀ ਕਾਉਂਸਲਰ ਰੋਵੇਨਾ ਸੈਂਟੋਸ (ਵਾਰਡ 1 ਤੇ 5) ਨੂੰ ਸਾਲ 2018 ਤੋਂ 2022 ਤੱਕ ਪੀਲ ਰੀਜਨਲ ਕਾਉਂਸਲ ਵਿੱਚ ਬਰੈਂਪਟਨ ਦੀ ਅਡੀਸ਼ਨਲ ਰੀਜਨਲ ਕਾਉਂਸਲਰ ਨਿਯੁਕਤ ਕੀਤਾ ਹੈ।
ਕਾਉਂਸਲਰ ਰੋਵੇਨਾ ਸੈਂਟੋਸ 6 ਦਸੰਬਰ, 2018 ਨੂੰ ਹੋਣ ਵਾਲੀ ਪੀਲ ਰੀਜਨਲ ਕਾਉਂਸਲ ਦੀ ਉਦਘਾਟਨੀ ਮੀਟਿੰਗ ਵਿੱਚ ਰੀਜਨਲ ਕਾਉਂਸਲਰ ਵਜੋਂ ਸੰਹੁ ਚੁੱਕੇਗੀ। 2005 ਵਿੱਚ ਪ੍ਰੋਵਿੰਸ਼ੀਅਲ ਸਰਕਾਰ ਵੱਲੋਂ ਬਿੱਲ 186 ਪੇਸ਼ ਕੀਤਾ ਗਿਆ ਸੀ, ਜਿਸ ਵਿੱਚ ਪੀਲ ਕਾਉਂਸਲ ਵਿੱਚ ਬਰੈਂਪਟਨ ਦੀ ਨੁਮਾਇੰਦਗੀ ਇੱਕ ਮੈਂਬਰ (ਮੇਅਰ, ਪੰਜ ਰੀਜਨਲ ਕਾਉਂਸਲਰਜ਼, ਇੱਕ ਵਧੀਕ ਕਾਉਂਸਲਰ) ਨਾਲ ਵੱਧ ਗਈ ਸੀ। ਮਿਉਂਸਪਲ ਚੋਣਾਂ ਤੋਂ ਬਾਅਦ ਪੰਜ ਚੁਣੇ ਗਏ ਸਿਟੀ ਕਾਉਂਸਲਰਜ਼ ਵਿੱਚੋਂ ਸਿਟੀ ਕਾਉਂਸਲ ਵੱਲੋਂ ਇੱਕ ਨੂੰ ਵਧੀਕ ਰੀਜਨਲ ਕਾਉਂਸਲਰ ਨਿਯੁਕਤ ਕੀਤਾ ਗਿਆ। ਇਹ ਸ਼ਖਸ ਹੁਣ ਸਿਟੀ ਤੇ ਰੀਜਨਲ ਕਾਉਂਸਲ ਦੇ ਮੈਂਬਰ ਵਜੋਂ ਸੇਵਾ ਨਿਭਾਏਗਾ।
ਸਿਟੀ ਕਾਉਂਸਲ ਨੇ ਸਟਾਫ ਨੂੰ ਇਹ ਪਤਾ ਲਾਉਣ ਲਈ ਵੀ ਆਖਿਆ ਕਿ ਇਹ ਸੰਭਾਵਨਾ ਵੀ ਤਲਾਸ਼ੀ ਜਾਵੇ ਕਿ ਵਧੀਕ ਰੀਜਨਲ ਕਾਉਂਸਲਰ ਕਾਉਂਸਲ ਦੇ ਪੂਰੇ ਕਾਰਜਕਾਲ ਲਈ ਬਣਿਆ ਰਹਿ ਸਕਦਾ ਹੈ ਜਾਂ ਫਿਰ ਰੋਟੇਸ਼ਨ ਉੱਤੇ ਇੱਕ ਤੋਂ ਵੱਧ ਸਿਟੀ ਕਾਉਂਸਲਰ ਨੂੰ ਵਧੀਕ ਰੀਜਨਲ ਕਾਉਂਸਲਰ ਦੀ ਭੂਮਿਕਾ ਨਿਭਾਉਣ ਲਈ ਦਿੱਤੀ ਜਾ ਸਕਦੀ ਹੈ। ਇਸ ਤੋਂ ਇਲਾਵਾ, ਸਿਟੀ ਕਾਉਂਸਲ ਵੱਲੋਂ ਬਰੈਂਪਟਨ ਰੀਜਨਲ ਕਾਉਂਸਲਰ ਦੀ ਆਰਜ਼ੀ ਗੈਰਮੌਜੂਦਗੀ ਵਿੱਚ ਸਿਟੀ ਕਾਉਂਸਲਰ ਹਰਕੀਰਤ ਸਿੰਘ ਨੂੰ ਬਦਲਵੇਂ ਰੀਜਨਲ ਕਾਉਂਸਲਰ ਵਜੋਂ ਨਿਯੁਕਤ ਕੀਤਾ ਗਿਆ ਹੈ।