ਸੈਕਰਾਮੈਂਟੋ, 24 ਫਰਵਰੀ (ਹੁਸਨ ਲੜੋਆ ਬੰਗਾ)-ਜਿਥੇ ਮੈ ਜੰਮੀ ਪਲੀ , ਉਹ ਖੇਤਰ ਵੀ ਨਸਲਵਾਦੀ ਹੋਵੇਗਾ, ਇਹ ਮੈ ਕਦੀ ਸੋਚਿਆ ਵੀ ਨਹੀਂ ਸੀ। ਇਹ ਕਹਿਣਾ ਹੈ ਪ੍ਰਸਿੱਧ ਟੀ.ਵੀ ਸਖਸ਼ੀਅਤ ਜੀਨੀ ਮੇ ਦਾ। ਬੇ ਏਰੀਆ ਕੈਲੀਫੋਰਨੀਆ ਵਿਚ ਜੰਮੀ ਪਲੀ 42 ਸਾਲਾ ਜੀਨੀ ਮੇ ਦਾ ਮੰਨਣਾ ਹੈ ਕਿ ਕੁਝ ਬੁਰੇ ਲੋਕਾਂ ਕਾਰਨ ਨਸਲਵਾਦੀ ਘਟਨਾਵਾਂ ਵਾਪਰਦੀਆਂ ਹਨ। ਉਹ ਯਾਦ ਕਰਦੀ ਹੈ ਉਹ ਸਮਾਂ ਜਦੋਂ ਉਸ ਦੀ ਚਾਚੀ ਤੇ ਚਾਚਾ ਆਪਣੇ ਪਰਿਵਾਰ ਸਮੇਤ ਵੀਅਤਨਾਮ ਨੂੰ ਛੱਡ ਕੇ ਉਨਾਂ ਕੋਲ ਰਹਿਣ ਲਈ ਆਏ ਸਨ ਤਾਂ ਉਨਾਂ ਦੀ ਕਾਰ ਤੇ ਘਰ ਦੀ ਕੰਧ ਉਪਰ ਨਸਲਵਾਦੀ ਟਿਪਣੀਆਂ ਉਕਰ ਦਿੱਤੀਆਂ ਗਈਆਂ ਸਨ ਪਰੰਤੂ ਸਮੁੱਚੇ ਰੂਪ ਵਿਚ ਸਾਡੇ ਆਂਢ ਗੁਆਂਢ ਵਾਲੇ ਲੋਕ ਅਮਨ ਪਸੰਦ ਸਨ। ਮਾਈ ਦਾ ਕਹਿਣਾ ਹੈ ਕਿ ''ਮੈ ਨਸਲੀ ਘਟਨਾਵਾਂ ਤੋਂ ਬੇਹੱਦ ਪ੍ਰਸ਼ਾਨ ਤੇ ਦੁੱਖੀ ਹਾਂ, ਸਾਡੇ ਕਾਲੇ ਭਰਾਵਾਂ ਤੇ ਭੈਣਾਂ ਨਾਲ ਜੋ ਹੋ ਰਿਹਾ ਹੈ, ਉਸ ਨੂੰ ਕਿਸ ਤਰਾਂ ਸਹਿਣ ਕੀਤਾ ਜਾ ਸਕਦਾ ਹੈ। ਬਹੁਤ ਥੋੜੇ ਲੋਕ ਹਨ ਜੋ ਸਾਡੇ ਸਭਿਆਚਾਰ ਨੂੰ ਨਹੀਂ ਸਮਝਦੇ , ਉਹ ਇਹ ਵੀ ਨਹੀਂ ਸਮਝਦੇ ਕਿ ਅਸੀਂ ਇਥੇ ਕਿਉਂ ਹਾਂ।'' ਮੇ ਨਸਲੀ ਹਮਲਿਆਂ ਵਿਰੁੱਧ ਨਿਰੰਤਰ ਸੋਸ਼ਲ ਮੀਡੀਆ, ਆਪਣੇ ਟਾਕ ਸ਼ੋਅ ਤੇ ਇੰਟਰਵਿਊ ਵਿਚ ਆਵਾਜ਼ ਉਠਾਉਂਦੀ ਆ ਰਹੀ ਹੈ। ਇਸ ਟੀ ਵੀ ਸਖਸ਼ੀਅਤ ਦੇ ਇਨਸਟਾਗਰਾਮ ਉਪਰ 24 ਲੱਖ ਪ੍ਰਸੰਸਕ ਹਨ ਤੇ ਯੂ ਟਿਊਬ ਚੈਨਲ 'ਤੇ 6,32,000 ਤੇ ਟਵਿਟਰ ਉਪਰ 2,60,000 ਪ੍ਰਸੰਸਕ ਹਨ। ਮਾਈ ਦਾ ਕਹਿਣਾ ਹੈ ਕਿ ਨਸਲਵਾਦ ਇਕ ਅਜਿਹਾ ਵਰਤਾਰਾ ਹੈ ਜੋ ਹਰ ਇਕ ਲਈ ਚਿੰਤਾ ਦਾ ਕਾਰਨ ਹੋਣਾ ਚਾਹੀਦਾ ਹੈ। ਜਿਕਰਯੋਗ ਹੈ ਕਿ ਕਾਂਗਰਸ ਵਿਚ ਏਸ਼ੀਅਨ ਪੈਸੀਫਿਕ ਅਮਰੀਕਨ ਕੈਕਸ ਦੀ ਚੇਅਰਪਰਸਨ ਰਿਪਬਲੀਕਨ ਆਗੂ ਜੂਡੀ ਚੂ ਤੇ ਹੋਰ ਕਈ ਸੰਸਦ ਮੈਂਬਰਾਂ ਨੇ ਇਕ ਵਰਚੂਅਲ ਪ੍ਰੈਸ ਕਾਨਫਰੰਸ ਵਿਚ ਏਸ਼ੀਅਨ ਮੂਲ ਦੇ ਅਮਰੀਕੀ ਨਾਗਰਿਕਾਂ ਉਪਰ ਵਧ ਰਹੇ ਹਮਲਿਆਂ 'ਤੇ ਚਿੰਤਾ ਪ੍ਰਗਟਾਈ ਸੀ। ਚੂ ਨੇ ਇਕ 84 ਸਾਲ ਦੇ ਥਾਈ ਮੂਲ ਦੇ ਅਮਰੀਕੀ ਨਾਗਰਿਕ ਵਿਚਾ ਰਤਨਾਪਕਡੀ ਦੀ ਹੱਤਿਆ ਸਮੇਤ ਓਕਲੈਂਡ ਤੇ ਕੈਲੀਫੋਰਨੀਆ ਵਿਚ ਸੀਨੀਅਰ ਨਾਗਰਿਕਾਂ ਵਿਰੁੱਧ ਵਧੀ ਹਿੰਸਾ ਦਾ ਜਿਕਰ ਕੀਤਾ ਸੀ।